地產論壇
登入名稱
密碼
頁數:
預早宣佈2047年後所有農地不獲續約?
瀏覽人次:20947    回應:2

預早宣佈2047年後所有農地不獲續約?

 

左丁山

2018年10月20日

  中午飯局,見到幾個月冇出現嘅公子L在座,對佢講:「以為你還在歐洲遊玩食靚嘢,咁快返到嚟?」公子L話:「返咗嚟一排咯,不過接連飛去台中台北聽音樂會,冇上嚟食飯之嘛。」公子L今年退休後,立即周圍飛,享受人生至愛,美食與聽音樂會,去台中就係要聽華格納歌劇《尼伯龍根的指環之二部曲女武神》,由西班牙劇團導演卡盧斯帕德利薩導演,台灣知名指揮家呂紹嘉率領國家交響樂團演奏……在台中國家歌劇院上演,公子L於去年到台中睇一部曲《萊茵的黃金》,今年梗係要睇埋二部曲啦。按計劃,《尼伯龍根的指環》全本分四年在台中演出,明年後年陸續有來。香港雖然號稱盛事之都,但演出場地奇缺,西九龍劇院遲遲未能完工,曬足二十年太陽,台灣一個小城市台中就將香港壓倒晒,真慚愧!公子L話台中勝在夠近,坐一個鐘頭飛機就到,當然香港如果有魄力組織《指環》在香港上演,更可促進香港對亞洲高檔遊客嘅吸引力。

  久別香港,公子L話一返到嚟就見到遊行上街反對東大嶼填海,問究竟發生乜嘢事。講到填海就意見紛紜,人人有不同意見,不知從何說起。有老友話:「有關注組員質疑政府為何不祭起尚方寶劍,向新界農地徵收,一於動用土地收回條例,收番晒嚟起公屋,快過填海造地噃。」

  呢個觀點有不少人講,尤其是一啲本土關注組,公子L係港大畢業律師,之後轉往地產集團工作多年,對此說不以為然。公子L話:「徵收私人土地唔係想像中咁容易,要有overriding public interest為前提,收地起公屋算唔算係呢?上到法庭就有排講。土地業主一定申請司法覆核,打官司隨時去到終審庭。如果唔係,收得一幅就收得第二幅,咁,在新界擁有最多農地嘅新地與恒基,咪眼光光損失利益,唔申請司法覆核點對得住上市公司股東呀?一啲人講嘢口輕輕,似乎太過學術化噃!」有經驗人士都係諗得較為貼地及現實啲,前地政總署署長劉勵超在電台亦係咁講,劉先生認為尚方寶劍不能輕易動用,一祭出尚方寶劍就許勝不許敗,萬一政府打輸咗官司,寶劍以後就變成廢鐵,嚇唔到人。劉先生話,一動用土地收回條例,九成九會在法庭相見,律政司並無必勝把握。至於前規劃署高官伍華強提出:預早宣佈2047年後所有農地不獲續約,直情係一個核子彈選項,所有香港土地業主都心理上驚埋一份,乃強權獨裁政府所為也。

預早宣佈2047年後所有農地不獲續約?
1. 引刀一快
2018-10-20 15:54
唔使唔續約,到時所有農地續期係一定要俾錢嘅,到時好可能連邊境都撤咗,繼續喺香港城做農務系囉。

飛地先係真正惠民嘅做法,做吓好心,俾D屈喺籠屋嘅大叔老伯,有個舒坦D嘅地方終老喇,俾一半錢可以住大幾倍。
2. JJ
2018-10-21 02:48
使乜驚大地產商司法覆核?就算去到終審法庭輸咗都唔使驚,仲有人大釋法!必勝!有心做一定做到!
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。