地產論壇
登入名稱
密碼
頁數:
首置增加供應,會否推冧樓價?
瀏覽人次:11152    回應:3

首置增加供應,會否推冧樓價?

 

方卓如

2017年9月18日 (信報)

  會德豐搶先表示對公私營合作有興趣,講到明大埔洞梓項目可以配合首置上車盤,證明呢個計劃未益中產之前,先令地產商受惠,搶住參與。

  公私營合作,城規會過關可能容易啲。公營部分補地價可能少啲,但係建築成本同私樓相近,咁賣公營樓嘅一部分撇除地價,賺嘅比率可能仲高過連同補地價嘅私樓部分。在農地上用建築成本起樓再賣,梗係好賺過農地補地價再加建築成本攞去賣,條數好易計。

  公私營混為一體,首置會唔會推冧同一地盤嘅私樓?唔會,你睇吓康怡康山就知。康怡係私樓,康山係居屋,康山位置比康怡仲好,又近太古城,又近港鐵站,但係康山嘅價錢整體係低過康怡,始終係居屋。

  發展商以前唔介意居屋私樓一齊起,而家又點會介意檔次高一級嘅首置與私樓共存?只要首置起細啲,裝修簡單啲,加上政府唔俾你市場轉讓,首置係唔會完全吃掉私樓購買力。加上有首置做籌碼,規劃較易過關,仲有首置人士帶旺本來係農地嘅偏遠地區,方便引進配套設施,賣樓比純私樓項目更有勝算。

  發展商嘅腦筋,論創新未必夠新經濟,但論銷售策略,香港地產商全球第一,淨係睇吓咁多買樓折扣優惠令你唔買唔得,就知道發展商計過嘅數,永冇死錯人。首置最叫人興奮嘅,唔係無殼中產,係持有大量土地儲備嘅地產商。

  首置增加了供應,會否推冧樓價?首置本身係唔會,因為首置嘅對象係從未買樓同冇首期嘅中產,佢哋唔係私樓嘅潛在買家。但係公私營合作,與首置同一地盤嘅私樓一齊推出市場,等於私樓因為規劃較易過關而供應稍增,咁就對樓價有影響。每年多咗一手供應,總有啲用合理價開盤去貨。

  但係樓價不再大升,唔代表地產商賺少咗。建築成本其實已經係一個固定數目,有升冇減,問題係地價多少,先決定樓盤可以賺多少。假如公私營合作令城規較易過關之餘,補地價部分有優惠,就算樓價沒有飛升,地產商利潤唔一定少咗。價錢賣得唔高,成本低咗同樣可以大賺。換言之,計嚟計去,首置點計,最開心都應該未輪到中產。你見最近本地地產商嘅股價,已經反映咗市場都係同樣想法。

首置增加供應,會否推冧樓價?
1. 腥港人
2017-09-18 15:11
唔怕比地產商賺錢,就怕唔夠貨,首置其實係私人參建居屋嘅變體,只係用發展商農地起啫,如果政府夠膽開放比發展商收丁屋重建起樓,一樣可以起到
2. 路過
2017-09-19 15:38
首置增加了供應,會否推冧樓價?首置本身係唔會,因為首置嘅對象係從未買樓同冇首期嘅中產,佢哋唔係私樓嘅潛在買家。

????

寫個個係咪發緊夢? 知唔知宜家既新盤(特別提供8成以上借貸上會)買家,首置客佔左幾多?  根本宜家新盤既TARGET就係呢班你所謂既"未買樓同冇首期嘅中產" 

不過不得不認同一點就係"呢個計劃未益中產之前,先令地產商受惠"
但如果計畫得宜,相信係WIN WIN WIN局面

1 WIN: 政府解決香港住屋所引申一堆既社會問題,什至政治問題
2 WIN: 香港人居住問題,降低及鎖定居住成本
3 WIN: 發展商因近年地價急升,從而增加需補地價發展項目既風險
3. 引刀一快
2017-09-20 03:01
依家借埋老竇間屋去“首置”個班健力士創造者,有得揀你估佢揀邊樣?
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。