地產論壇
登入名稱
密碼
頁數:
樓市呈現一氧化碳,二氧化碳的現象
瀏覽人次:21495    回應:17

樓市呈現一氧化碳,二氧化碳的現象

 

湯文亮博士

紀惠集團行政總裁
2017年9月13日

  有化學副教授涉嫌在兩年前以一氧化碳殺害妻子及女兒,現在被警方起訴,我非常佩服警方鍥而不捨精神,今次並不是天網,而是警網恢恢,疏而不漏,有老友問我一氧化碳究竟是什麼,點解會咁毒,其實,一氧化碳是沒有毒,只不過碳在燃燒期間耗盡空氣中氧氣,令人窒息而死,就好似沒有足夠食物令人餓死一樣,並不能夠說是毒死那人,香港人燒碳,日本人利用汽車死氣喉自殺,並不是一氧化碳毒死他們,而是氧氣不足,窒息而死。

  有老友知我講乜Q都可以涉及樓市,佢話今次我應該唔能夠用一氧化碳講樓市,我話何只一氧化碳,甚至二氧化碳都可以,如果樓市在正常的情況下,買樓的人要付最少四成首期,樓市的危險程度不高,但現在新樓盤全部都提供免壓力測試八成至八成半按揭,這種做法會令到樓市出現一氧化碳危機,開始氧氣不足,但一氧化碳特徵是無色無味,受害者是感覺不到,不過,當他感覺到頭暈時已經是回天乏術,樓市也是一樣,現在大家都感覺不到樓市有危險,但當利息上升,經濟環境轉壞,市民收入減少,現在採用高成數按揭的買家供款出現困難,當他們頭暈時表示樓市已經出現危機。

  有老友問樓市的二氧化碳又是怎樣,應該是非常安全,他說得沒有錯,現在買二手樓的人大多數要付五成以上首期,本來是很安全,但有一些人在落訂之前並沒有預先獲得銀行批核,落訂之後未能通過壓力測試,得不到所需要的按揭貸款,最後唯有放棄訂金,到那時,那些人會發覺他們打算買入的物業好似固體化的二氧化碳,一不小心,連手掌塊皮都會被扯下,好似買樓不成,被迫放棄訂金一樣,有人問我,如何搵到固體化的二氧化碳,很簡單,問雪糕佬攞塊乾冰就是了。

樓市呈現一氧化碳,二氧化碳的現象
1. 真真薯片
2017-09-13 09:04
發展商包按的確係劇毒, 不過毒性最快要3年後先至顯現, 第一批食劇毒既人係2015年底既新盤, 例如世宙, 不過當時唔係咁多人食, 直到今年既新盤劇毒先至成為常態, 不過呢批人要2020先至毒發, 依家仲非常健康

不過劇毒其實有解藥, 就係樓價再升4成, 依家賣萬6, 7蚊呎既新盤, 3年後如果銀行估到2萬4蚊呎, 就可以解毒, 暫時睇似乎冇乜可能, 不過幾年前CCL 11x果陣又有幾多人估到今日係160?
2. 舍神
2017-09-13 09:53
「一氧化碳是沒有毒,只不過碳在燃燒期間耗盡空氣中氧氣,令人窒息而死」

錯得太過份了.....
正確的係血紅素會同氧氣結合, 去到身體各處就會180度.....同氧氣分開, 提供氧氣給細胞享用。

一氧化碳是最ideal毒藥, 無色無味無臭! 因更易和血紅素會同結合 (防止它和氧氣結合),而且仲係咬實唔放那種!

沒有了血紅素,結果血液失去帶氧功能.........最後細胞缺氧而死!

中毒者初期只是昏昏欲睡.......最後失去知覺, 一睡不起...

順帶一提, 中一氧化碳死, 會死得好靚, 面色紅潤!


另外, 例如一個小朋友用膠袋包實個頭, 是好快窒息而死的, 其主因反不而不是缺氧,而係二氧化炭毒死佢, 因身體變酸而死!
3. 博士
2017-09-13 10:41
我絕對明白,我只不過用作比喻,大家千祈唔外咁認真,要用簡單而又令大家都明白的例子真的很難,現今社會,知道是不值錢,上維基,百度一下,什麼也知道,所以,大家當故事聽便算了,
4. 再生療程
2017-09-13 10:58
發展商包按的確係劇毒 > 發展商明益你, 每廿年左右發一發作, 在再生療程後, 平價囤番之後廿年要嘅面粉? 
5. 香港土著
2017-09-13 11:27
薯片兄,唔太明白為何要三年後先毒發... 大環境惡化的話,班weak money就最易出事,唔使等三年發展商開始收高息就已經失業,供多供少都冇關係,手停樓停。
6. 真真薯片
2017-09-13 12:17
包按照盤頭3年係比正常利息, 可以理解為無毒, 3年後加息, 5年後再加息, 算係毒發

首3年內比緊正常息而你自己失業供唔到, 係你自己有問題, 唔係個供款plan既問題, 所以個plan本身係3年後先毒發, 邊個知3年內經濟環境會唔會轉差? 唔轉差反而向好咁點?2015年底係d人對經濟睇好定睇淡? 
8. Johnny
2017-09-13 15:31
"一氧化碳是沒有毒"
博士are you serious?
9. BALL
2017-09-13 15:51
一氧化碳係有毒氣體應該算是常識,上科學堂時老師都多數會講起。真係意想不到啊!!!
10. 一氧化碳是沒有毒
2017-09-13 16:05
視乎你點 define 個毒字, 不過博士係啱, 因為 CO 作用機制係在細胞層面造成缺氧, 而唔係其「毒」瓜你, 所以唔需要過份認真, 但又可以越辯越明。當然有人可以為坳而坳, 造成缺氧都係毒嘅形式, 咁佢可能要解釋一下, 一個膠袋, 一張保鮮紙有幾毒。
11. 香港土著
2017-09-13 17:05
薯片兄,博士所講有兩點,第一係高成數上會班友係weak money,抵抗力差; 第二係加息縮表市民搵少左(即係弱者失業/強者冇bonus)。意思係兩個因素加埋就會有危機。

你一跳去左講d高成數plan本身有咩特徵,我唔明所以問。你解析完我就知你跳左去邊喇,原來唔係講緊博士個point。
12. 引刀一快
2017-09-13 17:27
我聞說有凍肉商,會用一氧化碳處理鮪魚,令肉質長時間保持鮮紅,延長賣相有效期。


13. 引刀一快
2017-09-13 17:31
To 1樓 真真薯片兄

2016年,有好些大好友,唔敢估118呢。

不利形勢一直存在,最重要係工資冇相應增幅,物價又貴,咁食飯緊要,還是自置物業緊要先?
14. 真真薯片
2017-09-13 20:44
可以推動樓價升既, 一係收入, 二係借貸, 三係外來資金, 當然借錢係要還, 二又借變返一同三

依家樓價對收入黎講係過高, 不過深圳樓價同收入比例比香港更高, 咁當然係唔正常, 重點係內銀去庫存狂放水

所以就算香港人收入唔升, 港樓都唔一定爆, 要睇19大後大陸仲放唔放水, 阿爺成日講話會收水, 老老闆實實, 佢講收水講左3, 4年啦, 去貢杆, 回歸實業吖嘛, 聽到我都識背, 事實呢?收水原來係間唔中放水速度減慢就當收水, 一話去庫存就幾個月內掃高樓價五成, 收水快定放水快? 唔係睇新聞稿, 睇騰信股價同共享單車投放量仲準, 據報導北京共享單車投放左200幾萬架, 多到阿爺要叫停, 放水定收水? 在下唔係話阿爺一定有放冇收, 如果收水, 股市必要唔惦, 當大家睇到騰信暴跌, 先去唱港樓有危機其實都未遲, 依家唱淡, 可能好似A東同B東咁, 比人笑到面黃都未跌
15. 香港土著
2017-09-14 06:47
薯片兄,就算如你所講捕得到個tipping point,我怕到時放一年都未必甩到一半樓。
16. 零售業反彈
2017-09-14 07:46
新界區舖位租金錄得強勁升幅。本月至今大埔、元朗、荃灣及葵涌等地區錄得至少6宗舖位顯著加租個案,加租幅度介乎25至67%,當中包括連鎖珠寶金舖及酒樓進駐街舖個案。

綜合市場資訊,近期新界區加幅最勁街舖,相信是元朗福德街18至36號B座一個面積約1,300方呎地舖,以每月約15萬元租出,較前租客證券公司月租9萬元,高出6萬元或67%。據悉,該舖2010年每月租金僅約4.7萬元,2014年才升至5.5萬元。
17. 舍神
2017-09-14 12:19
明白, 講故唔好駁故。 
不過,也應盡量不要偏離事實太遠。
網上知識真假難分,力之所及的話,力求資料準確也是應有之義。

博士加個 remark那便更好!
18. 引刀一快
2017-09-14 17:42
真真薯片兄

共享單車已經進入收皮階段,你以為仲係阿爺見太勁叫停?係因為損耗太厲害,但係已經成為國家面子工程,所以一面扶一面撳,怕最終擠提。投放量同現役可用車輛比例冇人去做調查,我眼見就一定差得遠,投放人力去揾車,排車,幾個品牌鬥免費,全部離盈利遠得很,呢樣嘢作為經濟指標的話,仲恐怖過我成日講嘅大浪。


頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。