跌底甚難預測

香港加息，預期樓價調整，究竟係輕微調整還是崩圍式下跌？如果以股票嘅經驗比較，應該係崩圍式下跌才合邏輯。二手樓市場成交薄弱，以往隨便一單成交就可以把呎價推上創新高，令樓價指數不斷上升。同樣道理，而家市況逆轉，買家觀望，是但一宗劈價成交，又可以推冧呎價，時光倒流，價錢回到幾年前。如果跌價預期形成，未來每一單成交都會是劈價成交，樓價又怎能避免決堤下跌？

還有，在跌市預期中賣樓，又肯劈價求售，必定係實力同定力欠奉嘅賣家，呢類要錢唔要貨嘅賣家，等於股票斬倉，不問價錢，自然會令樓價愈推愈低。同股票唔同，你成手貨，都會擔心頭批沽完之後，尾一批沽唔出。所以股票要沽貨，是有顧忌。

沽樓唔同，一件一件，all or nothing，你只係將手上成件沽出，劈價之後，只會影響下家，所以先有人平價買得中環寫字樓後，被指周圍同人唱。如果係沽股票，肯定會靜雞雞，慌死畀人知。

預期樓價會跳崖式下跌，但跌唔得耐，因為每逢肯減價的單位，必定有人接。股市未來半年都冇運行，資金唯一出路就係樓市。

過去樓市亦有唔少購買力嫌貴而長期處於觀望階段，遇啱跳樓貨，一定撲出來搶，直至實力不足嘅賣家絕跡，又或者賣家見到市場有承接力，毋須恐慌性拋售，可以善價而沽，咁就完成樓價軟着陸。

還有原因支持樓市有購買力，未來半年唔止股市冇運行，做生意更加冇運行，貿易戰會淘汰一批廠家，佢哋冇能力或唔願意將工廠移向東南亞，唯有就係執咗佢。執廠嘅成本大過起廠，賠完一筆之後，剩下嘅老本如果可以調回香港，還可以有什麼出路？難道走去科技創業？一定係買幾層樓收租，保護財富。

全世界只有香港嘅房屋肯定能夠保值同收租，只有香港政府係傾向保護業主，其餘所有地方嘅業主都係受政府打壓。香港嘅房屋流通性仲高過股票，股票都有啲垃圾股想沽都沽唔到，香港連凶宅同無契樓都賣得出，仲唔係好過股票？賣樓只會遇着價錢問題，並非真正無人問津。業主墳場比華利山已經街知巷聞，總會聽見劈價成交個案，證明人見人怕嘅樓盤，價錢夠低就能壯膽。

貿易戰殺掉一批廠家，逼佢哋買樓，遇正樓價逆轉，呢批老本回歸不知幾開心。