地產論壇
登入名稱
密碼
頁數:
賭是賭徒,不賭也是賭徒
瀏覽人次:27190    回應:14

賭是賭徒,不賭也是賭徒

 

湯文亮博士

紀惠集團行政總裁
2017年6月5日

  老友兼大好友汪敦敬對於買樓非常有心得,而且屢戰屢勝,對於那些猶疑不決,恐怕買樓的風險太大,唔敢買樓的人有一句名言,就是買有風險,不買也有風險,這句話我一直覺得唔妥,但又沒有能力反駁,老汪又的確沒有講錯,買有風險,不買也有風險。

  其實,這句話對於一個必須要做抉擇的人來說,的確是沒有講錯,因為無論他做什麼抉擇,都有一定風險,就算唔做,都會有風險,如果唔係必須要買樓,不買就不能夠話有風險。

  現在有不少人去澳門旅遊,順便入賭場逛下,有一些人會賭幾手,不過,亦有不少人好似我一樣,入賭場只不過想感受一下賭場氣氛,睇下人生百態,我們不應該被人話是賭徒,但若果以老汪的說話解讀,我們都是賭徒,入到賭場,賭也是賭徒,不賭也是賭徒。

  做物業投資的人,他們會了解到箇中風險,買樓的風險幾時都大過賣樓的風險,因為買樓除了得到樓宇之外,還要負上一筆巨額債務,而當中所涉及的利息支出並不是負債的人可以控制,而最緊要的是物業資產價格可變,債務不會變,而風險亦是在這裡,因為不買的風險是資產價格繼續上升,大家損失了物業升值帶來的好處,同時,大家一定會認為買的風險是指樓價下跌,其實,這只是買賣的風險,對於有需要的人,如果唔買樓,他日就有可能要被迫付出更多金錢,這才是不買的風險。

  我見過不少人面對難關時,而所持有現金又不足以幫助他們渡過難關,被迫去賭場博一鋪,他們有七成以上可以逃出生天,但在贏錢之後,七成以上的人會繼續賭下去,最後還是走投無路,與投資物業一樣,有不少當初為了有迫切需要而買樓,在買樓之後,樓價上升,令到他們得到不少利潤,心思思想多買一個單位,即使不能夠獲得銀行貸款,都會用地產商的高成數按揭,甚至向財務公司貸款買樓,每當有人提醒他們的時候,他們便會話,買有風險,不買也有風險,其實,如果沒有迫切性,毋須承受買的風險。

賭是賭徒,不賭也是賭徒
1. 真真薯片
2017-06-05 09:28
博士講到重點, 好多人3, 5年前200零萬買左個上車盤, 今日升到600, 欠銀行150, 家庭月入6-7萬, 覺得自己天下無敵, 於是按返150出黎, 即係欠銀行300, 150擺住係ML度先, 更加覺得自己冇得輸, 然後用發展商高成數按揭+仔女人頭名買入800萬既兩房單位, 打升自己住新樓, 舊樓放租, 向財務自由既路邁進, 依家就浸淫係勝利既喜悅之中, 每個weekend揸車去5星酒店食自助餐, 再post上面書威威, 享受loser仰慕既眼光
2. 引刀一快
2017-06-05 09:52
買樓的風險幾時都大過賣樓的風險 ”

呢句話絕對係地産網幾年來經典雋語之一,簡單明暸。
3. 引刀一快
2017-06-05 09:57
買有風險,唔買又風險,咁就買大灣區,因爲買嘅風險細細地,又唔駛面對唔買嘅風險嘞,呵呵
4. 望東樓
2017-06-05 10:23
係經濟學上呢啲好似叫做opporunity cost。不過大家請緊記相同風險喺可以唔同嘅時空係唔同嘅。
5. 引刀一快
2017-06-05 10:45
東樓兄

同一風險大細亦因應唔同嘅對照而改變。比如依傢買大灣區,大陸樓市當然危喇,但係相比於用幾倍價錢去買港樓,風險又驟然變細。
6. 經濟學不是科學
2017-06-05 10:45
經濟學不是科學,不能重複驗證得出相同結果。
從邵志堯博士學懂了一個十分重要的道理,一個人俾人打了,下次又俾你打過 ? 吾識學精吾識避 ?
7. 引鼠入粥
2017-06-05 11:54

過去幾年話中國大浪會令中國樓市大插波及香港,但又見樓市倒頭大升就暗示自己係廣州加貨。唔係跟開forum真係以為佢睇升,而家又叫人去買D租金1厘,供息5厘既大灣樓,真係以為個個都唔識計數。
香港冇利息稅,真係買幾十萬中電收息就夠你租千幾尺啦!

"一個人俾人打了,下次又俾你打過 ? 吾識學精吾識避 ?"
你佢唔買甚至沽樓就就真係輸20身家。咁呢次又信唔信好? 
問佢乜係CCI 118? 佢就CY上身話你斷章取義,龍門任搬,真係吹脹。
8. 森林棟樑
2017-06-05 12:54
入粥兄

真心想請教 如何可以"買幾十萬中電收息就夠你租千幾尺啦!" ?

9. 引刀一快
2017-06-05 13:14
引鼠入粥??


哈哈哈,上年2016年,估會唔會跌破118,有D大好友唔敢落注喎!

廣州樓跑贏咗港樓,你梗係條氣唔順嘞,食D川貝蛇膽喇,哈哈哈哈哈哈

唔知你係咪打大髀十五槍果位,還是叫人預咗蝕兩成果位呢?
10. 引鼠入粥
2017-06-05 16:32
re: forest
不如你去江肇問下租金先,大把空置,實客可以再平三成。

re:引刀 
如果你真係加左貨唔係事後paper trade,我都真係佩服你的識見,只係為聽你講既唔入中/港樓既網友唔抵。
12. 引刀一快
2017-06-06 01:25
引鼠入粥哥哥

我發現你思覺失調,我幾時話加貨?呢度成班好友都幾年冇加貨喇,粥仔!

江門肇慶暫時係大灣區最弱嘅兩個市,租間千幾呎屋都唔錯呀,最緊要識得走出去,你可以架。
14. 旺絲
2017-06-06 09:28
大灣區又真係幾引人入性 哈哈!
15. 湯瑪斯
2017-06-06 12:02

我同意湯博士「不買就不能夠話有風險」。唔買樓最多捱貴租,唔算係風險。你用買樓的資金做買藍籌股。三百萬元本金一年起嗎有十幾萬元利息。幫到下租金。摸頂入市買樓風險好大。輕則做一世樓奴,重則負資產。其實而家入市既人,好多都會做一世樓奴,有數得計既。

16. 引刀一快
2017-06-08 05:12
湯瑪斯兄

做一世樓奴慘,做一世納米樓奴更慘。

過多十年八載,除咗廣州48分鐘到之外,估計有五六個市,可以坐個半鐘巴士就到。到時,成份人工攞嚟供納米樓嘅人,睇住D朋友有陽台、有花園、天台複式,或者單層過2000呎,一定若有所失。
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。