地產論壇
登入名稱
密碼
頁數:
人頭怎可能暫借
瀏覽人次:28205    回應:10

人頭怎可能暫借

 

湯文亮博士

紀惠集團行政總裁
2017年5月4日

  三國演義中講及曹操打袁術時久攻不下,發覺糧食不足,於是對運糧官說,暫借人頭一用,將運糧官斬首之後對各將士說運糧官剋扣軍糧,已經將運糧官斬首,而且立下軍令,要三日內攻破城池,袁術雖然四世三公,擁有良將千員,但點及曹操精兵猛將,打仗梗係猛將好過良將,不需三日,袁術城池被攻破,運糧官在地府閻羅王申請重回人間,理由是當日曹操話暫借人頭一用,現在袁術城池被攻破,理應重回人間,閻羅王費時睬運糧官,心裏想人頭怎可能暫借。

  不少初次置業者為了避免要付15%印花稅,於是一買就買幾個住宅單位,全部只需要付正常印花稅,不但令到只買一個單位的上車人士更難買樓,影響所及,樓價瘋狂上升,政府於是立例堵塞這個漏洞,本來是遲做好過冇做,但業界人士立刻話有方法拆解,他們參考曹操暫借人頭一用的方法,就是暫時借用父母兄弟子女,甚至親戚朋友的名義買樓,只要私底下簽署一份信託書,證明他們買樓是受人所託,依然可以避過15%新印花稅,立刻受到不少掌聲,但我認為,掌聲很快會被哭聲取代。

  陳茂波撰文叫那些人不要為了慳印花稅而以身試法,借別人的名義買樓是不合法,其實,司長毋須替他們擔心,那些俾錢買樓的人現在震過貓王,當他們完成所有有關買樓的法律程序,付完樓價之後,便會發覺到那個住宅單位並不是屬於他的,雖然,他們是持有信託書,可以證明那些業主只不過是受委託人,奉命持有那些住宅單位,但那份信託書是不合法,因為這是蓄意避稅,極有可能觸犯刑事法律責任,而事實上,受委託業主可以隨便處理那些單位,甚至將單位賣走,所得款項不用交給那位付錢買樓的人,負責做信託書的律師行亦不敢對那些受委託業主採取法律行動,到那時候,他們才知道,人頭怎可能暫借。

人頭怎可能暫借
1. 真真薯片
2017-05-04 10:36
正苦叫人唔好用信託書+人頭買樓, 就好似實行零雙非咁, 一定要捉返幾個, 判埋入獄, 然後交比大陸傳媒廣泛報導, 先至會有效

因為大陸同志一早就有種態度, 認為睇正苦政策一定要睇正苦實際點做, 唔可以淨係睇佢點講, 得把口既政策只係擺姿態, 實際上係默許, 而且同胞們冇香港法律意識, 以為簽左信託書就可以用黎告人, 唔知道一拎份信託書上法庭, 稅局就可以告你逃稅

工作關係, 在下成日要返大陸同人講解香港既一d遊戲規則, 大陸人係聽唔明香港法律既玩法, 唯一令佢地聽話既方法就係拉人示眾, 仲要長期堅持執行超過兩年, 咁佢地先知道原來係唔可以做

不過亦有另一個比較簡單既辦法, 就係拉幾個搞人頭買樓既地代, 拉夠十個八個, 地代唔敢做, 自然就制止到人頭買樓
2. Tony lam
2017-05-04 11:01
信托書如果律師樓攪嘅…最震就係個老狀嘞、照計有牌都唔會咁白痴啩、斷估多數係AA整份標準文書…跟手去打厘印就當攪掂、而家如果老豆仔女就撕咗當送贈啦!老友親戚呢?借盡嚟買嘅…就最多當送首期、比咗大Part嘅…最好講數…趁市好…下個人頭當借錢佢買樓…簽借據食咗佢、再兇下個人頭…唔制就最多攬住…爆鑊就斉齊過堂、仲有…如果係AA教路…有責任㗎…就唔好走甩佢…要佢幫手落咀頭…夾兇個人頭、AA咀頭實使得嘅 !
3. 引刀一快
2017-05-04 11:15
心水清!厲害,一講四世三公,個個都諗袁紹,其實袁術係同父異母兄弟。

大陸都好興借人頭,我有個兩個師弟直情主動獻人頭,事關佢地有廣州戶口,不過冇置業計劃。

我都婉拒咗,絕對唔係信佢地唔過,大陸有D人係好好人情味,而且好重視堅實嘅人際關係,不過,當時兩個都係寡仔未結婚,一旦有對象結婚,輕則老婆要嘈住攞返初夜(首置權),重則離婚時分身家。今日睇返,真係冇錯,先唔講佢兩個陸續結婚,就係俾佢地睇住今日樓價咁癲法,我都唔知點補佢地條數,有時,人際關係比錢財重要得多。
4. Tony lam
2017-05-04 12:14
好彩…夠機警、今日傻刀鬼拍後尾枕…自己都唔制嘅借人頭、當日想人…落疊市中心千二蚊呎、就係玩借人頭騙局、喂!己已不育、咪施於人啦!



5. 引刀一快
2017-05-04 16:57
琳琳,你如果唔走數,都執4、5球,唔使出陰招,唔會話你知喺邊度。

話時話,你幾耐冇遊大陸?
6. 舍神
2017-05-04 17:43
[借用父母兄弟子女]

有句說話叫兄弟同心,其行斷金。

在政策扭曲下的樓市,那要考驗一下家族成員有幾同心了!

我d丁權都用盡了.....
7. Tony lam
2017-05-04 18:21
刀哥     都好幾年冇過河嘞、原因係通訊…視像等於現 場一樣、人真係好得意…自己都唔知點解 ? 我一D都唔鈡意返大陸、怪在…又唔鈡意人地少大陸喎 !  你就掉轉…大陸樣樣都唔啱心水(最近唔同咗)…但你又幾大都要紮喺大陸喎 !  

要假手於人嘅買賣…借人頭等等…我就會慳番、又唔係冇第二樣玩、算吧啦!
8. 引刀一快
2017-05-04 21:10
阿lam

買市區別墅,何來借人頭?除非手上大陸物業已經滿額啫。當時仲係一手貨添呀。

香港都問題多多喇,大陸又點可能冇缺點,接受問題,就有改進嘅一日,如果我一味講大陸好,說話偏頗何來說服力?其實我不知幾鐘意兩地走嘅生活,點會覺得大陸樣樣唔啱心水,大陸好多嘢,香港享受唔到,不過遇上某些話題,我係以長居大陸香港人嘅角度去分析,就正反面都一定講到。

呢排,大灣區成為一個清清楚楚嘅大目標,大項目,咁好嘅嘢,唔通仲有彈?我係真心希望中港融合,然後喺有生之年,見得到中國統一。
9. 向引刀‧土著‧自醉‧浪子‧阿井 說不
2017-05-04 22:00
傻燦,你真係無一弗似係香港人啵。
10. 引刀一快
2017-05-04 22:27
說不女,妳忽忽似香港人,嘻嘻。
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。