買樓係「父資產」代理發達

　　呢日吃過午飯，自上海總會走出來，例牌行街。上海總會裝修之後，陳老闆第一次上去，一路食一路讚，話可以嚟多幾次。左丁山問佢係唔係會員，佢好似如夢初醒，即刻叫經理代查佢嘅會員號碼及郵寄地址，因為太耐冇到上海總會，幾乎唔記得自己係會員㖭。經理好快同佢查好資料，互相對證無誤，請佢以後多啲光臨，陳老闆話：「日日有今日咁超高水準我都會係常客！」佢又問邊個係會長，左丁山代答：「李和聲先生公子李德麟呀，李德麟兄對食物水平好上心，經常親自巡視督導。上海總會嘅食物質素係可以信賴嘅。」

　　陳老闆話：「我在香港華仁讀書時，有一位同學又係叫做李德麟噃，唔通同是一人？」此則要佢地兩位見過面先至可以相認咯。正因為啲嘢好食，食得好飽，飯後要步行三十分鐘幫助消化，行到去國金商場一期入口，有大班地產經紀聚集，爭相向行人派發賣樓書，相信一定係恒基啲新樓盤啦，當今新樓盤有價有市，經紀代理賺到笑逐顏開，故此無不雄起，為追求大量佣金而奮鬥。

　　買賣二手樓，佣金係一個（即1%），代理因要應付買家及賣家，拉攏雙方協商議價，中間涉及不少外交手腕及口水，份佣金唔易賺。賣一手樓就唔同呢，一位經紀代理大行嘅高層同左丁山講：「近一兩年因政府辣招，逼使所有購買力湧入一手新樓市場，辣招明益地產商之外，我地做代理可收佣六至七個，如果推銷貨尾單位，佣金最高可達11%，啲豪宅盤動輒二三千萬銀一間，納米盤亦要四五百萬，你話佣金幾和味呀，我地直情賺到笑，發獎金俾Top sales好鬆手，又辦不少獎勵旅遊團，去澳洲七日之類。我唔知好景會維持幾耐，總之我好想梁振英連任，繼續推出新辣招！林鄭上場，千祈唔好取消辣招呀！」上一次地產熱潮（1995-97）其實唔係幾益到代理，當時買新樓係有排隊黨嘅，今次狂潮就不停製造新富翁，其中不乏精英代理。新樓購買力究竟從何而來？呢位高層話：「你都認識到啦，成功靠父幹，買樓係父資產，年青人買樓當然係靠父母。新一代人竟然覺得父親買樓俾仔女住係理所當然，仲試過有富二代向我地埋怨，父母竟然唔啃用現金買斷，而只係交晒首期及交易費用，按揭要佢地負責供樓呀！」