領展舊聞新炒

　　專欄作家利世民（李兆富）入稟控告立法會議員葉劉淑儀誹謗，係左丁山咁耐未見過之奇事。葉劉淑儀回應記者話絕不退讓，大家一於法庭相見。香港打官司係好貴嘅，李兆富係一名中產，身家照睇遠遠不如葉劉，打長期官司嘅大狀費用，都幾咁襟捱，睇嚟李兆富呢次係人爭一口氣，豁了出去，我地做花生友可也。

　　因葉劉指責領展之言論，領展又成為話題，引起不少關於「領展霸權」之討論，大部份責罵領展之言，係領匯第一天上市之前就有嘅嘞，當年領匯上市，搞到司法覆核，反對派贊成派各自上街示威，創下香港IPO歷史。呢啲係舊聞咯，到現在仍然有人鬧領匯改名做領展嘅管理公司，左丁山甚覺無謂，唔通罵領展嘅泛民及工聯會真係可以因此而博得公屋選票？左丁山住私人屋苑，最近之領展屋邨商場係禾輋，禾輋商場及街市由房委會管理年代，秩序比較混亂，廁所污糟，連周圍嘅中學學生中午到禾輋商場吃飯，都不敢進廁所。由領展管理後，成個場唔同晒，目測人流暢旺，商店營業額增加，有乜唔好呀？至於禾輋街市，多年來冇進步，生意不前，與大埔街市嘅旺場狀況，相差甚遠，依家領展話收回街市重新裝修，工聯會沙田區辦事處立即反對，要求裝修前開辦一個臨時街市，其實禾輋邨仲邊度有地方開設臨時街市呀，徵用源禾球場呀？

　　又有人舊事重提，話打破領展「壟斷」，可在屋邨附近物色土地興建房委會商場，優待年輕人創業及優待社企，與領展競爭。喂，做生意講真金白銀，香港庫房雖然充裕，總不能效法委內瑞拉前總統查韋斯，有錢就派，拎錢出嚟津貼年青人及社企開舖頭去蝕本，只有天真之人先至會以為在屋邨商場開舖能夠賺錢嘅啫，好多時只係浪費青春嘅咋。最現實一點，屋邨附近有熟地，政府都要嚟興建「白居二」啦，做乜要起一個屋邨商場在領展隔籬？想房委會孭蝕本重擔，無力興建公屋呀？最新說法係在屋邨內或附近搞網購物流站、流動蔬果車、互助茶水亭，可以擊破領展商場壟斷喎。

　　老實講，此乃書生之見，如果行得通，市場自會出現呢類服務，例如內地淘寶已經嚴重打擊內地商場生意及影響本地零售商之營業額。網購至今仍然未對本港商場租金產生影響，有本港之特殊原因，一旦發生突變，影響不止領展一家。