地產論壇
登入名稱
密碼
頁數:
兩盞明燈耀股樓
瀏覽人次:26690    回應:15

兩盞明燈耀股樓

 

湯文亮博士

紀惠集團行政總裁
2018年1月26日

  早兩日,有線電視請了我和沈大師做早晨節目,講下股市樓市,大師當然是講股市,我自不然講樓市,市場上給予大師外號為明燈,如果在賭仔來說,多少帶有一些侮辱成份,不過大師話唔介意,甚至他喜歡這個稱號,我就比較好一點,一般評論員都會稱呼我做大淡友,但我明白,名義上是大淡友,其實在骨子裡,他們認定我是大輸家,不過,誰勝誰負,評論員心中有數,或者在評論方面,他們的確是贏了一條街,但不少評論員只是認定樓價會上升,但沒有實質行動,至今仍然是住在宿舍或者租樓,所以,贏家並不是真的贏,輸家亦不是真的輸,因為我只是講細價樓有危險,而我又沒有投資細價樓。

  去到有線電視,才知道節目名稱叫「兩盞明燈耀股樓」,我問點解只得下聯,如果叫我作,我會寫「市場波動誰能料,兩盞明燈耀股樓」,大師上星期日在城市論壇表示,恒指到年底時會跌至二萬,有玩股票的人話聽到之後非常開心,大師話恒指跌至二萬,即是可以升至四萬四,今次想窮都難,如果有這種想法今次一定輸,大師話恒指跌一萬點,跌五千他仍然是輸,但如果以大師做燈買了股票,輸得一定比大師多,倘若大師話股市跌至零,結果是否會升至無限,當然不是,所以,不少人今次被大師跣了一鑊,不過又毋傷大雅,做投資買賣,大家都有自己意見,唔會真的是有人搵大師做明燈。

兩盞明燈耀股樓
1. 孟波
2018-01-26 09:24
賭仔姓賴,嬴左就係自己有眼光,輸左就聽錯人老點。
都係嗰句:有強姦,冇焗賭。
自己做事自己承擔後果。
2. 自我陶醉
2018-01-26 10:02
百年巨浪幾回休
千金散盡莫低頭
盼得神人來引路
兩盞明燈耀股樓
3. 自我陶醉
2018-01-26 10:18
百千盼兩,奇貨可居,博士絕對係贏家。


4. 真真薯片
2018-01-26 13:02
其實博士等緊一樣野, 就係有一日細價樓跌2-3成, 咁博士就可以重提今日比細價樓買家既警告, 呢一日未到之前, 唯有忍住先

股市咁升法, 有兩個可能, 1: 港股從此企穩30000點, 好少會點落返30000點以下, 2: 沖完一輪收皮, 回復1, 2年前2萬頭到2萬尾既區間

邊樣似d? 真係唔知, 股市其實真係難估, 如果一年前有人問一年後會升穿30000定係走返20000零點上落市, 我估9成9人都估係上落市, 但係佢依家就爆上比你睇, 最好笑係有d人教炒上落市高沽低渣賺錢交租唔洗買樓, 我想問如今市況, 玩高沽低渣, 高沽完點知佢爆上, 冇得低渣, 咁呢半年租邊個比? 香港太多不負責任既評論員, 真係害死好多人
5. 孟波
2018-01-26 15:52
由上次見個評論員將年初的疑問句,在年尾變身成預測句,對所謂評論員講嘅野好有保留。
7. 明淡實好
2018-01-26 16:45
博士其實是大好友,只不過有人智商低唔知,以為博士睇淡而沽咕自住樓或冇上到車。正一人蠢冇藥醫。
8. 引刀一快
2018-01-26 18:04
To 4樓 真真薯片兄

半年租金都要計較有冇新收入嘅人,何來首期買樓?十成按揭都冇錢買傢私喇。
9. 博士粉
2018-01-26 18:11
不能把博士同大C比。級數唔同。博士大把樓大把錢。沈大C窮淡一名。冇樓,冇股,冇錢,冇L用。之所以佢多年來有工開是因為聽衆把佢當成反向操作的指引。
10. 真真薯片
2018-01-26 18:20
刀兄

高沽低渣炒股交租既難度在於你要捉到正股市既高低位去高沽低渣, 一捉錯高低位出/買錯貨就會損失一個周期賺錢機會, 同時影響後面高沽低渣既操作, 例如沽早左再升, 等到幾時先再渣呢?係咪真係半年? 早渣左仲大鑊, 直頭要蝕錢得升, 重要面對斬唔斬既問題

結論係高沽低渣講就容易, 要成功實踐係非常超級難, 靠呢招賺錢交租, 真係祝你好運, 或者咁講, 如果某人智慧同EQ勁到可以炒股長贏, 呢個人本身就已經聰明絕頂, 住屋唔應該對呢個人構成任何問題
11. 引刀一快
2018-01-26 18:24
高沽完,一般利潤夠交十年八年租以上,有足夠時間去等。
12. 引刀一快
2018-01-26 18:32
真真薯片兄

高沽低揸固然唔易,問題在於高潮已經出現,就可以從盈利角度去打算,冇人話過一定要鋪鋪中,但係中咗唔把握,就等如鋪鋪唔中。
13. 分享
2018-01-26 19:41
過去十數年公司好多同事都高沽完買唔番。所謂高沽是當時自認為高沽,而之後樓價更高租金更高,結果他們大多被殺個措手不及。升市莫估頂。
14. 真真薯片
2018-01-26 20:03
刀兄, 

一年租最少廿萬, 十年八年租閒閒地200個, 沽一野就賺到, 在下佩服
15. 引刀一快
2018-01-27 05:12
真真薯片兄

炒股佬對著今次呢波,執200個一D都好普遍,揸住二手細價樓份首期嚟執200個的話,息完全夠交租。

或者,去大灣區執間大D、寬敞D嘅,都夠啦。
16. 自我陶醉
2018-01-27 07:26
引刀兄、薯片兄

其實條數好易計啫,大家唔洗拗喎! 每年租金約2.8%,由上年年初22000點到現在33000點,升50%,就當你完全唔做槓桿,唔識揀股,只買盈富,一年已經賺17.8年租。若然你識選股的話, 大牛市中賺一兩倍並不困難,但若然你係正宗股海賭徒,一日走幾轉,低位唔敢買,高位博命追的話,要賺餐飯都難。因為呢啲人並非在投資,而是在賭博,贏錢要有運,唔識起身的話,個市一回贏幾多都冇用,必定全部俾番佢。

頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。