大城不易居

　　以為香港人嘅居住環境惡劣，不少人屈居於劏房之內，係城市恥辱。點知道美國美麗城市西雅圖有大量「無殼蝸牛」仲慘，晚晚露宿街頭，似活在第三世界，比住在香港劏房嘅基層更悲苦。

　　最近香港展開土地供應大辯論，左丁山向兩位中大小師弟請教，即係曾維謙（崇基經濟2010）及葉文祺（聯合經濟2012）；兩位都係團結香港基金高級研究員，不過聽講曾維謙可能不久就會轉換基地。林奮強創辦「黃金五十」之時，以投資銀行入門薪水聘請研究助理，一定要成績極優異嘅新畢業生，搵到港大，科大及美國長春藤尖子之後，向左丁山要人：「唔該介紹一兩位中大畢業生畀我。」左丁山於是向當時嘅中大經濟系主任宋恩榮教授求救，宋教授介紹三位畀左丁山轉介予林奮強，卒之佢請咗兩位，其中一位一路追隨林奮強學習分析地產技巧嘅就係曾維謙。

　　曾校友有心服務社會，雖不斷受投資銀行垂青，還是堅持做公共政策研究，唔去搵真銀。佢係荃灣官立中學畢業生，高考得5A，係要讀中大經濟系，唔讀環球商業或醫科，少有也；入咗崇基，更成為崇基辯論隊隊長，搵佢演講，絕唔會聽到廢話。曾校友又介紹師弟葉文祺畀左丁山認識，葉師弟2012年經濟系畢業，攞一級榮譽，後到LSE讀碩士，回港工作，係一個明日經濟分析之星。曾葉兩位對香港土地供應嘅數據，熟到識隨口背，有啲土地關注組話香港有好多荒地加加埋埋有三四百公頃政府不用，佢地就將關注組嘅數據來源，逐幅逐幅地分析研究，發現原來不少所謂荒地，根本就係條狀窄長方形土地，完全難以發展嘅，啲關注組有吹水之嫌。

　　曾葉兩位同左丁山講，香港目前人口密度達到每平方公里27,400人，與孟買相若，雖則香港人均生產總值係孟買嘅8倍。香港人均居住密度係新加坡3倍，平均居住面積只有170平方呎，比東京低25%，比新加坡低60%！近年納米樓愈起愈多，呢個人均居住面積還會下降！同佢地傾完，以為香港好慘，點知睇新聞先知道西雅圖竟然要向大公司徵收「人頭稅」，以逐個僱員數目計，稅款用於「解決」街頭露宿問題，如何解決？西雅圖有乜新招？值得香港注視。一位朋友嘅朋友在西雅圖打工，佢話下午五點半就要在停車場開車走，否則到了七點，停車場內滿是露宿客，根本開唔到車！如此悲情，我地在香港難以想像。