地產論壇
登入名稱
密碼
頁數:
出售未補地價公屋乃自殺行為
瀏覽人次:35157    回應:24

出售未補地價公屋乃自殺行為

 

湯文亮博士

紀惠集團行政總裁
2017年4月25日

  大約在兩個月前,我應邀出席一個質素非常高的晚餐講座,參與的人大多數都響鐺鐺,主持人同我講,當晚博士學位多過參與的人,老實說,演講不難,但答問題的時候就要有真功夫,在座的人一定會問很多想也想不到的問題,而且,他們早已掌握答案。

  有一個經常參與社會工作的律師問我,香港經濟環境不俗,點解露宿街頭的人與日俱增,我反問有沒有了解過他們,只要問他們一個簡單的問題,在露宿街頭之前,他們是否公屋業主,見樓價不錯,將未補地價公屋賣走,曾經有記者問那些將未補地價公屋出售的業主,在售出之後有何打算,有業主答,他有很多親戚朋友,可以隨時住在他們家裡,這是當人白痴的答案,那些業主將公屋賣走之後,最初是可以租樓住,但最終都要流落街頭,而那些沒有以低價買公屋的租戶,至今仍然可以住公屋,所以,我認為那些將未補地價公屋出售的業主,他們的行為好似自殺一樣,那位兼職社工的律師同意我的說法。

  那些未補地價公屋業主,其實是享受政府的福利,當日他們可以以非常低價買入自住公屋,而且免費享用未補地價的那部份,如果他們賣走,即是放棄他們的權益,如非必要,任何公屋業主都唔應該做出這種行為,不過,如果勸籲他們千祈唔好賣走自住公屋,就會發覺那些業主非常驕傲,當日以不足十萬元買入自住公屋,今日能夠以四五百萬賣走,他們認為自己投資有道,揸住幾百萬,好快變幾千萬,正是有糊唔食,罪大惡極,我從來都不與那些人講道利,他們根本唔知道政府將公屋賣給他們,是莫大福利,唔懂得守著那間公屋,最後吃虧的都是他們,老實說,他們要自殺,我都無謂講咁多。

出售未補地價公屋乃自殺行為
1. 歷史長河
2017-04-25 09:25
賣完之後可以像浪子兄那樣要求改變游戲規則,咁就真係冇得輸
2. 占士
2017-04-25 09:33

博士,有很多人認為,如果他有幾百萬,同樣可以好像您那樣,透過投資或做生意,將它變成幾百億。所以,他選擇奮不顧身地去試試看。但大家都知道,理想很豐滿,現實很骨感!

3. 打工仔 Andy
2017-04-25 09:35
有分家產, 有賣後用 d 錢医病或入住老人院, 各式各樣都有可能 ! 
4. p p
2017-04-25 11:02
佢地賣走D錢豪嘆完、又可以再輪過公屋,又再一次等享受政府資助、何樂不為?
5. 凝風
2017-04-25 11:25
賣左有幾百萬,去換居屋/私樓....我覺得幾聰明。

但是......
賣左有幾百萬,去消費左佢......咁就係自殺~
6. 真真薯片
2017-04-25 11:34
其實公屋真係最無敵, 價值不非, 終生保用, 絕對唔怕跌價, 升可以吐現, 只要未吐現就唔怕比仔女某住家產………
7. 凝風
2017-04-25 11:40
其實公屋流通量好低,價值不作準,係大升市先有佢流通價值。
懂得大升市換樓自住,咁就保值了~
第時升跌到好,銀行點都覺得居屋/私樓值錢過公屋,變現點都多D錢。
8. Bos
2017-04-25 12:39
要識換馬
9. 浪子心聲
2017-04-25 13:01
回長河兄,足球為什麼能長時期成為全球最受歡迎的運動,其中一個原因就是遊戲規則不斷改善,當然他們的改善是非常有智慧的,改動不大,效果明顯。香港的問題我個人認為係多位特首才智不高,動作多多,效果不彰所至。

這自殺行為亦可說是過去遊戲規則的改變不得宜的結果,我不認同政府出售公屋,問題多多,這只是新一類問題產生的類別。

10. Tony lam
2017-04-25 13:30
懵董最底deal就係   …賣公屋…! 違規租嘅就扣夠分趕走、有10皮8皮就冇洗驚比番間屋政府…比鷄碎咁多就買嚟養老鼠…當祠堂…吹咩   

…2百億賤賣房署民生物業比領、上湯當水賣…打番條呔扮高檔…加租冇哂制約、小商冇哂生路。

攪到而家要玩快餐車、話就比小商戶營生喎 ! 我就話比高官玩似D ! ! !

老湯…政府咁玩法…對舖位納緊差餉比緊稅嘅…租客…業主又公唔公平呢? 而家噪緊快餐車揾唔到食、分分鈡比佢喺你D舖門口擺檔都有份㗎  !



11. 十郎
2017-04-25 14:07


      Tony 兄--------當年係信唔信報你兄弟,鼓吹政府賣公屋。理由係想政府甩掉大業主身份,唔駛再無了期津貼住戶。好似電台神經漢叫人唔好買,買咗就維修保養,差餉上晒身。睇下大家點決定喇。

      領會單野,本來人人入表都有一手,我收咗幾份啦,神經漢提覆核,攪到我要撕票,政府話係還富於民嘅。

12. CD ROM
2017-04-25 15:09
識得換馬由公屋轉私樓既有幾多??? 這些根本是意外之財, 要公屋住戶handle幾球野cash, 處理得宜仲要唔好亂洗, 係幾高既要求.

Btw, 賣幾球既公屋係連地價既, 其實分分鐘有3分1至1半既錢要比返政府補地價, 唔係自己袋晒gae.
13. 引刀一快
2017-04-25 15:28
如果公屋都賣到四五百萬,梗係賣喇!抽100萬出嚟買間大陸屋,剩低三百幾萬,做理財,算你得3點咁少,一年都十萬有多,夠你喺大陸養老婆!八千人仔一個月,對好多人嚟講,已經算豐盛。

香港賣公屋要瞓街,識得返大陸就唔使做有兩餐食,分分鐘可以娶老婆,粵港澳大灣區萬歲!
14. 引刀一快
2017-04-25 15:44
如果四五百萬係未補地價,咁到手有三百萬都唔怕賣!30萬俾首期買間100萬左右嘅大陸屋,月供四五千,其餘攞嚟買穩陣嘅理財產品,依然有三幾千剩,加埋D生果金一樣可以過日子。
15. 十郎
2017-04-25 15:51


      我嘅印象,唔駛補地價嘅,唔同居屋嘅。

16. DiscussingBoard
2017-04-25 16:21
哈, 我看這版已3年,
引刀兄說的,每次也鼓勵國內置業,
咩3厘保守產品, 
可見有這想法,眼光之大,你就是什麼樣的人。
今日,我可以夠膽同自己講,我終於算認清一下你了 ^^'
17. 引刀一快
2017-04-25 16:29
係呀,你仲認清好多接受3厘回報嘅人添,哈哈哈
18. 引刀一快
2017-04-25 16:35
十郎兄

如果唔使補地價,四五百萬全部落袋的話,對好多人嚟講,係新生活嘅開始。
19. 十郎
2017-04-25 16:46


      當年賣十幾萬,如今如果要補地價,咁樣要補幾多至夠?政府一筆賣晒比你,甩咗個包袱。

      我都埋怨政府不公平,所以我早前提議丁屋制,嬰兒一出世就有個冧巴,輪到佢就有一間公屋。

20. 真真薯片
2017-04-25 17:19
公屋問題係一世人得一次

如果有個公屋家庭係70年代生一對仔女, 90年代仔女上樓, 2000年父母分居, 總共分配到4個公屋單, 再係200x年全部同正苦買入, 依家沽出, 咁就起碼袋過千萬………當然實際執行上幾乎冇乜可能……
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。