限制買地融資

　　大機構主席搵左丁山食午飯，約咗幾次，主席都因為有事出差或者有更重要約會而臨時取消，主席嘅公關猛咁話對唔住，約完再約。呢啲事冇所謂到極啦，重要公職人物往往有更緊急嘅約會，有時身不由己，左丁山早已見慣，幾時有緣便相會，不急在一時。

　　拖拉個零月，呢日卒之唔改期嘞，公關嘅秘書仲好有禮貌，過咗中午十二時就打電話嚟俾溫馨提示，好彩啫，原來係約咗十二時四十五分，左丁山就記錄錯誤，以為係一時正。於是提早出門，行到萬年大廈，咦？未夠鐘噃，於是行入adidas旗艦店謀殺五分鐘時間，再行返去萬年大廈上四樓，果然時間啱啱好，一行入房，主席剛坐低。約會嘅嘢，遲到就冇禮貌，太早到（早於主人家）或會令對方尷尬，最好計準時間，主人家先到，自己跟住入，故此左丁山每次都提早（如因交通擠塞預計不及就冇計，行路就容易控制時間）幾分鐘到達目的地，再行多兩三分鐘先至上樓。

　　咦，大公關未到㖭，主席要等佢，好彩呢位主席係大量、不拘小節之人，有啲波士會要求下屬等佢，唔係佢等下屬㗎，跟老闆要識do，早到幾分鐘迎接老闆入房一定冇錯，做公關不可一日或忘。公關係呢度熟客，夥計非常醒目，即刻講：「M小姐到咗嘅嘞，剛剛去咗洗手間啫。」哦，算幾識做噃，點知兩分鐘後，公關總管入到嚟，非常老實咁講：「真對唔住，我遲咗㖭！」哎吔，即刻篤穿咗夥計講大話，夥計為之面紅紅。做侍應，有時為熟客（如M小姐）講句「白色謊言」（white lie），點都值得農曆新年收封利是。主席好關心大灣區發展，驚住大灣區又成為內地與香港嘅地產炒友藉口，乜都未郁，地產先動。有中國人嘅地方，往往如此，乜嘢概念都成為炒地炒樓嘅藉口，大概因為炒地產人人都識，係世界上最易懂得嘅行業。主席又問及金管局限制香港土地融資，有何含義呢？以左丁山愚見，係做吓戲限制內房大款在香港搶地啫，降低土地借貸成數至四成，降低建築貸款至八成，提高銀行對地產商貸款之資本要求，純是技術性，但本港銀行間間有充裕資本比率，本地大發展商個個有大把現金，受到打擊嘅只會係中小地產商，所以呢類政策又係明益長江、恒基、新地、信和、會德豐、新世界等等。內房公司有辦法安排內地銀行開standby L/C到香港做借款保證，根本問題不大。逢有新嘅限制政策，得益者往往係大財團，故此買香港大藍籌股，往往只會買貴，唔會買錯！