埋單的藝術

　　兩男女去食烤肉爭埋單，傳媒最初沒有考究便作出報導話男士要求AA制，女士唔肯，於是大打出手，有老友問我誰是誰非，或者兩個都有不是之處，我話是男士不對，兩個人去食飯，根本不會用AA制，三個人以上才會用平均數，AA是All Average 簡寫，兩個人就各自付款，但這是限於食西餐，食中餐或者烤肉，如果男方提出AA制，即是攞女方著數，所以，我話男方唔啱。

　　烤肉店老闆隔洋解話，原來男方爭埋單，女方話AA制，但只願意出500元，男方唔肯收，於是大打出手，如果事情真的如老闆所講，我覺得是女方唔啱，唔想領對方人情，要AA制就要付一半，但事情未必如此，老闆只是打圓場，但搞到咁樣，主要是雙方不懂得埋單的藝術。

　　老友知我自小埋單埋到大，多少懂得一些埋單藝術，可不可以跟大家分享，我話當然可以，如果叫人去食飯，除非是講明由對方請客，否則，一定由提議的人埋單，千祈唔好在叫了埋單之後行開，這會惹人誤會，最好就是叫等客人行開或者去洗手間時埋單，埋了單對方都唔知，更加唔好在客人面前check單，令到客人很尷尬。

　　請客並不是救世主，千祈唔好俾客人有嗟來之食感覺，請客是要多謝客人願意浪費寶貴時間，晚餐事小，時間事大，如果請客請得唔舒服或者覺得肉赤，就千祈唔好請，免得大家都食得不開心。如果知道不是自己埋單，就千祈唔好揸主意點菜或者開酒，如果請客的人堅持，就要點一些比較普通的菜或酒，這點要切記。

　　生意上的埋單更加要睇形勢，我早已對同事說，如果知道生意不成，一定要爭埋單，否則，做唔成生意就會給對方講閒話，如果知道生意十拿九穩，可以讓對方埋單，事成之後再回請對方，老友話埋單都有咁多藝術，唔知真定假，老友唔知道，我九成學分都是埋單得到，唔識埋單，我未必畢到業。