地產論壇
登入名稱
密碼
頁數:
倘若耶倫宣布量寬
瀏覽人次:23117    回應:10

倘若耶倫宣布量寬

 

湯文亮博士

紀惠集團行政總裁
2017年9月25日

  美聯儲局耶倫確認縮表,雖然是意料中事,市場上反應似乎沒有什麼特別,大多數評論員都會說,縮表對樓市沒有影響,其實,他們說沒有影響即是有負面影響的淡化說法,而老C更加話縮表令到股市樓市進入更大時代,因為不少基金是跟隨美國政府買債,美國唔買,他們也不買,資金將會投放在股市樓市,令到股樓將大幅飆升,其實我並不明白箇中道理,於是我用反證法來求證。

  倘若上星期耶倫宣布的不是縮表,而是新的量化寬鬆政策,評論員又有何反應,一般評論員會不會說量寬對樓市沒有影響,我相信一定不會,他們會非常雀躍話美國重啟量寬,即是再開始印銀紙,香港樓價唔升都唔得,既然量寬令樓市上升,縮表點解又不是令樓市作出調整,其實毋須量寬,只要耶倫話擱置縮表計劃,絕大多數評論員都會一面倒唱好樓市,所以,我認為他們今次的評論不夠中肯。

  相比老C,那些評論員已經相當含蓄,因為老C話縮表令股市樓市進入更大時代,倘若量寬,老C又怎樣說,會不會話基金因為跟隨美國政府多買債券,導致投放在股市樓市的資金不足,而令到股樓市場出現大調整,進入更大的春秋戰國時代,即是更大春代,老C一定不會這樣說,他將會比所有評審員更加雀躍,美國佬印銀紙,唔識分析的人都知道股樓將會受惠,根本毋須做分析,老C如果真的是這樣說就會令我相當迷惑,因為縮表令到股樓上升,量寬又是同樣上升,這是現代版的矛盾論,而事實上,縮表與量寬一定會令到市場有不同反應,如果縮表令股樓上升,量寬就會令到股樓下跌,而美聯儲局的量化寬鬆政策早已令到資產價格不合理地上升,所以耶倫才會提出一個要貫徹執行的縮表時間表,如果將縮表演繹為利好消息,一定要有出人意表理據和異於常人膽量才可以做到,我自問沒有資質及膽量,只能平鋪直敘話縮表對樓市有不利影響。

倘若耶倫宣布量寬
1. 博士粉絲
2017-09-25 09:09
哈,老C呢局玩到咁大,如果唔好彩真係調整,佢招牌都比入拆埋都似
2. 真真薯片
2017-09-25 09:21
老C對上一個招牌預測係09年, 老C預言樓市進入冰河時期, 仲有埋實際行動去cut分行

不過老C叻在轉軚極快, 轉過頭立即請返晒d人, 而且完全唔會怕羞, 呢樣博士都要向老C學習
3. 點到即止
2017-09-25 11:09
如果QE令到股票同樓市大通脹
咁縮表其實係反其道而行, =股票同樓市通縮
個人睇唔到乜嘢理由, 任何政府想搞一個大通縮出來.
所以縮表使資產停止過熱係合理嘅期望, 但係我認為耶倫會點到即止.
4. 博士粉絲
2017-09-25 11:57
其實,QE係輸出型通漲,即係美國本土唔會點升,海外熱錢先勁多,中國,香港,新興市場比輸出型通漲扯高N倍通漲,樓價更加係。

而家通縮亦可以係輸出型通縮,其實只係收番海外熱錢,美國本土價格可以唔點沃,但中國,香港,新興市場熱錢一流出,大檸樂加大春代。

中國,香港或許能承受沖擊,新興市場就難講,尤其實是如果匯率大跌,以前貪美元平借左美元債既當地企業即刻破產都似,因為相當於債務大升,好難還,之後到成個國家破產。

陰謀論講,我覺得美國唔care輸出性通漲/通縮,搞掂啲新興國家(什至搞掂埋中國),可能美國仲開心。
5. 十一哥
2017-09-25 13:48
由ip8銷量…睇到世界變、以前美佬唔buy…就實咔街、而家老表唔high…攞到iP要四圍翳、鴻海美國設廠…造幾多美國佬實食唔哂、又咪要翳老表幫趁番D、又一再説明莊閒執過位、老郭呢單deal冇乜風險、佢衹係枱面嘅打荷、呢種代工廠嘅投資…大部份係由客睇數嘅 !


6. 向引刀‧土著‧自醉‧浪子‧阿井 說不
2017-09-25 16:42

聯儲局終於決定,由2017年第四季開始縮表。有人說,縮表將對金融市場帶來重大衝擊,甚至可能發生災難。我覺得這種說法有點危言聳聽,出現的機會應該不高。


現實是聯儲局在2014年10月已停止QE,但一直仍有用債券到期收回的錢繼續買債,沒有從市場抽走資金。可見聯儲局行事極為慎重,謀定而後動,目的就是不想對金融市場造成衝擊。


聯儲局觀望了三年,覺得經濟已復甦得不錯,有能力承受得起縮表的負面影響後,才付諸行動。聯儲局說得很清楚,縮表的目的是要令貨幣政策正常化,絕非要引至市場動盪。此之所以,縮表會循序漸進,一旦出現亂子,聯儲會隨時調校縮表速度,甚至可以暫停縮表。因此,出現災難性結果的機會很低。


聯儲局之所以要縮表,是因為之前QE的時候把資產負債表弄得太大了,現在要把它縮回合理水平,才能正常化。為了令讀者明白甚麼叫縮表,必須從QE開始講起。


美國的次按危機引發金融海嘯後,聯儲局為了挽救美國的銀行與保險系統,決定大量向市場注入更多的資金,推行量化寬鬆政策,即QE(Quantitative Easing)。具體的做法是由聯儲局出面,在市場上大量買入政府與企業的債券,以及用樓按作基礎的證券;在開始的時候,甚至有買入過一些企業的股票。這樣,銀行與保險公司才不致倒閉,政府才可以照常運作,而房地產市場亦不致崩潰,經濟才可以逐步恢復元氣。


聯儲局買入的債券與股票,就會被視作持有資產,就可以按擁有的資產值來發鈔;買債買得愈多,可以增發的鈔票亦會愈多。在這種機制下,聯儲局的發鈔能力是可以無限的。只是若果發鈔的速度快過經濟增長的速度,市場上新出現的貨幣就會多過新增的財富。在這種情勢下,資產價格就會飆升,貨幣就會貶值。因此,聯儲局必須趁QE的後遺症出現之前,迅速把貨幣政策正常化,那就要縮表。


在金融海嘯之前,聯儲局的資產負債表約在9000億美元左右。QE後,聯儲局不斷買債與發鈔,令資產負債表增至4.5萬億美元水平,是海嘯前的五倍。現在聯儲局要縮表,做法就是在每月有債券到期,聯儲局在收回現金後,不再是全部用來買債,而是會少買一部分,把剩下的現金拿來註銷。這樣,聯儲局的資產負債表就會逐步降下來。


按聯儲局的計劃,縮表從2017年第四季開始,先是每月少買100億美元的債;到2018第一季,每月少買200億美元債;到2018年第二季,每月少買300億美元債;到2018年第三季,就每月少買400億美元債;到2018年第四季,每月少買500億美元債;合起來是300億+600億+900億+1,200億+1,500億=4,500億,佔原先45,000億資產的10%,比例不高。尤其是在開始時,每月只少買100億美元,只佔總資產的0.2%,真是少到不容易感覺得到。


再者,聯儲局只是待債券到期後才收回部分現金,並沒有把未到期的債券拿去市場拋售,對市場的衝擊應該有限。
 

7. LC
2017-09-26 05:52
美國加息同埋縮表其實都係同一套動作,就係想世界既美金缺乏,沖擊各國經濟,打刧全世界,情況大概就似,錢行發D信用咭比D大學生,等佢地有噤大洗噤大,到佢地習慣左洗左既時候,就收返晒你D credit , 等個大學生不停還高息,噤美國自然唔洗做都有錢收,情況亦似賣白粉果個開頭係唔洗錢比你,之後果D就要你成世噤比。

    問題係97 之後全世界都知美國 E 一招,由其係香港對樓市借貸既管制,中國都預左,所以我諗今次美國再用同一招既成效會有幾大?香港對既係美金,而RMB 亦都可以換美金,大家唔見大陸之前大手大手係香港買資產,我深信有穩定香港資產價格既用處 ,不境香港係一個RMB發圍既重要棋子,如果香港做唔到一個水塘既效果,而資金大量流走,對RMB 國際化進程會係一個大問題。我相信好快就有更多留住資金既點心bond ,長者bond ,大陸本身利息就高,美國要縮表同加息加到同大陸同一個地步我諗美國會好多公司要同時縮皮閉門。就好似香港噤,如果不停加息,唔好話業主死,做生意既人既收入都比晒利息,你諗下會點。

    所以香港/大陸政府係唔希望樓會急升,但係都唔會希望樓價向下跌,林鄭講既係,推出好平既住屋等青年人改善收入之後再買私人樓,而唔係話等供應量大之後再轉私人樓,可見政府係唔想樓市跌,因為經濟唔好對政治更加無利。

     縮表既同時美國既金融大佬會四周打劫,我諗佢地唔會直接攻擊香港同大陸,一定係搵D屎D既國家先,萬一其他亞洲地區既物價因為美國縮表而變得好低,噤就會影響大陸同香港既競爭力。到時大陸亦只有令RMB 幣值向下。我諗E 個影響係比加息更加影響樓市,其實加到4息,我相信都唔會令人供唔起樓,最壞既情況係經濟唔好,噤息多同少都係死路一條。
9. LC
2017-09-26 06:06
今日同 97 比,供斷物業既比率其實達 2/3 之高,即係股市既貨源歸邊,如果唔係同財仔借,你都唔會借到超過一半出黎再借錢,所以大量平盤出現既機會我諗唔會多。對於樓市向下,我估唔會多過 3 成。郊區可能大獲D。因為如果大陸要救市,錢一定係旅遊區同金融區發放。
10. 打工仔 Andy
2017-09-26 08:37
損人利己的事老美十分樂於做!
11. 香港土著
2017-09-26 10:08
根據某種理論,港樓萬佛潮吹水多到唔恨,美國佬點損人利己都好,港樓照升。
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。