地產論壇
登入名稱
密碼
頁數:
全世界金融中心都係逼啲普通人去邊皮
瀏覽人次:13417    回應:7

全世界金融中心都係逼啲普通人去邊皮

 

方卓如

2017年5月18日 (信報)

學嘢喇,就算做錯事,唔緊要,死口唔認,再話人哋做得仲錯,咁就可以過骨。身為律師嘅議員,夠膽同被調查嘅對象研究如何調查,大開眼界。另一方面,被查嗰個,大搖大擺指示查佢嗰個如何查自己,呢啲就係霸氣。

唔好講三權分立咁高深,只係要求一個令人信服嘅獨立調查,原來喺香港都已經係冇可能,連做場戲都費事。大家有冇睇最近新上畫嘅《異形》?入面嘅人造人送別逝世船長時,與人類一齊手拿烈酒準備豪氣一飲而盡,人類問人造人飲酒掂唔掂,人造人答:「When in Rome.」讀過書嘅你一定知下一句係乜。同樣道理,「When in China Hong Kong.」明未?

中環商廈地王由港資奪得,香港人好欣慰,有守住家園嘅感覺。但係9份標書11家入標嘅發展商,只有兩家係中資,其餘全部係港資。地王規定唔可以拆售,只可出租,回本期長,似乎唔啱中資胃口。

港資正步英資後塵

港資慢慢步英資後塵,轉做收租佬,未賣嘅物業同土地更加唔會平賣,賣一份少一份。房屋唔會平,寫字樓唔會平,香港最值錢嘅資源始終都係土地,唔通你估係人才?睇吓啲議員什麼質素?

美利道剛剛喺兩個地鐵站中間,海景大部分被遮擋,面積唔算龐大,絕對唔係IFC同ICC嘅級數。但係建成後要有IFC嘅租金水平,先可以有3厘回報,證明港資認為5年後香港仲蓬勃過而家。

未來5年,愈來愈多中資來港插旗,嚟一個人,就要用一雙單位安置,寫字樓同住宅。香港愈嚟愈多人,支持唔住嘅,惟有北上大灣區。全世界金融中心都係逼啲普通人去邊皮,核心地段就由畀得起錢嘅人進駐。香港都唔例外,只不過香港嘅邊皮,走出了香港。

全世界金融中心都係逼啲普通人去邊皮
1. Alex Wu
2017-05-18 15:14
 搭上ㄧ個小三,都要多ㄧ間金屋來藏嬌,不過也有計數佬,求其爆房或在自己架車搞掂算啦。
2. 蓄芳待來年
2017-05-18 16:07

今時今日,仲有太多太多香港人未睇清楚香港嘅價值。佢哋並唔相信,香港會發展成為世界級嘅國際大都會。但放眼全球,有邊個地方及得上香港有此潛力?


回顧歷史,所謂枝節、衝擊,並冇能力扭轉歷史進程。


先講天災,答案好清晰。再講人禍,小弟認為屬於枝節。


中國國力冒起,可以由世界五百強企業裏面睇到,鐵證如山,你仲去否認,下場就係俾歷史掃埋一邊。


再講統治階級,黨性,好多人認為魔都上海、首都北京,或新興嘅深圳,會取代香港,其實早已超越,但另一方面,永遠不可能超越,因為偉大的黨性。只要你喺呢三個地方工作過生活過,你就知道同香港嘅分別。


偉大的黨根本不會放西方世界真正進入國境,因為那是動搖政權的根源。


但一個大國,需要一個對外平台,於是香港成為必然之選。黨可以俾香港亂,但絕唔容許北京上海深圳亂。呢個就係香港嘅價值,統治階級俾咗佢最大嘅自由去發展,包括任由西方勢力來發展、搗蛋同建設。小弟甚至認為,終有一日,香港會發展成為世界嘅中心點。


中資受命在回歸20週年前夕來港響幾個禮炮,目的明顯,不外是為宣示主權。當中透露的只有一個訊息:國家愛你!上海、深圳、北京,地位不可能與香港比肩,管你GDP只佔全國的幾個巴仙。


以香港作為對外的平台,政治角色設定由始至終從來也沒有改變!香港最終會成為「精緻型」的國際大都會(暫時人口數目不足,只能成為精緻型),這是小弟的信念。


Begin with the end in mind,說穿了原來是對香港有否信心的問題。如果香港前途掂,以目前嘅貨幣浪,揸樓有乜理由唔掂?問題係你覺得香港掂唔掂。


跌市大家信心動搖,升市大家也信心動搖,奇哉,怪哉!不是說看長線的嗎?小弟投注了餘生的20年,希望可以親眼見證香港邁向國際大都會的發展。


現在個「價」是否已遠超個「值」,衆說紛紜,小弟愚見,入市或出貨,如果計唔到primary gain,不妨睇吓自己嘅secondary gain。汪Sir話齋,點都有風險!


都市一直在換血,只係最近嘅速度比較明顯。


路漫漫其修遠兮,又到報稅季節,本土香港人呀,加油,把根留住,共勉!


(接待完上海友人,醉後一派胡言,哈哈!)

3. 亮劍
2017-05-18 16:16
現在香港有一半家庭係居於自置居所。 
政府實行任何房屋政策,不能不顧及他們的利益,正所謂投鼠忌器,又怕痕又怕痛,去做老舉又要攞貞節牌坊……

總之我們有能力嘅,就幫阿仔阿女神早買樓上車;冇能力嘅就唯有叫佢勤力啲讀書或排定公屋,如果唔係臨老都唔知點算😓 

因為以後世界各國都會用印銀纸去債冚債呢種方式去解決問題,要是睇唔通呢一点,你就會不斷畀人抽水抽到死為止!

唉!我們只能自求多福😓
4. 蓄芳待來年
2017-05-18 16:38

好欣賞亮劍兄嘅「香港人養香港人」,可惜受助者並冇深刻自我反省,反認為一切是應該&必然,都唔知道交稅嗰班有幾氣頂!哈哈!

5. 亮劍
2017-05-18 17:13
施比受更有福,當你有能力交一百幾十萬sd,你就知道上天待你不薄。
6. 引刀一快
2017-05-19 17:55
呢鋪係邊個先走出去,邊個得食,故步自封,留喺香港個窩仔自以爲是,終有一日會變晒憤青。
7. Pc0701
2017-05-19 18:34
亮劍兄熱心熱情非常有心,
我最鍾意睇人有理據,據理分析,
好多謝你哋理性嘅分享!
如果可以早幾年識到你哋就好啦
可以慳番幾百萬
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。