地產論壇
登入名稱
密碼
頁數:
先升後跌,先升後升
瀏覽人次:30739    回應:30

先升後跌,先升後升

 

湯文亮博士

紀惠集團行政總裁
2017年5月2日

  在上星期五晚,邵博士到我公司做Facebook Live,此其時大家都知道中原指數又破頂,邵博士當然開心,話佢又預測準確,言下之意,即是話我預測錯誤,我話,我對今年樓市預測是先升後跌,邵博士的預測是先升後升,現在大家都預測準確,暫時打成平手,我沒有失落,邵博士亦不需要開心,在鏡頭面前,半點也不能退讓,否則,整個Live Show就有佢講,冇我講。

  話題一轉,邵博士立刻話我既然睇淡樓市,點解小兒又用四千幾萬買樓,邵博士的說話已經厚道,不少人話我既然睇淡樓市,點解唔將手上物業全部賣走,我話小兒換樓,將現在一千呎單位換了一個二千呎單位,是跑馬地名廈,呎價兩萬,貴沙頭角不足兩成,根本不能相提並論,如果呎價五萬,我會叫小兒慎重考慮。

  話題再轉到利息,邵博士睇美國沒有能力加息,這點我不明白,耶倫連加息時間表與幅度都講明,點解咁多分析員仲唔相信,原來不但香港政府沒有信用,連美國政府都沒有信用,如果美國唔加息,一定是發生了不可抗力大件事,只有壞消息出現,美國才不會加息,所以,我情願美國加息。

  當日早上,房運局再次宣布未來三至四年供應量,由九萬四增加至九萬六,邵博士話唔相信政府可以做到,同樣情況,政府將供應量的時間表公報,如果唔信,根本冇嘢好講,對於某些分析員來說,唔信就是分析。

  邵博士話以他多年在國內營商所了解,有無窮無盡購買力從國內湧至,多付30%辣招稅根本不是問題,其實,的確有不少國內人已經在港置業,如果他們現在選擇離開,會有相當可觀利潤,在以往,只是單向行車,現在則變成雙向,有國內人到香港買樓,亦有國內人賣樓,我同意買樓比賣樓的人多,但增長幅度就大幅低於以往,否則,地產商就不會借錢給買家,做分析,一定要根據理據,不能夠以個人意見為準則,這點就不是太多分析員可以做到,包括在下。

先升後跌,先升後升
1. 十郎
2017-05-02 09:20


      博士忘記了自己經常提及的第十人理論,我筆名來源就是感應這件事。我之後發現果然好多這類人,別人講乜,他都反博,反對一番,否則何以顯得自己博學多才。

2. 真真薯片
2017-05-02 10:01
在下唔信正苦做到3, 4年9萬6供應, 原因非常簡單, 隨便攞近期兩個大盤維港頌同海之戀做例子, 兩個都係5, 6年前既地皮, 何來3, 4年?? 如果正苦改口做未來3-6年潛在供應有9萬6千, 在下就信, 呢個先係事實, 不過正苦唔敢講

至於加息, 冇乜大事應該會加, 除非出唔知咩大事, 例如出兵打肥仔金, 不過出兵機會應該唔大, 最後港銀都會被逼跟加息, 到時港樓就會調整
3. Tony lam
2017-05-02 12:01
十哥   我係味應該改個綽號…十一哥…呢?

政府…邊使你信唔信…下下真金白銀咩?政策會改變現實、噏得出就會…改變大多數生意嘅部署、QE就係…典型無中生有…力挽狂瀾…嘅例子  !
4. 十郎
2017-05-02 12:22


      愧於盧前,恥居王後,我豈敢在兄台之前呢!

      講真,我好鍾意十一哥,尤其是何國材版本,十一哥大情大性。

5. 歷史長河
2017-05-02 12:23
留意到了枱面上有一大盤花生,正!
6. 浪子心聲
2017-05-02 12:24
這編文似唔似早幾年有位博士同湯博士在電台辯論,但嗰時那位博士話樓市會跌之後連自住物業都賣了,而湯博士當時就話唔會跌。 今次就唔同喇,輪到令一位博士話升而湯博士話跌,我當然信湯博士啦,有過往紀錄見證湯博士的實力,希望這位邵博士無學之前那位博士咁有信心自己的分析,而買了一兩件貴貨。
7. 歷史長河
2017-05-02 12:30
浪子兄,咁你信唔信博士所講的「自住樓唔好賣」及早前的「啱價就可以買」呢?一起研究。
8. 正苦
2017-05-02 12:43
只要政府話考慮不久將來減辣, 我想買樓都等一等.
9. 真真薯片
2017-05-02 12:51
在下唔信唔緊要, 最緊要市場信唔信, 市場唔信正苦推到供應, 二手業主繼續吊高黎賣, 買家繼續追價, 樓價指數繼續升, 希望可以升穿160比689做離任最大政績
10. 湯瑪斯
2017-05-02 13:26
雖然我都唔多鍾意689。不過總係覺得好多人係對人唔係對事。就以樓價講。689自上任以來想盡辦法壓樓價,偏偏樓價只升不跌,而且仲要頂住個市直至2017年6月30日為止,令689顏面全無。
11. 引刀一快
2017-05-02 13:28
十郎兄

厲害,原來兄台筆名深具涵義,你可能有個遊走於金庸古龍武俠世界嘅細佬,蕭峰變蕭十一郎。
12. 引刀一快
2017-05-02 13:32
國內人開始賣樓,出自湯先生所言就係新聞。
13. 十郎
2017-05-02 14:13


      十一哥,唔害人,唔呃人,唔蝦人。


14. 引刀一快
2017-05-02 14:25
To 7樓 長河san

「自住樓唔好賣」及早前的「啱價就可以買」呢?

你先厲害,「自唔自住都唔好買」兼「唔睇價就可以買」,不如研究從你開始喇。


打錯字:「自唔自住都唔好

15. 歷史長河
2017-05-02 15:24
"你先厲害,「自唔自住都唔好買」兼「唔睇價就可以買」,不如研究從你開始喇。"

我講過?唔通我真是思覺失調?


16. 十郎
2017-05-02 15:25


     刀兄:我星期六下午到中山一轉,經歷慘痛,容我道來。

      中午1點由中環出發,到深圳灣約2點,3點深圳灣出發。未到虎門大橋已經塞車,一路捱到中山已經7點鐘,車友話正常行車一小時半,即係塞咗兩個半鐘,四個人用饍於小棚寮。四味餸,燒鵝(味道ok),蒸邊魚,酸甜骨,通菜,盛惠200,(全程最貴)。燒鵝半隻75,邊魚33蚊斤(十襾秤)魚重斤幾,加5蚊欖角(未聽過),這樣蒸邊魚要65蚊。第二日在墟市見仲大一d的游水邊魚,問價,答12蚊。到墟市前去飲茶,半隻雞,十個點心,點心份量較香港大一倍左右,食唔晒埋單180蚊。

      昨日回程前在所謂酒店食飯先,地方大,燈火通明,裝修好,清潔,招呼唔錯,叫五餸兩飯(3蚊碗),送生果埋單190蚊。7點開車,情形同來時 ‘依矛依讓 ‘。11.20到深圳灣,衝鋒過關,11.40分趕搭倒到上環尾班車,到上環12.10分,乘尾車地鐵返屋企,開門第二日1.10分。

      刀兄,我寫咁多野,係講珠三角唔攪好交通,就死路一條,車友話假期才發生的,即係叫人假期唔好返大陸。









17. 假期避一避是常識
2017-05-02 16:14

返大陸旅行或消遣,避開5.1、10.1、清明、春運是常識吧!

欖角配邊魚清蒸,唔怕多骨,一個“正”

18. LS
2017-05-02 16:20
湯博士仲講過<自住一定要買>我完全同意
19. 引刀一快
2017-05-02 16:45
十郎兄

大陸假期唔使路費,五一嘅假期係四月底,所以你撞到塞車係好正常。你去程遇上幾個“塞”,一般上環去深圳灣,係40分鐘,深圳灣過一地兩檢,係五至10分鐘,快者三分鐘過曬,一小時過關明顯係擁擠,可能部車過關都排隊,後來你走虎門南沙,果度確係久唔久就會塞,估計一定會處理,而且虎門依家通咗地鐵,唔使擔心問題會拖好耐,“大時大節”,紅隧都塞喇。下次大假期去中山,一於坐輕軌過去喇!

75蚊半隻燒鵝算好抵食,依家一般兩百蚊一隻鵝,邊魚33蚊算合理,市區好多賣38,邊魚大概三類,塘鯿,海鯿,沙蘇,沙蘇大條,冇海鯿塘鯿咁滑。

大陸十兩秤,係500g,50g一兩,我地老秤,十六兩605g,一兩37.5g左右。你話“未聽過”,係欖角要加錢,還是未聽過欖角?的確好少地方蒸欖角要加收嘅。

長假期大陸市區好少車,大部分車就係跑公路,去旅行或回鄉。

20. 引刀一快
2017-05-02 16:50
To 15樓長河san

你嘅座右銘係地產網嘅集體回憶。
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。