地產論壇
登入名稱
密碼
頁數:
落錯車的人令到樓價上升
瀏覽人次:26873    回應:24

落錯車的人令到樓價上升

 

湯文亮博士

紀惠集團行政總裁
2017年12月11日

  上星期,花旗出了一份落錯車報告,指出在過去十年,有20萬人落錯車,如果不了解香港地產市場,真的是會嚇死,如果了解就會知道,落錯車的人大幅低於20萬,我相信連一半都沒有,但有一個奇怪現象,就是落錯車的人令到香港樓價上升。

  花旗報告指出,在過去十年,有61萬業主出售他們的物業,有36萬個業主並没有回購,當中16萬仍然持有物業,他們只是變現,不算落錯車,剩下的20萬個業主真的是落錯車,老實說,我不知道花旗動用了幾多人力物力去寫這份報告,但報告的結論20萬個業主落錯車是錯誤的演繹,他們的確是賣走了物業之後並没有買回,但他們並不是落錯車。

  我估計,在過去十年,每年最少有5,000個業主離開人世,已經上了天堂,又怎可能買樓,很多人都話香港不值得留戀,倘若每年有3,000個業主移民離開,他們當然不會再買樓,樓市在過去十年,大多數時間都持續向上,但仍然出現不少銀主盤,我不敢太悲觀,每年2,000個單位總是有的,我相信那些銀主盤業主是沒有能力買樓,他們是被迫落車,就以上述三項計算,落錯車的人大幅減少一半,這還不止,有年老業主賣樓分身家,他們當然不會以自己名義再買樓,另外,有一些業主在賣樓之後表面上沒有再買樓,但他們可以用公司轉讓形式買樓,又怎算落錯車,撰寫報告的人可能疏忽了些少,或者是不了解樓市。

  香港有不少業主的確是落錯車,時間集中在政府推出SSD的前後,當時曾特首話如果政府出招,樓價必定下跌兩三成,不少業主十分相信曾特首能力,所以他們先將自住單位賣走,希望樓價下跌兩三成之後再買回,結果當然是事與願違,但當時他們充滿信心,在樓價下跌之前先租樓自住,由於他們剛賣了樓,大多數都會持有一筆數目不少現金,是極優質租客,其他業主非常樂意租樓給他們,亦令到不少人有信心買樓收租,做成樓價節節向上,我相信未必太多人了解到這個事實,如果花旗的報告題目是落錯車的人令到樓價上升,行內人睇到就知道是一份有料到報告。

落錯車的人令到樓價上升
2. 十一哥
2017-12-11 12:25
賣樓去租樓、市場上就當多咗10萬個租客啦、客多貨疏…諗住最多租兩年又上過車、袋中有銀…心態上就唔介意追貴些少、呢班貴客挾高租金…有大功勞。




3. 真真薯片
2017-12-11 13:32
20萬應該冇, 不過5-6萬可能有

但係交左8年租, 到今日仲有子彈上返車既, 可能得1-2萬
4. 花旗低估落錯車人數
2017-12-11 15:12
根據本人生活圈子親友同事同學沽錯樓的人數,花旗報告只有低估了落錯車的人數。事實上補淡倉的力量,也是香港樓市的一大支撐力量。咁多人排隊平淡倉,樓價如何大跌?
6. Hey gg
2017-12-11 16:26
2018年樓市肯定大跌
7. 湯瑪斯
2017-12-11 17:20
我原本手持兩間物業,在2011年見升值了幾成,賣了其一間,將現金作其他投資。我算不算落錯車?不過話時話,我確是錯過了樓市升值的收益。然而,我現時持有的兩個車位,由購入價每個三十多萬,升至每個九十多萬。我賣樓吐現後又為未來退休作出了一些年金式的儲蓄計劃,現在隨時可以退休。有得有失啦!
8. 真真薯片
2017-12-11 20:00
花旗唔知有冇可能, 攞到晒過去十年所有沽完樓後就一層樓都冇既名單, 果批人如果今日仍然一層樓都冇, 可以假設佢係落錯車

當然, 落左車既人可以係移民, 或者分家產, 或者係有高人指點, 用600萬+數學方程式大包圍買中六合彩或者3T, 或者買左騰信/bitcoin, 不過果條數應該唔係咁大, 打個3折, 20萬當佢得返6萬, 應該只有計少冇計多
9. 貨源歸邊
2017-12-11 23:00
好多人落錯車,而單位更加集中在強者手中。貨源越歸边,楼价更加難跌。
10. 落錯車
2017-12-11 23:53
落錯車的人數,記得加多一個【浪子心聲】。
11. 浪子心聲
2017-12-12 02:10
只識上車唔識落車的人,永遠不能成為一個投資高手,10樓最大的成就就是話人「落錯車」,可悲、可悲!!

只認為上到車才是安全,亦是一種「思想病毒」,尤如早前的「有樓有高潮」一樣,是一種「社會流行病」,同樣道理「落車」一定是「錯」,亦是社會流行病的一種反映,若能看通全局及視野更遠,才能看到機會所在。

中國和香港的未來是「股票市場」,還留戀在樓市這個將會有結構性改變的市場,實在太短視了,還看不到中國政府希望大力發展證券市場,國家會優先讓香港股市行先,大時代在明年中就非常明顯,機會在眼前,當證監殺哂的「細價老千股」後,香港股市就開始全力向上,升到你唔信的時候就來臨,快啲去股市上車啦!!

12. 元朗人
2017-12-12 05:42
現在回頭看邊種投資最好回報,當然個個都是高手,講到變+x哥也不為過。目測二位落了車好友,他們都說買不回賣出了的單位,辣招和單位升值都是原因。他們股齡也有20年+,批評他們渣容乜易。事實上年纪漸增買樓越來越難,搞到咁是信錯政府,行錯一步。
13. 香港土著
2017-12-12 08:51
元朗人,

如果過去十年有人做到主力靠港樓以外資產,但又能夠連續不斷跑贏"樓價連槓桿"升幅,你覺得算唔算好厲害呀?
14. 浪子窮得有道理
2017-12-12 08:54
今天A股指數只比2000年時升了不到5成,但上海樓價比17年前升了最少20倍。磚頭與牆紙,一念之差,天堂地獄的分別。浪子兄,看看你周圍有沒有人是靠炒股發達的?
15. 自我陶醉
2017-12-12 08:57
浪子兄,

做乜鬼投資高手呀? 對一啲只識上車唔識落車嘅人,三萬點先叫佢入市買股票,想靠害咩?

呢度好多人一世都住喺山旮旯,從來未出過城,出世到現在只坐過一部車,而且係唯一可以返到屋企嘅車,識佢哋咁耐都唔知咩? 千祈唔好教佢坐第啲車,其他車一定唔啱路,就算啱路都唔知幾時落車,而且行得太快又會暈浪,仲會炒車。 都係坐番自己熟悉嗰㗎行咗十幾年嘅老爺巴士返屋企好喇,無謂臨老過唔到世。你睇下有啲人,做到高官,生活咗喺香港幾十年,連搭地鐵點樣入閘都唔識㗎,千祈唔好以為係笑話! 

其實住山旮旯唔係錯,最緊要唔好以為全世界得一架車,仲要扮專家教人搭車,以為唔坐佢部老爺車就一定係搭錯車,有時又真係覺得呢啲人幾無知! 幾難頂! 哈哈哈!
16. 自我陶醉
2017-12-12 09:39
14樓

竟然知道就算坐巴士都有好多條線,都算有些少見地啊! 有機會試下坐的士,同飛機吧!
17. 回16樓
2017-12-12 18:46
醒下啦!世上何止有的士飛機,有火箭(Bitcoin)添。磚頭最穩陣乃香港土地經過了多少風浪後發展而成的民間智慧,好難改变。
18. 元朗人
2017-12-13 08:30
土著兄,

能夠連續不斷跑贏"樓價連槓桿"升幅當然厲害,橙鸁可以蘋果也嬴,最弊是普通人的缺點和纪律,很難保持勝果。隔離王弼兄不停買樓(以前他說過九成是樓),閣下認為如何?
19. 孟波
2017-12-13 09:34
身邊有兩個同背景相熟朋友,兩人性格都屬非進取積極甚至有D婆媽型,兩人都曾在市區以40和80萬左右,在90至2000年間置業,兩人在2000年後分別賣了樓賺取倍計利潤,但往後已經没有能力再置業,現在越住越細,賺左嘅錢十幾年間交晒租。
20. 香港土著
2017-12-13 10:02
元朗人,

你的一句"普通人的缺點和紀律",帶出兩個投資要點。

第一,普通人即投資水平一般人士,財商低及紀律差係事實; 

第二,既然普通人投資能力差,於是一窩蜂擁抱同一樣資產,結果就係羊群效應。

至於"固定資產"佔投資組合比例,個人傾向二至四成。但要強調一點,固定資產可以係舖,可以係商廈/酒店,就算係住宅,都唔一定只有港樓。

投資論壇就係要討論投資知識,唔係師奶問冧把式一味買樓,買樓,買港樓。
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。