房屋目標

　　曾俊華發表競選政綱，左丁山認為最主要一項，就係提出讓六成人入住公屋，徹底解決香港市民最關心關注嘅房屋問題。地產測量師梁振英立即有反應，譏諷曾俊華開空頭支票，因為以佢嘅測量師經驗睇，香港每年開發土地之數量用晒嚟起公屋，都不足以達成六成人住公屋嘅目標。

　　六成人居於公營房屋，自然唔係五年特首任期之內可以達到，可能需時30年或更長，但千里之行，始於足下，如果香港人，香港社會唔敢立下一個長期房屋目標，永遠睇住樓價螺旋式上升嘅話，係十分可悲。文匯報（二月七日）頭版大字標題報道：「港人港地」（啟德1號Ⅱ第8座低層2樓）實呎價30,000元售出，一個月內升幅20%，實呎價直逼九龍站豪宅。試想像，30年前（1987）啟德所在地，九龍城、新蒲崗、觀塘一帶樓宇，建築呎價有冇3000蚊一呎呀？答案係一定冇。如果30年後，啟德樓宇呎價係30萬元一呎，真係人都癲。

　　梁振英在工專讀測量，曾俊華在MIT讀建築，邊個嘅專業知識叻啲，唔敢講；純以香港式考試尖子揀科傾向嚟估計，一個成績可入讀港大建築系嘅學生，在1970年代，絕不會願意到紅磡讀香港工專測量系。梁振英之後到英國深造，讀完測量學返香港從事地產測量業，一早靠地產發達，頗有先見之明，睇通香港發達之路；曾俊華返港唔搞地產建築，而跟曾蔭權做政府AO，直頭係笨笨地，但佢係建築系畢業，對土地及樓房應有一定認識，今天應該唔會無厘頭亂咁噏。

　　曾俊華呢項政綱面對之最大困難當然係造地、拓地、開發土地。梁振英搞到社會關係緊張，與不同環保、地區團體及居民缺乏互信，環保團體幾乎逢拓地必反，為香港造地增加不少困難。莊曾有冇能耐，透過協商，開解環保團體之心結，減輕造地反對阻力？假如佢真的成為特首，有無辦法說服立法會通過「東京式」嘅市區重建模式（即私有業權高於同區居民反對聲音），加快重建舊區，增加市區樓房供應？訂立長遠房屋建設大計，人人識講，要害在乎執行力。民望低，民意不支持嘅特首，即使迎難而上，亦會寸步難行，唔通收地要得到中央政治局同意出動解放軍咩！一個愛國愛港、中央信任嘅特首，但無民意認受，雖空有管治能力，將來亦會處處碰壁，一味靠打得，必定令香港頭破血流。