展商可以趁機拿拿聲賣樓

　　恒生指數收報28692點，升216點，成交1032億元。盛傳長實（01113）以402億元出售中環中心75%業權，破盡全港紀錄，股價昨日微升2.6%。早一個月先至話中央禁止中資走資投資房地產，反而十九大都仲未開，而家可以咁高調用破紀錄價買寫字樓，呢個財團一定要係央企級數，而且寫字樓必定要係認定為具備戰略價值，兼且要穩賺不賠。據說財團包括港資在內，要留意邊個港資有份。中環嘅資產一直係改朝換代嘅指標，只要中環愈賣愈貴，無論邊個賣都唔可以視為睇淡未來嘅先兆。

　　按照林鄭月娥接受訪問時所講，佢對「首置上車盤」係有諗法，只係唔想由佢响《施政報告》主動提出，反而想係由社會要求，咁佢就唔會孭上官商勾結之罪名。

　　首置盤要攞地，又要唔影響公營房屋供應，只可以向發展商嘅土地儲備埋手。無論你用地價補貼，又或者地積比率放寬，甚至係用公帑起多條路，都有機會引起社會反對。尤其是呢類土地全部都响新界，新界就正正係利益錯綜複雜，過去幾年最有利益輸送嫌疑嘅集中地，由佢親口提出任何方法去攞地起首置盤，都係死路一條。如果由土地供應專責小組同城規會開路，咁佢只係順應民意，做又得唔做又得。

　　林鄭貴為香江第一能吏，如何令自己唔會負上任何政治責任，爐火純青，唔會急於求成，最緊要水到渠成。之前3個特首，一係亂做，一係乜都唔做，一係就好做唔做。只有呢個，識得可做可唔做，以今日香港嘅政治環境，係咪最適合市民？

　　講明補地價都唔會提供優惠畀地產商，要視乎什麼叫優惠。起條新路，鋪多條水管，係便利市民，唔係益地產商，但係基建配套改善，幅地可以起多啲樓，就算要補多些少地價，地產商可能仲賺多啲。政府只係負責基建，地積比率由城規會批，地產商補地價冇優惠，部分樓宇劃作「首置上車盤」，政府冇畀過地產商一分一毫利益，但地產商從市場爭取到較大利益，冇人可以捉到任何口實。「首置上車盤」係未益中產先利地產商，必定係事實，否則一啲甜頭都冇，公私營如何合作？

　　《施政報告》未有首置盤嘅細節出台，讓發展商可以趁機拿拿聲賣樓，儲齊子彈，睇定首置盤細節再出招。地產商賣樓，條數永遠都唔夠佢計。