多謝梁特,地產商發大達小業主發小達

　　香港有辦法之人不斷去倫敦買樓，大富豪級更買倫敦城市甲級商廈，到金絲雀碼頭搵收購對象，乜唔係呀，繼李四叔間公司以天價232.8億買入中區美利道停車場之後，陳二小姐嘅南豐又以246.01億買入啟德商業地（每方呎樓面價12863元），地價如此高昂，普通富豪見到，幾乎退避三舍，走出香港搵機會最啱，而倫敦又最為香港人熟悉。

　　商業樓咁貴，住宅樓更貴得驚人，回歸二十年，香港樓價累積升幅甚為可觀，以中原城市領先指數計，1997年10月係102.93，當時已人人喊貴，呢個指數最新數字係158.2，比97年升咗53.75%，當然樓市升市並非一條直線，而係先跌後升，2003年沙士低谷時期（03年8月），中原城市指數係31.77，比97年下跌69%，好得人驚㗎。但2004年開始有自由行，零售業反彈，帶動就業率上升，失業率下跌，樓市即回復升勢，與最近指數比較，樓價反彈咗398%（即4倍），難怪左丁山有啲朋友（如昨日提及嘅期貨W）認為上升周期已經過長，應該進入調整期。

　　回歸後三位特首治下，董建華八年，樓價由盛轉衰（八萬五、九七金融風暴、沙士），跌近七成；曾蔭權七年，樓價於低位反彈，重回上升軌（孫九招托市、自由行）；然後到梁振英五年，樓價升五成有多，越升越急（土地供應雖然增加，但多得辣招驅趕市民爭相入市，恐慌性買樓），故此梁振英係樓價上升大功臣，地產商多謝佢都嚟唔切，測量師出身之人，果然有辦法逼地產商發大達小業主發小達。

　　第四位特首即將上台，樓價又會點？總不能無止境咁升落去㗎？林鄭有乜好搞呢？睇最新消息，林鄭班底係歷任特首管治隊中，最弱雞嘅一次，啲司局長不夠威望，亦缺人望，運房局局長由電機工程署陳帆出任，陳先生雖然醒目過人、口才便給，但在房屋方面經驗少啲，恐怕連五年前嘅張炳良也不如；發展局最初話會係測量師謝偉銓擔任，但謝先生曾在幾家大地產商打工，要避嫌，唔敢接波。現時消息話由另一位精叻AO黃偉綸捱義氣，真係難為佢，看來林鄭特首一上台就面對樓價在高位翻騰向上嘅情況，會苦思良策解決此問題。計左丁山話，不如索性撤消全部辣招及恢復七成按揭，讓市場不須扭曲，自由升降，樓價自不然會尋找上升下跌周期，尋找高低位！樓價升上去不要人為抑制，跌落嚟不要再用孫九招，如此樓市方可平穩發展！