地產論壇
登入名稱
密碼
頁數:
是誰令財爺寐食難安
瀏覽人次:25327    回應:17

是誰令財爺寐食難安

 

湯文亮博士

紀惠集團行政總裁
2017年12月26日

       財爺在聖誕節前撰文話樓價租金高企,令他寐食難安,不過,財爺有沒有考慮到是誰令他寐食難安,以官員過去一貫作風,一定會話炒家炒起樓價租金,但官員們又心知肚明,乜現在還有炒家,已經出了多項辣招及逆週期措施,基本上沒有炒家可以生存,或者有一些零星落索的小炒家,但不足以擾亂市場,所以,沒有官員夠膽開口,最多自己寐食難安。

       其實,財爺寐食難安是好事,表示他憂港憂民,還有機會解決房屋問題,如果官員們一覺瞓到大天光,香港人就自己執生,香港官員只不過是負責剪下彩,致下詞,解決問題就沒有他們的份兒,不過又不用擔心,香港人見慣世面,適者生存,更惡劣的情況也面對過,今次並不是很嚴重,今次的問題基本上很容易解決,香港政府不但錯失良機,而且節外生枝,問題是自己搞出來。

       財爺瞓唔著應該問CY,在去年十一月無端端將DSD劃一收15%,當時,其實有不少香港人買了新樓,在入伙後半年必定要將他們的自住單位出售,否則,新樓是很難取得足額按揭,換句話說,二手樓巿場會增加不少供應量,二手樓樓價有望下調,在新DSD之後,地產商出絕招,就是向買新樓的人提供免壓力測試高成數按揭,令到有不少業主借用他們的子女買新樓,由於只需要付15%首期,所以,那些人沒有壓力將自住單位出售,做成二手樓供應大減,打算賣樓的業主都不是急須的,不到他們心目中的要價決不會賣,結果是樓價高企,做成財爺寐食難安原因之一。

      新DSD除了減少二手樓供應之外,還令到買樓收租的人大幅減少,結果是租金上升,財爺寐食難安原因之二,財爺想瞓得著,必定要從供應著手,有足夠供應就可以撤招,市民可以買樓自住,亦可以買樓收租,各適其適,保證財爺可以瞓得著。


是誰令財爺寐食難安
1. 無奈
2017-12-26 19:05
可能從一開始就不應該實施DDDDDDDDD
一但加了,就不會減,誰敢撤招呢?
2. 小女
2017-12-26 19:35
陳茂波先天下之忧而忧、后天下之樂而樂?
3. 真真薯片
2017-12-26 19:47
正苦依家連賣地都要就住就住, 有人補農地地價就減少推官地, 已經話左比市場知正苦唔夠子彈, 其實農地開發時間因為要鋪橋修路所以會比官地長, 以農地代官地, 即使大數冇變, 亦代表中期4-6年部份供應往後推, 5年內落成量更少

正苦冇地, 依家搞緊大論壇, 希望傾惦數再搞農地補地價就唔算係官商勾結, 其實大討論係冇可能抹清官商勾結, 因為官商勾結既關鍵係補地價個價錢, 無論社會有咩共識都好, 當時價過萬蚊呎, 你2千蚊呎比人補地價起樓, 起好後賣萬4, 點都係官商勾結, 除非地價補足市價, 否則官商勾結係點都洗唔甩, 但依家係正苦求地霸補充地價, 冇著數人地點會肯做?所以大討論係浪費時間, 689就醒, 保持尊嚴唔退縮, 林鄭搞補地價, 一個唔小心隨時變貪憎第2, 其實搏唔過
4. 小女
2017-12-26 21:16
陈茂波被市民讽剌!
5. 辣招不撤,樓價不跌
2017-12-26 21:31
真是好笑,本來用來打壓樓市的辣招,反而成為支持樓價的力量。
6. 劏房波
2017-12-26 21:34
大家知唔知劏房波個老婆重揸住幾多間劏房?
7. 1842香港
2017-12-26 23:16
樓值越貴,稅收越多,何樂而不為?
8. 博士粉絲
2017-12-27 09:15
新DSD除了減少二手樓供應之外,還令到買樓收租的人大幅減少,結果是租金上升

博士,呢句有少少唔明想請教下,少左人買樓收租,即係多左人買樓自住,買自住樓市場上亦會少左一位租客,相當於租盤供應同需求同時減少,點解會令租金有上升壓力既?
9. 香港土著
2017-12-27 09:22
似乎越來越多人話樓市辣招導致樓價上升, 理據似是而非. 其實全部都係Hindsight Bias.
10. LC
2017-12-27 09:38
等我試答: 
      因為多人想買,但係二手供應量低,(收開租既賣左買唔返所以唔賣,得一層既換樓換唔成),租得樓既未必有買樓既能力,想買樓而買唔到既都係要租。即係實際要租樓既人 多於 實際買到樓住既人 ,所以租金上升。
11. LC
2017-12-27 09:45
不過另外重有個因素就係香港通帳比較強,最低工資推動物價向上,令到最低工資既受益人只有議員本身,更多人更加難生活。 
12. 真真薯片
2017-12-27 09:52
根本供應嚴重不足就只有升路一條, 出唔出辣招只係令到升市以唔同方式去體現, 咁出左辣招既低成交乾升, 點都好過97式瘋狂摸上摸上摸上摸果種爆升既


13. Bos fan
2017-12-27 14:01
波波點會推冧個市同自己/老婆/ 家人荷包作對. 何況係冇方法
14. 博士粉絲
2017-12-27 16:08
LC兄,我都有諗過,但覺得有少少怪。

收開租既賣左買唔返所以唔賣,即係租盤供應方,佢唔賣繼續收租,咁對租盤供應亦無影響

得一層既換樓換唔成),有自住樓即係唔需要在市場搵租盤,對租金應該無貢獻

租得樓既未必有買樓既能力,假設佢劃一15%辣招前已經租緊樓,辣招後一係佢就夠錢買左個收租盤自住,咁市場上少一個租盤,又少一個搵租盤既需求 / 一係佢更加唔夠錢買樓,繼續租番原本層樓,咁對租務市場需求應該又係無影響

想買樓而買唔到既都係要租。,即係上述另一情況。

如果唔用需求去分析,純粹話因為收租盤業主通常已有自住樓,再買一層收租要比15%,成本重左,所以要收貴啲租去compensate,好似仲合理啲,但咁講又好似太武斷。
15. Joe Wong
2017-12-28 09:40
各適其式?是各適其適..
16. Admin
2017-12-28 10:49
謝謝15樓, 文章己修正。
17. CCL
2017-12-28 11:51
只因越來越多人來港定居,租金永遠都係有升冇跌。
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。