香港對業主最友善

　　公屋是否封頂80萬間？以後政府目標就係幫人買樓？唔理係綠置居，白居二，還是首置上車盤，政府就係想香港人買樓，這是否政府學新加坡嘅香港版？對於政府嚟講，愈多市民係業主，社會愈穩定，因為供緊樓嘅人係最逆來順受，人生最驚就係冇咗份工。營營役役嘅人，最唔會搞搞震。有冇睇《逆權司機》同《逆權大狀》？本來為錢生活嘅人，最後錢都唔要，一心求公義，豁出去，係天不怕地不怕。而家嘅年代，好少人窮到冇飯開，一般人唔會怕冇錢開飯。唯一會驚嘅，就係買咗層樓，一身債，咁就會驚冇錢。人人做業主，最好就係年輕人個個打工供樓，咁就好似每個人都植入咗個微型炸彈，想唔乖乖地聽話都唔得。

　　雖然政府要人買樓可能別有用心，但弊在响香港要保護財富，冇嘢比買樓更安全同老定，全世界只有香港樓最能夠保護財富。雖然其他地方例如溫哥華都係年年睇住樓價上升，但全世界只有香港係最錫住業主，直情等同受保護動物。溫哥華有物業空置稅，香港冇。澳洲唔淮外國人買二手樓，買就買新樓。新加坡，外國發展商起完樓要响時限內賣晒，否則罰錢。

　　至於租金管制，德國奧地利都有，唔容許你任意加租。台灣，租金回報一厘都冇。全世界只有香港係對業主最友善，就算冇得炒樓，買樓儲存財富，羨慕死唔少外國業主。

　　只要香港仲係嚟住嘅人多過真正離開唔住嘅人，買樓幾時都係啱嘅機會大過買錯。記住，係真正離開唔住，並唔係諗起想走嘅人。想走嘅人大把，個個都話香港變咗，唔住得人，但係有資格走同真係坐言起行嘅人又有幾多？唔好話要走都唔容易，實際上你就算有錢，世界上唔多地方畀你走去住得happy。