樓價跌林鄭笑

　　林鄭月娥特首參加新城/信報合辦之香港經濟峯會，作午餐演講嘉賓，今年演講特別精彩。左丁山參與呢個峯會十幾年，聽曾特首梁特首午餐演講起碼有十次，好似有兩次係由曾俊華財政司司長代替，佢地次次都係照本宣科，新意欠奉。去年林鄭講經濟增長率，話明要為經濟打拼，開始少啲官腔。估唔到今年更進一步，可以分段爆肚，例如講到經濟增長就加插幾句：「剛才小加話2019年冇好日子過」，令台下李小加笑到低頭，又識得引用他人句語，來捧吓香港噃，例如：「參加經濟會議，聽到IMF總裁拉嘉德女士話趁陽光普照日子，各個經濟體系要趁機修補屋頂裂縫。輪到我發言就話，香港冇漏雨屋頂，但也要趁機會鞏固地基！」

　　林鄭果然口齒伶俐，唔似得前特首董先生在芝加哥大學晚宴演講（用英文）近乎自言自語，聽到在座咁多猛人如讀「出師表」最尾兩句：「臨表涕泣，不知所云。」最頂癮嘅就係：林鄭講：「現時樓價下跌，對好多人嚟講，係負面消息，但我就覺得好正面，如果因為現時樓價下滑，有人幻想政府會出手救市，可以慳番。」於是全場哄動，電視台電台歡喜死咯，佢地到場錄播特首演講多年，都未曾試過聽到咁正斗，咁入耳嘅sound bite呀。

　　每任特首皆為樓價煩惱，董特首要推低九七高樓價，夠野心，大力推動八萬五，點知唔好彩碰上亞洲金融風暴，樓價不止跌，簡直山崩，滿城怨憤，於是董特首腳痛落台了，但佢被逼出手救市之孫九招係有用嘅，曾特首為爭取民望，緊握孫九招不放，執行更加力道猛，好彩有自由行配合，內地資金來港，於是樓價大幅度反彈，曾特首以為得米，誰知又畀無殼蝸牛鬧到死，種下禍根，及至梁特首上台，為咗推低樓價，不停出辣招，扭曲市場，點知樓價五年內升六成，又畀大眾惡評。

　　現在係林鄭特首嘞，上任一年多，居然眼見樓市自高點回落，憑乜嘢？地產界認為係主要三點：（一）資助房屋由七折出售降低至五二折，令細價樓急跌，（二）提出填海1700公頃產生巨大潛在供應威脅，影響發展商心態，（三）開徵空置稅，逼發展商盡快沽貨。當然亦有外圍因素配合，如美國進入加息周期，不過加息呢回事，恐怕好頂癮，滙豐梁兆基直情話：香港無全面加息條件，2020年可能會減息㖭！如果唔計息口升跌，而樓價仍然下滑嘅話，林鄭會笑得更甜。