睇好樓市的盡是賣樓的人

　　昨日有老友叫我不再要發表評論樓市的文章，有報章已經請了二十位專家替樓市把脈，全部都睇好今年樓市，我睇完有關文章之後，發覺一件事，於是同老友去了街市買餸，去到菜檔，問賣菜婆蔬菜靚唔靚，佢話靚到無倫，去到肉舗，我還未問，師傅已經話豬牛肉都冇得頂，隔離魚佬話，今日唔食魚就笨，理論上三位都是他們工作行業的專家，他們都話好，其實是否真的是咁好，於是我們問一位正在買餸的師奶，菜肉魚是否真的如他們所說的咁靚，師奶有氣無氣話，賣花讚花香呀，咁都唔識，我當然識，但報章編輯唔識，二十位睇好樓市的專家盡是賣樓的人。

　　如果二十位專家包括零售行業的人，他們會話今年生意難做，現在不但滿街吉舖，甚至連年宵攤位還有幾十個未租出，唔好以為那些攤位租金很貴，其實只需要幾百元就可以租九日，經營零售業的人並不太睇好樓市，經營飲食業的人又如何，他們同樣會話生意難做，而且高度集中在一些名店，應該有不少酒樓食肆捱不到過年，不過，他們會話，連本業都未做得掂，又點敢講樓市，銀行家又點睇樓市，他們會話香港的確有相當多存款，理論上可以多借出街，不過，除了受到金管局逆週期措施影響之外，有很多打算借錢買樓的人也過不了壓力測試，雖然他們可以問財務公司借錢買樓，但這並不代表他有能力依期還款，如果他們出事，一定會影響樓市，所以，大多數銀行家並不睇好今年樓市。

　　買樓收租的人又如何，他們一定睇好樓市，老實說，他們不會睇淡樓市，但亦不會現在買樓收租，更何況政府推出15%DSD新印花稅之後，基本上已經沒有人買樓收租，至於二十位專家一致睇好樓市，樓價是否一定會上升，這又並不是必然的，我記得在2009年初，全部樓市專家一致睇淡樓市，並且排隊開記者招待會發表他們的預測，當年樓價不但沒有下跌，到了第四季，政府已經要出招打壓樓市，當時，我問那些專家點解會睇錯市，有一個答案值得大家參考，就是他們因為太專注，睇不到影響樓市的其他有利因素，所以預測出現了誤差。