地產論壇
登入名稱
密碼
頁數:
單一聲音是非常危險
瀏覽人次:26802    回應:22

單一聲音是非常危險

 

湯文亮博士

紀惠集團行政總裁
2018年1月4日

  在新的一年開始,第一天工作就要做兩個電視訪問,分別是TVB明珠台以及財經台,我問明珠台那位小姐,點解唔搵其他人做訪問,她說很難搵到夠份量而又睇淡樓市的人,我雖然未夠份量,但搵唔到其他人,勉勉強強都可以,她說得的確沒錯,睇淡樓市的人好似十個救火的少年,走下一個,走下又一個,我差不多是最後一個,但大家始終有所誤解,我並不是睇淡樓市,而是將一些大家忽略的不利因素提出來,只要是有需要,能夠負擔首期,而每月供款又沒有問題,則隨時可以買樓,如果三樣缺一,則要細心考慮影響樓市的不利因素,而且那些不利因素例如利息加,供應增等一定會出現,如果勉強上車,在不久將來又會被迫落車,一上一落會損失大量金錢,甚至將置業希望幻滅,我認為如果現在未能符合上述的三項條件,則應該暫緩置業,待那些不利因素出現了之後才作打算。

  到了財經台訪問,標題是好淡爭持,對手是老對手林一鳴,今次大件事,林一鳴與我一樣,近期是睇淡樓市,但現在連他也轉軚,市場上幾乎變成單一聲音,這會令到大家對樓市失去警覺性,這是非常危險的事,現在所有官員已經不敢評論樓市,連叫人小心都唔敢講,我唯有發揮做第十個人本色,有理冇理都要表示樓市有下行風險,就算事後被人取笑都沒有所謂,市場上一定要有人持反對聲音,否則就太危險,在訪問完畢之後,我總結一下林一鳴的話,他說樓市的確瘋狂,樓價雖然已經脫離了一般市民的負擔能力,但仍然是會向上,但如果現在要買樓,必須衡量自己的實力,林一鳴這番話,我並不覺得他是好友,其實,現在大多數被認為是好友的人,他們的說話其實是很保守,例如有人話現在買樓的人要有準備樓價會下跌,亦有人話買有風險,不買也有風險,如果大家細心聆聽,樓市並不是只得一種聲音,只不過大家只是聽到樓市上升的聲音。

單一聲音是非常危險
1. 十一哥
2018-01-04 10:25
香港係中國同外資打擂臺嘅地方、樓價冇得平、有力嘅買樓係資產配置…平貴都係賬面上落、力有未逮嘅…咁貴上車…升唔夠高…就甩唔到身…長住冇力…生活就好大壓力、頂唔長…焗住走…就連錢種都冇埋。

買賣賺蝕…主要係建基於自己能力。




2. 真真薯片
2018-01-04 10:34
博士做第十個人當然辛苦, 港樓要跌, 首先股市要跌, 深圳樓要跌, 人民幣要跌,  但係呢幾樣野目前仲升緊, 要等呢幾樣野都跌, 之後先輪到港樓跌, 真係唔知等到幾時

在下認為地霸們其實都準備好迎接跌市, 馬鞍山雲海首批折實要萬7, 唔洗問又係加住推, 到後賣出平均價萬8以上, 呢口價其實已經準備好迎接跌市, 假如下半年/年底/出年樓市有浪調整, 跌20-30%, 到時就可以罷賣3-6個月後, 再推盤首輪200個單位萬2-萬4蚊呎“賣大包”, 跟住又搶過, 又加住推……

話說689岩岩上場時都有段時間樓價勁升, 最後升到689頂唔順加辣, 其實正苦做唔到供應, 除左加辣之外就冇野可以做黎比人睇, 博士之前話如果正苦加辣就代表正苦房屋政策失敗, 在下覺得林鄭今年內被逼加辣機會唔細
3. 十一哥
2018-01-04 10:44
樓升唔關政府事、要怪就怪美國佬、QE似足舊屎車頭差佬去大檔、輸清劈支炮上枱打碼、佢話打幾多就幾多、吹得佢漲 ?  

供應多幾倍又如何…印出嚟嘅銀紙…幾多磚頭都清倉  !




4. 引刀一快
2018-01-04 11:13
咁依家淡友講嘢都好保守吖,講親都著眼於“實力”一詞,總之唔怕輸、輸得起、買得起、心頭好,就唔怕嘞。

問題係,買得起之餘,所謂唔怕輸、輸得起、心頭好對好多人嚟講,其實基建於三個字:“冇得輸”,冇得輸早就已經洗腦式植入,個個都以為買得起就冇得輸。
5. 唔係掛
2018-01-04 12:09
林一鳴應該係睇跌。加息後估計樓市跌5-10%,只不過佢唔肯定幾時加息,佢話多數2018會加咁解。者係佢同湯生意見很近,可以去FACEBOOK睇下佢講咩...
6. 唔係掛
2018-01-04 12:14
其實而家同幾年前個個睇跌,得返湯生同林一鳴話升一樣。今時今日個個睇升,得返你2個睇跌。其實2個都係第10人...
7. Hlk cti
2018-01-04 12:35
香港警方必須嚴格司機不要使用電話, 特別是職業司機在駕駛期間
8. 真真薯片
2018-01-04 12:43
公平d講, 美國佬QE係買緊美國自己d股票, 亞馬遜股價炒到過千倍pe, 但係你有冇見鬼佬黎搶港樓? 佢只係推低利息, 不過美國冇叫香港行聯匯, 係香港自己要行聯匯跟美國, 同埋美國自己已經加左息係香港唔加, 所以港樓升唔應該怨美國

呢浪港樓升勢係由大陸去庫存帶起, 由16年農曆年到依家, 係中央指示下內銀大放水比人買樓, 大幅調高估價, 冇壓測, 大陸樓升到今日都仲升緊(雖然過去一年未必升一倍), 所以無可否認, 中央既政策, 起碼到目前為止, 係要大陸樓價升, 而香港受其影響, 於是一齊升, 呢個係事實
9. 在下
2018-01-04 12:56
博士呢份心意,呢種責任感,在下和其他長期粉絲一早心領神悟。
唔明白的人好多只係呢兩年因爆煲論先睇博士文章的讀者。
10. 只差一步
2018-01-04 13:13
只要博士肯轉軚,樓價便是下跌時;博士,麻煩你快些轉軚吧。
11. 十一哥
2018-01-04 13:23
真真唔怪得等到前年先至識買樓、真係睇嘢有分別。


12. 第十人
2018-01-04 17:58
樓市不同股市,𨍭身好慢,升跌週期好長。成日包頂頸,輸清未天光。順勢而為吧。
13. 人間悲剧
2018-01-04 18:11
樓價持續高企,花旗銀行發表指過去10年來有36萬人「落錯車」,出售物業後沒有再次置業,當中有20萬人直到現時更無法持有任何物業。

聴不同聲音重要,但聴錯咗而又做錯野後果好嚴重。這20萬人好可能將來成為接火棒的對像。落錯車,種下了將來上錯車的危機。

做淡樓市,是要付出代價的。
14. 全球配置需求
2018-01-04 18:25
香港是中國人財富全球配置的首選之地,無論是從股市,樓市,保險,同其它財富管理項目的角度而言。樓價升多十年有何不可?因為香港本地人工跟唔上?去倫敦同紐約看看吧。你肯定當地的人工追到樓價?

建立在錯誤的理解上的推論,只會一錯再錯。
15. 香港土著
2018-01-04 19:35
中國人"美德" - 隱惡揚善。
地產界"美德" - 隱淡揚好。
輕輕提下利淡因素都受不了,唱淡就當正你人全家啦…
16. 香港土著
2018-01-04 19:50
...殺人...
17. 香港土著
2018-01-04 20:20
個人認為,博士沒需要耙冷門,更沒需要為顧及市況安危而刻意強調利淡因素,評論家只需要道出自己所信。
18. 真真薯片
2018-01-04 20:35
只可以話, 冇晒壞消息, 就係最大既壞消息
19. 耙冷
2018-01-04 23:52
為咗耙冷而連續幾年耙冷,系時候再檢討下香港樓市的上升性的根本性質。大部分人都認為此波上升浪是cyclical的,而其實應該是行緊一個secular bull market,所以長升長有。
20. 舍神
2018-01-05 01:44
有人話牛市會升到你唔信,然後升到你迷信。

博士就話單一聲音很危險。 其實兩種說法也相似。

我就覺得,參與者是被 "迫瘋" 更貼切!

簡單黎講, 瘋眾是唔知危險為何物的!

一如谷底叫人買貨會給人問候全家,近頂的時候叫人小心一樣會被人笑到面黃!
 

頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。