報紙受威脅

　　蘋果加價至每份8元之後，不知有冇影響銷路呢？朋友M嘅爸爸係基層退休公務員，好識知慳識儉嘅，退休後家中只買一份報紙，就係蘋果，加價至8蚊之後，M爸爸唔高興，轉番睇近期有曝光率嘅「成報」，其實M爸睇咗「成報」幾十年，至「成報」易手，韓中旋老總退休後，佢先至轉睇蘋果嘅啫。據朋友M講，M爸爸睇咗一個星期「成報」，不聲不響轉而每日買超級擁梁報，擁梁報新聞故事多，幾唔錯，但M爸爸與幾位昔日政府同事一致話頂唔順擁梁報之擁梁言論，唔高興，又轉買知識分子報，三日後，朋友M發覺爸爸突然肯多花十毫子，每日買番蘋果噃。朋友M於是問爸爸：「點解咁破費呀？」爸爸嘆一口氣：「知識分子報有啲高深，甚麼靜態焦點新聞太多，唔啱我。」

　　加一蚊價，其實好少啫，應該影響不大，畢竟蘋果長期讀者轉睇其他日報嘅話，一定會發覺口味不同。左丁山每日睇12、13份報紙，清楚瞭解香港言論逐漸歸邊，蘋果成為某方眼中釘，除之而後快，故此出現大量政治性抽廣告、實行杯葛，形式與泰國總理他信當權時代，他信政府對待唔聽指揮棒嘅報紙，實施廣告杯葛一樣；現在嘅軍政府就索性「幕後訓斥」，要報紙識做。

　　連美國民選總統都出呢一招。候任總統特朗普先後叫晒美國各大主流傳媒嘅總編輯、主播到Trump Tower訓話，指佢地在選舉之前講大話，抹黑佢，點名當面批評CNN總裁容許記者做「假新聞」，此乃美國近數十年未見之候任總統「強勢表現」，擦慣鞋嘅霍士新聞台主播節目主持人Hannity更落井下石，乘機踩多CNN幾腳，呼籲特朗普入主白宮後驅逐CNN記者，不准CNN採訪，如此痛駡同行，幾令人側目。特朗普先拒絕紐約時報到Trump Tower參加「訓話」，繼而親自到紐約時報與編輯部見面，跟住與老闆閉門會議，究竟講啲乜，紐時守口如瓶。以後美國新聞界是否真係會聽話，歸邊，跟住特朗普指揮棒走？佢正式上任後就會更清楚，但特朗普決意約束美國傳媒之心，無可懷疑，如果美國新聞自由失守，影響深遠，俄羅斯與中國政府會掩住嘴偷笑。今天世界奇事怪事多，一位白人億萬富豪第二代，憑自由立場環境賺大錢，但竟然得到大量白人無產階級工人支持，當選為總統後，未上任就伸出干預之手，阻止Carrier（開利）將部份工序搬至墨西哥，唔通在美國都會出現一個獨裁者？