地產論壇
登入名稱
密碼
頁數:
茶餐廳亂話(448)點解C餐要減價
瀏覽人次:14401    回應:9
茶餐廳亂話(448)點解C餐要減價
 
湯文亮博士
紀惠集團行政總裁
2018年12月29日

  今日去到茶餐廳,竟然發覺早兩日熱賣的C餐,煎豬扒及煎蛋竟然要減價,有熟客不明白箇中原因話國內出現豬瘟,來貨價高了兩成,不少豬肉檔或者餐廳以豬肉為主的餸菜都大幅提高價單,點解老闆仲要減價,是否有錢都唔賺,老闆的官方答案是薄利多銷,熟客長期幫襯,減價酬謝大家,不過,就算老闆減價,叫C餐的人實在不多。

  老闆私底下跟我說,國內疫情嚴峻,香港政府亦打算銷毀所有生豬,C餐在今個上午之後就會暫停供應,過,無論是否供應都好,除了第一日,這兩天叫C餐的人很少,我話既然如此,不如立刻取消C餐,無謂食壞人,老闆立刻坐言起行。

  政府將土地公私營比例從64變73,有地產商話供應減少,樓價會繼續上升,既然如此,地價亦應該相對地上升,但事實又非如此,啓德的地皮招標,結果比下限還要低,地價在一個月內下跌13%,這證明一件事,供應減少,地價未必會調高,因為有很多需求被政府的公營房屋搶走,需求量同樣減少,幅度甚至會大過供應量很多,地產商知道這個情況,出價就會審慎,這是啓德地皮地價下跌原因之一,另一個原因是過往的地價太貴,現在作出適當調整,所以,啓德地皮價格在政府減少私人土地供應之後反而下跌,實在有其道理。

茶餐廳亂話(448)點解C餐要減價
1. 真真薯片
2018-12-29 14:06
64轉73,呢個改動影響深遠

龍市評論員話抽唔中居屋既人會湧入私樓市場,博市話新增公營房屋會扯走私樓客,其實兩個講法都唔全面

抽居屋既人係想買三百零萬樓既人,果d人如果去買私樓,都係買500萬以下既低端私樓,所以居屋向隅客對私樓市場影響唔係無,但係非常局部性,龍市評論員主打大西北二手,對佢黎講影響可能比較大,對整體樓市影響就唔大

至於64轉73,首先多出既公營房屋唔係全部居屋,有部份會係公屋,排公屋既人唔會買私樓,所以抽走私樓地既公屋係唔會抽走私樓購買力,至於抽走私樓地起居屋,就會抽走市樓市場既低端購買力,即係目前500萬以下果d納米盤,單棟樓細單位,超舊私人屋苑300零呎眼鏡房會受壓,以前呢批單位係靠打劫冇得揀又一定要住既剛需用家cher到盡上車,將來新增公營房屋會救到一部份呢種家庭,咁就少左客源比呢d低端樓業主打劫

所以將來私樓市場會分道揚標,由以前既雞犬皆升,甚至質素差既低端單位升得仲勁過真豪宅,轉做低端樓升唔起,但係優質私樓就會因為供應大減而更加保值,點為之優質?地點,樓齡,單位面績,開績,屋苑規模,呢d其實大家都知
2. MT
2018-12-29 15:20
多謝1/F好文
3. 樓市中哥
2018-12-29 17:49
回1/f
真心覺得你勁!
4. 真真薯片
2018-12-30 14:22
2,3樓,大家分享下意見,唔好客氣

公屋,居屋,私樓三條隊其實都排爆,64轉73,多出既公屋居屋其實都係被秒殺,反而私樓條隊會爆得更嚴重,一年多五千公屋居屋,當佢一半係居屋,一年多二千幾居屋,,即係少左二千幾台客,對比較遍遠既舊私人屋苑眼鏡房,殘舊單棟樓,納米盤都唔可以話冇壓力

相信未來地霸為免同公營房屋搶客,會主力開中大型單位,新盤豪宅化趨勢會更勁,正苦64轉73政策原意係想救多d中層家庭比佢地上居屋,從意原同影響睇到係好事,不過副作用係會進一步加劇貧富懸殊,優質私樓>低端私樓>居屋>公屋,四個階層既差距會越黎越大,香港自回歸後貧富差距就越拉越大,未來呢個方向唔止冇舒緩,仲越黎越勁
5. 望東樓
2018-12-30 16:06
如果由真真嘅立論基礎推演:
細單位重有需求,不過係租務需求:我排緊隊都要住架?
樓價從多年前呎數越大就呎價越貴變成近年嘅單位越細呎價越貴再重返當年嘅越大呎價越貴?但會唔會大單位上唔到好可能因為無咁多人承受到咁大嘅冧参,主要靠老表。
會唔會因為咁而係源頭摧毀咗私樓需求嘅食物鏈?先搵細價樓上車,以後再轉車。如果無車可上或者轉唔到車咁高價樓又係得返老表同父幹買?
6. 湯瑪斯
2018-12-30 21:58
龍市評論員就係汪敦敬,佢仍然堅持現是龍市二期,即係樓價重有得升。升到你唔信是所謂龍市的特色。不過,我同意博士昨日講,汪敦敬今次輸咗。一個多星期前汪敦敬仍撰文話自己睇得啱,十二月初成交量明顯上升云云。喂!佢之前明明講600萬以下樓價會喺十一月二十九日之後止跌回升。講緊嘅係樓價唔係成交量。咁都唔肯認錯,呢點他絕對比唔上博士。博士勇於認錯!
7. KKF
2019-01-02 08:53
....這證明一件事,供應減少,地價未必會調「低」...?  ..應該是調「高」吧
8. Admin
2019-01-02 09:58
謝謝7樓指正, 文章已修改。
9. 引刀一快
2019-01-03 04:29
To 6樓 湯瑪斯兄

汪老闆提出龍市概念,但係又唔見佢叫人投資大灣區,呢個已經係矛盾喇。
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。