難為銀行

　　金管局上星期五下午股市收市後發佈一項新政策，限制／收緊地產發展銀行借貸，地產界資深人士，老波骨梁志堅認為發佈時間十分取巧，選在美利道停車場截標之後。假如金管局在上星期四便宣佈新政策，幾乎所有入標的地產商都會挑燈夜戰，緊急修改投標價，因應新限制而下調出價，令庫房少收幾十億元。偏偏特區政府佈局，待一眾地產商出價後再宣佈消息，顯然是「又痕又怕痛」，點講都係唔捨得犧牲賣地收入，啲「壞消息」係要拖到收到標書後先至講。結果恒基以233億元超高價中標，庫房大腫脹！

　　特區政府有主動權，搵地產商老襯，莫奈他何，有人話此招對本地大地產財團無損，項莊舞劍，志在沛公而已？誰是沛公？蠢蠢地嘅左丁山都知道係內房公司，如以天價投得啟德用地嘅海航及高價投得鴨脷洲利南道嘅龍光地產與合景泰富等同類型公司啦。呢兩間公司投地，抵押土地向本港銀行借錢嘅比例都係在50%以下，介乎40%至47%之間，現在金管局新規定話唔准超過40%，實際上與現實情況相差不遠。

　　左丁山以前在銀行都做過呢類貸款，借土地價五成，已相當保守，香港土地跌價五成，幾十年唔逢一閏，係董建華年代先至「六合彩都會中」，樓價地價跌到四腳朝天嘅啫。林鄭月娥應董先生力邀出嚟競選特首成功，任內唔會再中一次「六合彩」呀？今天嘅借貸情況又有啲唔同，一啲內房公司借錢，有時演下肌肉騷，除抵押土地、房屋之外，還可提供內地銀行嘅Standby L/C作保證，而呢類L/C在內地又有等額人民幣存款作擔保，除非本地銀行完全唔信內銀嘅啫，否則在道理上好難拒絕借錢俾內房公司。不過金管局對借錢出去嘅銀行仍然諸多挑剔，態度非常明顯，只欠講到出口！咁辛苦嚟吼實本港銀行，不如請阮國恆請陳德霖上報上司（財政司司長），再轉報大老闆梁特首，由梁兄再向中央陳述，叫內房股唔好來香港搶食大茶飯就算啦。梁特係政協副主席，國家領導人級數噃，有啲牙力啩！呢樣嘢唔做，反為專門難為本地依足規矩辦事嘅銀行，直情係欺善怕惡。

　　限制內房借錢買香港土地，你估會有助壓抑地價樓價？肯定不會，本地大孖沙如果因此冇咗嗰啲如狼似虎嘅內地對手，以所謂平價買到地，到賣樓之時，咪又係賣三四萬蚊一呎？邊會與利潤鬥氣！