地產論壇
登入名稱
密碼
頁數:
冤枉劉德華
瀏覽人次:16921    回應:4

冤枉劉德華

 

左丁山

2018年10月9日

  沙田陳太第四位孫女出生,叫左丁山午飯後行街行到IFC,順便同佢買啲朱古力送畀親戚。好易啫,行到一間法國式朱古力店,問有無XYZ,兩年前買過好多嘅噃,點知女店員話冇XYZ產品,叫左丁山畀張XYZ樣本相片佢睇吓。當堂窒咗條氣,你估人人買完朱古力都會影相留念嘅咩。卒之冇幫襯就走人,心諗:「今時今日,咁嘅服務態度」,點在IFC競爭呀?

  呢句話係邊個講嘅呢?諗咗一輪,先至記得番係劉德華嘅API廣告。行多幾步之後,畀人嗌住,原來係三十幾年前嘅老友B嘅秘書,當時大家有刁一齊做,彼此秘書都認識,估唔到秘書B仲認得左丁山。當年二十零歲,今天已為人母,拖住一個四五歲細路行IFC,多口講句:「秘書B,你個仔好靚仔噃。」秘書B話:「撞,我個孫呀!」大家為之失笑,想起當年秘書B最鍾意聽劉德華,問佢:「劉華好似開演唱會喎,你去唔去聽。」秘書B當堂想喊咁款:「買唔到飛呀,左生我知你識好多人,幫我搵兩張得唔得?」連忙耍手擰頭,呢啲嘢咪搞我。秘書B又話:「華仔好冤枉呀!最近無端端畀人鬧,人身攻擊得好緊要,你知唔知呀?」係?真唔知喎!每日睇報紙咁多張,都唔多覺。秘書B講:「你上網睇吓啦!」

  日日都有上網,不過係睇CNN、BBC、CNBC、彭博,睇世界大事!香港網唔知有乜好睇呢?不過聽完秘書B咁講,好奇心油然而生,返到寫字房上網搜尋吓「劉德華」,原來真係有好多網上攻擊佢嘅新聞,勢兇夾狼,侮辱性人身攻擊都有。劉德華為「團結香港基金」之東大嶼填海建議做「推廣影片」作旁述,談及填海之需要,照計冇乜大件事啫,左丁山在本欄也曾支持東大嶼填海,想不到劉天王樹大招風,有啲激進環保派鬧到佢半死。乜劉德華唔可以做旁述咩?乜劉德華唔可以贊成填海咩?乜劉德華唔可以有言論自由咩?土地大辯論噃,你反對,我贊成,各說各話都唔得,香港一啲網民認真霸道!又有一啲評論員話,劉德華贊成填海變成建制派,此話相當危險,建制派中亦有反對填海嘅,因為填海造地會拖累地價樓價,傷及既得利益集團,一啲地產商都唔知幾鍾意環保派,認為佢哋係推高樓價嘅主力。一啲人往往同時稱讚新加坡解決房屋問題有良方,一方面大罵特區政府比唔上新加坡,殊不知新加坡人口急增,解決方法就係大量填海!劉德華若為新加坡填海拍片作旁述,必受新加坡人歡迎啫。

冤枉劉德華
1.
2018-10-09 10:22
環團成立既目的就係反對所有破壞環境既野,我諗就算係神出黎話要填海,或者香港己經冇晒地,環團一樣反對。

呢個問題好等於鼓勵素色者食肉,叫女人企係度屙尿,或者請尼姑飲酒
2. 向泛民说不
2018-10-09 10:45
楼上,这边黄狗根本是cia养的走狗,任何对香港好的,他们都反对。
最近贸易战,可以看到他们站在老美那边助攻。
3. 引刀一快
2018-10-09 11:19
咁大個大灣區,飛塊地過去快靚正夾平,填得海嚟撞着樓市冧,分分鐘成本高過市價兼冇人要,雖然填海一定好過破壞郊野公園,但係都唔係冇代價嘅,一大塊淺海冇咗,好多魚冇咗近岸繁殖場地,往後各類海水魚鮮都會大受影響。
4. 十三
2018-10-09 13:40

認真填海無問題既

只要你所有工程交俾英美澳法做既我就舉腳讚成

剩係大陸公司唔可以投標

頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。