地產論壇
登入名稱
密碼
頁數:
現在買樓的人是有所要求
瀏覽人次:23465    回應:7

現在買樓的人是有所要求

 

湯文亮博士

紀惠集團行政總裁
2017年8月11日

  近月住宅樓宇成交量偏低,尤其是在二手樓方面,指數公司話由於業主持貨力強勁,非到他們心目中的價錢是不會賣,所以,樓價仍然有上升空間,但我有位朋友,他買入另外一個住宅單位,打算放售原有的自住單位,他只有半年時間完成這個程序,但已經過了三個月,仍然乏人問津,甚至沒有買家還價,他自問放售的單位位置不俗,樓層又高,而他因為避免要繳付15%印花稅,可以低市價3至5%出售,但在樓價以及樓價指數屢創新高之餘,點解他的單位連睇樓的人都不多,樓市究竟出了什麼問題?

  樓市沒有問題,是物業代理有問題,他們將大多數打算買樓的人介紹買新樓,因為地產商不會反價之餘,又願意付高幾倍佣金,令到買二手樓的人大幅減少,而買二手樓要付足夠首期,買新樓就只需要付15%便可以,以一個可以攞500萬做首期的人來說,買二手樓只能夠買一個1,000萬單位,買新樓則可以買2,500萬,結果是新樓集中了大部分購買力,換句話說,二手樓巿場是供過於求,打算買二手樓的人就變成天之驕子,他們在買樓的時候是有所要求。

  以我的朋友為例,他打算放售的單位位於20樓,但有準買家在睇完樓之後話如果在28樓以上,他一定會買,我覺得他說的是廢話,在睇樓之前,已經知道那個單位是在20樓,另外一次,有準買家打算還價,但他已經有住宅物業,於是要求我朋友替他繳付15%印花稅,仲話這是現在的慣例,全部地產商都會這樣做,我朋友當然沒有理會,由此可見,現在樓價指數屢創新高是有理由,因為買二手樓的人是有所要求,能夠賣出的單位大多數是優質單位,不過,不少人認為樓價上升,他們擁有的自住單位亦水漲船高,這點我不反對,如果他們能夠將物業順利賣走的話,就會知道事實是殘酷的,而事實上是優質單位做成樓價指數屢創新高。

現在買樓的人是有所要求
1. 十郎
2017-08-11 09:55


      有冇諗過 , 點解印度無端端進入中國的洞朗地區 , 又遲遲不開打 ?

      繼續諗下 , 點解北韓無端端挑釁核武攻擊關島 ?

2. 引刀一快
2017-08-11 10:08
二手賣家一樣可以俾多幾點佣,仲可以俾獎金,不過要偷偷地。
3. 真真薯片
2017-08-11 11:01
依家二手創新高成交有兩種

一種係距離400同600萬按保界線有距離既樓, 例如500萬樓, 創新高以550萬成交, 所需要比多既首期唔超過廿萬, 只要銀行同按保公司估足價, 就有條件創新高

另一種係超優質單位, 買家比得起500萬以上首期, 遇上心頭好願意創新高價買入, 呢d當然係真豪宅居多
4. 博士粉絲
2017-08-11 11:02
打算買二手樓的人就變成天之驕子,他們在買樓的時候是有所要求。

成交量少到咁,但報紙經常報零議價,減3 - 5%,但市價成交。

究竟係盤源少啲,定係買家少啲?
5. 鳥5
2017-08-11 12:51
唉!見9左頂啦!只係慢落啫!一手主導啦!睇下地覇HO[D住臨介點供應時段,5會 托太長時間,不境係幾個家族,5係一個家族,有行家出,就要跟。。儲地好過儲現樓呀!條數好計呀!息都平D啦!你5食湖自有人食架啦!每年做條靚數,下年轉玩平買平賣,都係生意呀!。。5通等個個套晒現,最後先自已出咩!睹甘大,吹就得。。。船大皮費呀麻
6. 鳥5
2017-08-11 12:58
下年橫睇直睇,新買家論實力,論瘋狂。下年出貨氣氛差過今年呀!見左頂㗎啦!林鄭都冇乜點多9事事表述!似胸有成呀!
7. 十郎
2017-08-11 13:27


      邊有咁多無端端吖 ! 有冇諗過 , 點解自己無端端多咗咁多銀 ? 借番黎㗎。低息呀 ! 奀豬媽講過 , 更低息都要還 。我欠銀行十萬八萬 , 加到十厘都好閒 , 借1000萬買新樓 ? 加到5厘就爬街啦。

頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。