地產論壇
登入名稱
密碼
頁數:
敦一敦,好過食雲吞
瀏覽人次:27952    回應:16

敦一敦,好過食雲吞

 

湯文亮博士

紀惠集團行政總裁
2017年7月7日

  大家睇到這個題目,可能會一頭霧水,如果我話是林太上任第一招,大家更加一頭霧水,其實,這是打天九術語同策略,在打天九時,莊家首先出牌,如果他不是有機會攞到七枝八枝,就要出天或者九,術語叫「敦」天或九,因為打天九除了要結牌之外,更加要避免一棟都冇,而結牌要有一個條件,就是最少有兩棟才可以結牌,所以,莊家敦天或者敦九,除了不會一棟都冇之外,還可以有機會結牌,以前黃枝記老闆打天九時敦天或者敦九,他會說,敦一敦,好過食雲吞,順口溜,沒有特別意思。

  林太上任只不過第三日,已經去立法局答問大會,雖然今次林太沒有坐主席位,其實她是做莊,她推行的第一個政策,一定要各政黨不能夠反對,甚至樂於接受,情況就好似打天九時敦天或者敦九,林太亦有幾個方案可以「敦」,全民派錢,似乎是過時及過於單調,亦未必可以得到全部政黨贊成,甚至會有政黨話林太收買人心,繼續出辣招打壓樓市,雖然每一次政府推出辣招,在立法局都會大比數通過,但如果林太今次選擇繼續出招,可能會出現反效果,即是話俾市民知道政府是無力控制樓市,官員們以往所說的在未來三至四年有九萬六個單位供應並不是真確的,樓價可能在答問大會之後立刻飆升,況且,樓價已經開始調整,出招就變成很多餘。

  林太選擇在教育方面著手,用36億元津貼有需要及合資格學生,調高班師比例,增加超過二千個常額教席,沒有政黨反對,亦沒有議員夠膽反對,立法會亦很少試過咁平靜和諧,林太實在「敦」得好,今次真的是「敦一敦,好過食雲吞」。

敦一敦,好過食雲吞
1. Desmond
2017-07-07 09:15
林太「敦」了天或九後,唔知手上還否有「四大賀」及「至尊」呢。
2. 真真薯片
2017-07-07 09:34
林鄭真係有運, 開左個好局, 下半年或明年初樓市回調機會大, 佢有起碼一年密月期, 問題係樓市回調後如果升返, 正苦既供應量仲係畫餅充飢, 第二年打後就會有壓力
3. 只是調整
2017-07-07 09:38
香港樓價有排升。短期可能出現調整,而不是轉勢。
4. 博士
2017-07-07 09:54
有至尊就唔需要敦,留番天九用嚟結。
5. 十郎
2017-07-07 10:41


      初學打天九,真的初哥,遇到一舖怪牌。

      一開我揸三文地八,一長一板凳一斧頭一雜五仔一大雞。庄家出三文人七,我三文地八打完,求其出只板凳,下家一晒四天九,單同我睇,我跟本冇得留,淨係得只大雞,一開,全場大叫,下家的是細雞。


6. 十郎
2017-07-07 10:51


      請問博士,師兄。文專有冇得打?文專打唔打得?

7. 鳥5
2017-07-07 10:58
以大戶甘9多人材,貨多人材,後市我覺得佢地,佢地係春冮鴨,如果繼續超標賣樓(繼續賣9埋出年D盤,(冇論乜9價,點加,又乜9offer 都59洗理),行動上就係沽空)。。。就係睇淡後市。。罷賣另計
8. 博士
2017-07-07 11:19
捉到正
9. LC
2017-07-07 11:53
其實香港樓市升同跌都有市民得又有市民失,後生難上樓係一個問題,廣大既業主唔見錢又係一個問題,其實好難有一個平衡點,其實以大陸三千蚊人工,樓都可以賣到三四百萬,如果套係香港既話咪更加離地,其實成個世界既資金入左樓市,個個國家既問題都係差唔多,各地政府可以講係無能為力,樓既買賣係商業行為,升同跌政府話唔到事,望政府做野不如自己諗計。
10. 十郎
2017-07-07 13:07


      我e家去食雲吞。

      70年代初,老闆在雅廉坊有一層樓,有 Macau friend 。他時常招呼伙記去澳門,畫舫燒乳豬,芙蓉蟹盒,紅燒鮑翅。最記得佢帶我地去一間叫做“珍珠玉“的舖頭買雲吞,十蚊一百粒,不過細細粒。現在唔知仲有冇?


11. Desmond
2017-07-07 13:11
十郎兄,有無文尊要打牌前先說好,如下:

文尊- 一对拎冧六,先出为大,除了高脚七对外无牌可打,跟武尊不同,文尊属於要在开局前说明规矩,因为可以无文尊或无擒。
12. 十郎
2017-07-07 14:32


      多謝11樓,我同意。

13. 十一哥
2017-07-07 14:38
十哥    澳門飲食點都差香港一皮、不過旅遊情懷…講風味、西南翅衹係中等貨式…多得王亭之吹捧、珍珠玉雲吞當食塊滑皮…算唔上好食、葡京嘅餐飲…應該係澳門頂級…尤其中菜點心…地下間茶餐廳…土魷撈面好正、澳門李錦記蚝油已成絕響、雅廉坊…當時女友親戚住果度、去過幾次、提起又有多少浪漫回味。


14. 十郎
2017-07-07 14:58

      十一哥----------比你講咗,又要食貴野!

      雅廉坊可以行路去觀音堂,早幾年重遊,路人話原庄嘅連理樹冧咗,現在呢棵係再裁的。

15. 十一哥
2017-07-07 16:47
十哥    面果浸都食唔哂、咪刻薄自己啦!原來係連理樹嚟…而家先知…怪不之當時嘅女友…硬係要我喺樹底甜言蜜語。


16. 樓市初哥
2017-07-07 21:33
湯博士實在講得有道理,以林特首開局已經勝利,希望實際幫助到往後施政
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。