巴塞為榜樣

　　曾俊華大概心知肚明，知道競選特首處於劣勢，佢一個人對抗西環、董、梁三大陣營再加北京以「最強音」聲援對手，橫睇掂睇都難以突圍，何況仲有胡國興分薄票源㖭呢。好在佢識打劍，又係洪拳高手，知道無論劍擊或拳擊比賽，參加者一定要堅持到底，非到最後關頭，不會認輸投降嘅。咁樣睇，佢都算幾有體育精神，否則嘅話，林鄭會好似跳芭蕾舞咁，彈跳幾下就入咗禮賓府，未免太輕鬆容易。

　　曾俊華嘅口頭禪係奧斯卡頒最佳電影，未到最後一分鐘，還未知誰是真正最後贏家，但呢個比喻有啲失當，因為奧斯卡得獎者早有評判決定誰拿金像獎，頒獎時觀眾未知，拆信封頒獎嘅明星未知，但「幕後評審團」早已事先「欽定」晒，只待頒獎明星宣讀名字而已。曾俊華難道希望張德江向建制派選委宣讀「星聲夢裡人」，但到了最後關頭，有位習近平出來話張德江搞錯咗，曾俊華得獎先至啱？即使真係如此荒誕，曾俊華同樣係「欽點特首」，靠中央提攜做特首嘅啫！
　　最新最適當嘅比喻應該係巴塞隆拿，莊曾有冇巴塞咁威呀？第一回合輸畀巴黎聖日耳門PSG零比四，次回合贏番六比一，踢走PSG出線，創下歐聯歷史紀錄，既空前，亦幾乎一定絕後嘅絕地復活，反敗為勝紀錄。如果莊曾在提名期得票大落後於林鄭，但在3月26日最後投票反勝嘅話，直情就係巴塞上身！

　　莊曾係唔係巴塞？林鄭會唔會腳軟成為PSG？一眾老友都認為難以相信，冇乜可能。左丁山睇場波直至第75分鐘，巴塞贏緊3比1，還要入多3球先至掂，但當時PSG死守頗為穩健，巴塞球員似已洩氣，球賽成膠着狀態，左丁山以為唔駛睇落去，於是出門開車，誰知道到中環後得知巴塞真係在最後7分鐘射入3球，幾乎噴茶，連忙上網睇BBC，先知道尼馬在88分鐘射入一個世界級靚絕罰球，激起巴塞士氣，竟在補時創造奇蹟。事後不少朋友認為係PSG打假波，陰謀論滿天飛，但即使有人寫劇本，都冇理由寫到結局咁刺激嘅啫，你估尼馬真係可以次次射入絕妙罰球咩！左丁山情願相信PSG輸波，係教練戰術的失敗，而巴塞一眾球星嗰種拼勁，亦前所未見。講番特首戰，曾俊華陣營有冇一個尼馬呀？有冇美斯呀？好似唔多見噃，曾營想學Barca，相信難好多，但可以Barca為榜樣，提升鬥志，哀兵上陣，大力進逼，希望對方在壓力下self-destruct！