落注嗰刻已經贏咗

　　長沙灣地皮以172億元批出，地王由鴨脷洲轉到長沙灣，但論每呎樓面地價，鴨脷洲22000蚊，都仲貴過長沙灣17000蚊。這幅地王以市場估價上限批出，但發展商眼中，呢幅地皮一投就賺， 非常開心。17000元一呎，建築成本每呎3000元，豪華一點算你4000元，21000元每呎成本，後面嘅匯璽而家都賣緊23000蚊一呎，以現價計呢幅地已經贏咗，未使計將來升幅。

　　唔會有一個入標嘅發展商估計未來樓市跌，估佢跌就標都唔會入。即係話，中標嘅呢班發展商，先要肯賺少啲，現價都唔會輸，才願意高價入標。他朝樓價再升，賺得更多就更開心。亦即係話，其他落選嘅發展商，唔係對未來樓價唔太睇好，而係想賺得再厚啲，先會出價唔夠人高。一線單獨入標嘅地產商全部落選，表示未來主要賣樓畀你嘅發展商，都係想從你口袋拿最多錢。咁你話，一手市場主導樓價嘅現實下，樓價有乜理由會跌？

中環中心水位點止50億

　　全世界做地產嘅商人都有共通點，就係無寶不落，唔係贏梗嘅唔會落注。落注嗰刻已經贏咗，平民百姓諗都未諗過，以為吹水，但世上就係有啲咁嘅機會，只不過永遠輪唔到你，例如中環中心。坊間雜誌話，中環中心約400億元賣出，留了大概50億元水位畀下手賺。驟眼睇似乎唔錯，但係做傳媒雜誌嘅畢竟係文人，從來未做過生意，莫講話做地產。中環中心點止有50億元水位，識計嘅，嚇死你。

　　中環中心頂層早前每呎52000蚊賣咗，低層就賣咗32000蚊，拉勻計，當中環中心每呎值42000蚊，買家接手嘅寫字樓已經值510億元。仲有402個停車位呢？每個500萬元，呢度又20億元。仲有一層商場，同埋個大廈命名權、管理權呢？加加埋埋，買番嚟嘅中環中心，其實接近值550億元。400億元成本，一買已經賺150億元！仲唔係落注嗰刻已經贏咗？你要佩服嘅，係加入到財團嘅買家，有本事坐埋分一杯羹，分享一單必賺嘅大交易。可以同央企一齊買嘢，份份文件要拎去北京批，你估容易？一買就贏係好常見，只係你嘅高度睇唔到。