地產論壇
登入名稱
密碼
頁數:
司長僭建是攬炒式苦肉計
瀏覽人次:23318    回應:9

司長僭建是攬炒式苦肉計

 

湯文亮博士

紀惠集團行政總裁
2018年1月12日

  我昨日寫了一篇文章話司長僭建可能是苦肉計,不少人話我幫政府講說話,其實並不是,我只不過是以事論事,而事實上政府非常憎我,因為我經常發表有關房屋政策言論,例如在政府推出辣招之前,我已經話要提供足夠供應量,應該取消勾地政策,但上兩位特首都不同意,他們認為樓價是由物業炒家炒起,只要出招消滅炒家,樓價自然會下跌,供應不足只是炒家的說法,到今日,不認還需認。

  政府推出BSD,我撰文話國內人知道,既然用自己名義或者用有限公司買樓,都要付15%印花稅,點解唔用有限公司買樓,到要賣走的時候,只要將有限公司轉讓,不但可以免付15%,現在是30%的印花稅,而且,物業牽涉的違法行為,例如僭建,欠管理費等,根本可以不用理會,政府連聽都費事,現在,已經有數之不盡物業由有限公司持有,買賣物業已經改為公司註冊處,而非田土廳負責,僭建根本不是一個問題,不會影響物業買賣,大家以為現在的官員不知道,當然不是,他們絕對知道來龍去脈,但無能為力處理而已。

  唐唐做不成特首,或多或少都是因為住宅有僭建,CY是既得利益者,又是測量師出身,應該把握機會大刀闊斧解決僭建問題,但CY見目的已達,做了特首之後就以和為貴,老實說,可以僭建的物業,面積一定有相當大,業主的身份亦相當顯赫,面對那些達官貴人,CY又能夠做什麼,僭建的問題,隻眼開隻眼閉算了,在CY五年任期,我相信新僭建的數量比任何一個時期為多,如果律政司司長今次不兵行險著,問題很難解决。

  有人話律政司司長非常不智,應該知道將會做律政司的時候,首先就要解決僭建問題,我認為司長這樣做,她反而不適合做律政司司長,其他人會指責她知道將會做律政司司長才清拆僭健,雖然可以消除法律責任,但政治智慧是零,情況比阿松偷步買車更加嚴重,所以,我不理會其他人怎樣說,認為政府今次行的一定是行苦肉計,是攬炒式苦肉計。

司長僭建是攬炒式苦肉計
1. DT
2018-01-12 10:35
明顯幫口就幫口啦, 昨日的例子不可混為一談
昨天的例子係做之前想出來的辦法, 但司長嗰件事唔係
不過, 兩者都係犯咗法, 人地要收牛肉乾, 司長都要接受法律制裁!

2. 舍神
2018-01-12 10:50
哈哈,越聽越有道理添!

我都有想過,係咪上任前改番好佢就真係冇事.......就任當天就爆出來了,因黑才料應一早係手。

真係要重新估計係咪苦肉計 ^^

我一向同律政C一樣,勇於認錯 (也勇於犯錯 ...haha)^^


未來,港是否又再來一次嚴打?
3. 十郎
2018-01-12 11:08


      犯民根本是一束廢柴 , 豬頭豬腦 。道聽途說 , 亞爺故意留低呢一班廢物 , 因為驅走廢柴 , 換來一堆硬柴 , 豈不學公謹般賠了夫人又折兵。


4. 真真薯片
2018-01-12 11:09
真正既攪炒苦肉計, 係律政司接受屋宇署調查同起訴, 再過庭罰錢, 跟住林鄭大羅大鼓攞龍頭鍘出黎, 炒左律政司

此例一出, 所有官員, 議員, 達官貴人, 只要有僭建, 全都拖出去斬炒魷魚, 冇得駁咀, 個人建議先斬犯民議員, 斬完晒所有高官議員之後, 換過批新人, 咁就乜野拉布23條政改問題通通解決晒
5. 十郎
2018-01-12 11:15


      建議議員加薪加福利 , 保證唔會拉布。

      X哥話 , 一人一票普選 , 佢地有喇 , 不過佢地唔要之馬。

6. 十郎
2018-01-12 13:09


      攪磬左雙鄭 , 雙妹嘜。一於同佔中 ; 黑金 ; 旺暴 ; 僭建 ; 鬧事等一齊攬炒。哈哈哈哈----------買定花生先 !

7. 十郎
2018-01-12 15:48


     我又來猜一猜 , 花花會唔會辭職?

      理由1 . 迎難而上的心---------小學老師同前輩都鼓勵我 , 遇困難要近難而上。花花乜都未做就下馬 , 輸都輸得面目無光。所以唔會。

      理由 2.  犯民不知進退----------犯民耳猿玩大左 , 以前有甲扎照顧得耐 , 缺乏危機感 , 現在對新人勵聲疾呼 , 談判專家 , 婦人之心。攬炒必矣! 所以唔會。




8. 自我陶醉
2018-01-13 08:52
有個小偷從超市裡偷了一包餅,本來以為袋袋平安,豈料在步出超市那一刻,有工作人員大叫一聲:“小姐,唔該你入一入嚟。” 

小偷心裡想:現在人人都望住我,如果未問就攞番出嚟,咪係人都知我偷嘢! 幾大就幾大,死都唔攞,捉到最多咪扮失憶。 咁又係唔係苦肉計? 如果佢有個朋友見到即將事敗,在店員大叫前主動自爆朋友忘記付款,然後互扯貓尾,也許能避過一劫,可惜他們已錯過最佳時機了。

司長怕事敗而唔還原又點會算係苦肉計? 若然林鄭主動講出嚟,然後適當處理,這還可變為一條順水推舟的苦肉計,可惜現在已經太遲了...  

9. 自我陶醉
2018-01-13 09:10
其實成個故事係咁嘅,有個小偷從超市裡偷了一包餅,本來以為袋袋平安,豈料在步出超市那一刻,看到超市有廣告請兼職收錢員,於是就即時應徵,點知忘記咗自己袋裏有包餅未畀錢。仲要被其他人發現,並通知店長。 唉! 仲要連累埋同佢一齊偷嘢嘅朋友一同被揭發,真係失策!最後仲要被人發現佢以前原來係負責超市保安嘅專家,唔通係測試超市保安嘅苦肉計?哈哈哈!

頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。