娥六招支持樓價

　　林鄭月娥宣佈六招新措施，坊間稱為「娥六招」，與董建華特首時期推出之「孫九招」，互相呼應，只不過2002年之房屋及規劃地政局局長孫明揚之九招，明明白白話明救市托市，以免樓價連續下跌，今年之「娥六招」就目標不明確，稱之為整色整水，並無不妥。孫九招其實推出不久，就碰上2003年沙士肆虐，孫九招托市，起唔到作用，到咗2004年有自由行，內地人，內地錢開始大量流入本地，於是樓市好轉，從低位反彈，但董特首未攞到功勞，就因為腳痛辭職，由曾蔭權頂上，曾特首「內閣」之發展局局長，正是林鄭月娥。林鄭局長忠實執行孫九招托市救市，不開發新土地供應，無視自由行帶來之龐大內地人購買力，卒之做到過猶不及，樓價急升。後來講番孫九招，好多人掛住大罵曾蔭權唔做嘢，完全將樓價狂升歸咎曾蔭權，唔記得邊位係「始作俑者」（昔日董特）及邊個係執行者（今日之林鄭特），可嘆也。

　　唔講呢啲舊事咯，星期日在馬場碰到地產B，問佢點睇娥六招，地產B話：「現時空置樓新樓比較多嘅，在巨型地產商手上，只要減少少價，相信短期內就可以賣晒，對該公司唔會有大（material）影響，但一啲中小型發展商揸住豪宅待善價而沽，今被迫提前出售，否則要繳付兩年幾租金，當然媽媽聲，例如一億銀一間屋，假設年租二百五十萬，罰兩年租就係五百萬，都幾肉痛㗎！」不過按政府數字都係得9000個空置單位啫，比率甚低，對整體樓市可說無關痛癢，個別受影響中小發展商，就大罵娥姐嘞。至於居屋賣價降至市價五二折，必然引誘到大量合資格人士搶住入白表，參加一個大抽獎遊戲，若中籤就勝過中六合彩。但參加遊戲人士多了，中獎機率自然下降（除非居屋供應同時大量增加），於是失望人士必然增加，累積之怨氣亦會不斷上升，特區政府又如何應對呢？用五二折買到之居屋自然要補足市值地價先准自由出售，否則就要做「白居易」，轉售予白表人士，可獲微利兼賺咗「住」（即居住期間免交租），過往數字顯示，B類居屋第二市場成交市值比差餉物業估價處之估值為高，但在白居易推出之前，兩者其實相差不遠，是故政府政策有扭曲市場之嫌，再加上可能改變土地分配原則，未來私樓樓價持續上升，乃是娥六招預見得到嘅。