暴風雨去了哪裡？

　　在五月底，天文台發出了未來十日天氣預測，每日都會有狂風雷暴，並且提醒市民，要帶雨具出街，否則是很容易被淋濕身，但天氣與預報不符，除了第一日有落雨之外，其餘時間不但沒有下雨，甚至有時是天朗氣清，帶了雨遮的人亦沒有浪費，可以用來遮太陽，有人用開玩笑的口吻來質問台長，暴風雨去了哪裡？台長無可奈何話，天氣已經具備所有下雨的條件，但唔知點解，個天硬係唔肯下雨，台長一定未聽過天要下雨，娘要嫁人這句話，具備所有條件又如何，唔落雨就唔落雨，台長管得了。

　　我覺得天文台今次非常好彩，如果今次發出的預告是未來十日都是天朗氣清，但結果每日都落大雨，一定會被市民鬧到失暈，台長準備執包袱都得，不過，天文台長都是官員，明知天朗氣清都唔敢如實報導，大家何曾見過官員話樓價會上升，叫大家去買樓，叫大家小心就聽得多。

　　我相信唔需要太耐，就會有人問我，樓市幾時會下跌？我講大家或者唔會相信，我從語調就知道他們最近有沒有買樓，如果是嘲笑語調，他們已經買了樓，現在只不過耀武揚威，不過由阿媽俾錢，應該是耀母揚威，如果是怨恨語調，我都唔敢追問下去，一定還未買樓，但不一定是因為我的評論而未有買樓，那些人姓賴，搵人出氣而已。

　　過了六月，若果樓價仍然上升，我都會學天文台長講話，樓市已經具備下跌條件，利息開始上升，供應不斷增加，但樓價不跌，同天要下雨，娘要嫁人一樣，誰管得了，不過，我的情況比天文台長好一些，現在還未踏入七月，除了那些用高成數按揭來吸引買家的新樓盤外，二手樓成交量慘不忍睹，根據角動量守衡理論，樓價就算唔跌，都沒有能力上升，不過，理論還理論，事實勝於雄辯，七月之後見真章。