不讀歷史，不了解香港地產

　　八年前我寫第一本書，叫「讀歷史，了解香港地產」，當時，我自以為題目改得好，原來不是，如果我加多兩個「不」字，變成「不讀歷史，不了解香港地產」就更加好，如果當時用這個題目，最少賣多兩千本。

　　我以為自己很了解歷史，可以用歷史解釋香港地產，最近我才發覺，我對歷史只是一知半解，以這樣的水平，根本唔可以用歷史解釋香港地產，唔怪之得當時在出書之後，有評論員說不值一看。

　　最近有經濟學家話，相對北宋汴京，香港的樓價相當便宜，而個人負擔能力，現在亦比當時好得多，三蘇之一，蘇東坡細佬在辭官後，要傾盡家當才可以買到一屋藏身，不過我有點奇怪，既然做官搵唔到錢，點解蘇東坡又會話，但願生兒愚且魯，無憂無慮到公卿，或者，文人多大話是講得沒有錯。

　　我覺得那位經濟學家的中國文學修養的確唔錯，蘇東坡的「水調歌頭」，有部分的確是寫他的細佬，當時蘇轍可能已經辭了官，沒有官邸居住，大屋變細屋，瞓都瞓唔著，於是蘇東坡在水調歌頭中寫下「轉朱閣，低綺戶，照無眠。不應有恨，何事長向別時圓」，應該是講他細佬當時的環境，不過，辭官之後買唔起樓又不只蘇轍一人，在香港大把，不過，他們做官的時候住大屋，如果肯用房屋津貼買樓，好似張司長一樣，隨時有十幾間樓收租，退休後一定唔會徬徨。

　　在外國人眼中，北宋是中國最繁盛王朝，汴京的樓價的確很高，但在古代，以衣食住行來分先後次序，樓價與衣食相比，貴極都有個譜，老實說，我講到現在都唔知道自己講什麼，我只認為用到北宋汴京來證明香港樓價便宜，轉軚都唔好轉得咁離譜。