地產論壇
登入名稱
密碼
頁數:
嚴迅奇攞獎
瀏覽人次:16939    回應:1

嚴迅奇攞獎

 

左丁山

2017年11月2日

  因不用投標而獲委任為西九故宮博物館建築師嘅嚴迅奇,曾飽受非議。唔少行內人話,即使要投標,要競賽,嚴迅奇憑佢本身嘅實力及個人名聲,贏得合約嘅機會都十分大,但林鄭月娥作風強悍,為向中央交差,係要顯示女強人作風,直接委任嚴迅奇,於是嚴迅奇陪佢捱背後之箭。


  嚴幾星期前,在沙田馬場沙圈碰到黃毓民,毓民係標準馬迷,經常在七樓遴選會員廂房出入,與柱哥(何世柱)或張議員(張宇人)一齊跑馬,所以佢在馬場嘅衣着比以前在立法會開會時更加「合規」,毓民曾在珠海學院執教多年,新聞系不少學生跟過佢學習,佢做議員時,極力為珠海向特區政府爭取地皮興建珠海新校舍,後來珠海爭取成功,在屯門青山路興建新校舍,上次在馬場沙圈,左丁山問過佢:「新校園起好未呀?」毓民話:「起好嘞,好靚㖭,我有一份功勞㗎,不過現在學生會想請我返去演講,珠海校方都唔批准,你話幾感慨呢!」


  左丁山初時唔明白點解珠海學院禁止黃毓民回校演講,後來先至醒起珠海股權已經易主,現時由海航集團控制,正所謂染紅咗,由傳統掛青天白日旗改為掛五星紅旗,毓民想返去,梗係被拒諸門外啦。


  前幾日有新聞報道,珠海學院新校舍會獲得香港建築師學會頒發「全年境內建築大獎」,從63個參選作品中脫穎而出,建築師係邊位?咪就係嚴迅奇囉,據講珠海學院外形新穎,已成為屯門青山灣地標,不少人慕名前往拍照。正是沒有地皮,哪裏有校舍,建築師為珠海增光不少,但以往有份力爭地皮成功之人,今日只可做門外路人甲!


  嚴迅奇當然知道地皮得來不易,香港普遍缺乏地方興建住宅、大型校舍及工商用設施,嚴迅奇話有人提議搬遷葵涌貨櫃碼頭,改建住宅,但佢認為此議較長遠,有排未成事,不如直接在貨櫃碼頭上起屋,會較為快速可實行!以前工程師周明權就首先講在貨櫃碼頭上蓋建屋,一般反應平淡,估唔到建築師嚴迅奇亦同意周明權之言,即係話建築師與工程師皆認為可行!但有一位建築工程師話畀左丁山聽:「可能好多人已經忘記咗屯門內河碼頭,嗰度有65公頃土地,現時使用率偏低,對香港經濟貢獻比貨櫃碼頭細好多,其實搬走內河碼頭,地皮用來起樓更加適合!」

嚴迅奇攞獎
1. 十一哥
2017-11-02 11:21
珠海唔染色…有冇機會升格攞地呢? 好多人識富豪於微時…人地風生水起後…就四圍吹以前着埋一條褲。


頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。