買樓DNA

　　香港迪士尼樂園位於大嶼山欣澳，好似好遠，其實從好多地區去欣澳，只不過30分鐘車程，頂多係45分鐘就可揸車到酒店門口，比去外地快好多。但酒店房間幾貴噃，房租一定高過曼谷與台北四星酒店。泰國R幾日前吃午飯時先至講及：「喂，你應該多啲去吓曼谷啦，酒店好平㗎咋，好抵玩。」同大記者講起去迪士尼嘅餐費（一家八大三小共吃了早午晚三餐共七千五百元），即刻話：「去台北度周末可能仲便宜一啲。」此則見仁見智，照左丁山睇，台北冇一間酒店有迪士尼咁清靜，咁好環境噃，而且幼童去台北其實冇乜地方好行，家庭樂談不上，年輕夫婦去台北逛書局嘆小籠包就好正。

　　沙田陳太嘅一位親戚I就與家姐同去倫敦，兩姊妹到倫敦翌日，就發生倫敦橋恐襲，雖然無事，卻嚇咗一跳。親戚I回報：「好彩我同家姐一心去睇樓，約咗一個經紀去住宅區，冇去到倫敦橋影相啫。」香港人現時去倫敦，一個流行節目就係睇樓，當香港納米樓要賣萬幾蚊一呎之時，倫敦樓就變得好吸引。親戚I由Notting Hill睇到Chelsea，Bloomsbury，發覺豪宅太貴，係強國億萬富豪先至可以有得諗，但香港中高產人士亦有大把選擇，一啲距離帝國學院十個地鐵站嘅排屋只售一百萬英鎊多啲，搞到親戚I家姐心郁郁，乜唔係啫，北角丹拿山一個舊樓單位都要一千萬港元，不如換樓好過。

　　去倫敦買樓唔好講到移民咁嚴重，其他理由有好多嘅，最常見最容易嘅理由就係子女去倫敦讀書，要搵地方住，而倫敦房租貴，不如自己買番一個單位俾子女住，慳租兼希望保值，升值。老友印刷L十幾年前就係咁樣做，先知先覺，賺到笑。親戚I家姐就因為兩個仔女在英國讀完醫科，不能返香港做醫生，留在英國加入NHS系統行醫，其中一位娶咗一個物理治療師，但因為倫敦租金貴，醫生薪水低，住唔起倫敦，要搬往一小時火車車程以外嘅小城，等於叫一對香港醫生護士夫婦搬咗去東莞住，日日坐火車到九龍伊利沙伯醫院返工。有說香港年青人因樓價貴，睇唔到前景喎，英國年青醫生何嘗可以住在倫敦市內？買樓買地，深入香港人之DNA，最近知道一位大學畢業生與同學到峇里島作畢業旅行，竟然將兩年兼職工作積蓄，買咗一幅地，理由係十萬元在香港乜都買唔到，在印尼可以買到屋地，一於博一博！左丁山佩服佢勇氣可嘉之餘，亦感覺到對香港人來講，人生最大目標就是一層樓，多謝梁振英啦，佢任內香港樓價創歷史新高呀。