手機獨霸

　　周街見到人低頭望住手機，目不轉睛，碰口碰面撞埋嚟，猶自懵然不覺，肯定係捉緊小精靈啦──Pokémon GO究竟有乜本事吸引咁多玩家，令全世界暫時瘋狂，左丁山唔知，問過肥仔K、學生豪等，佢地話：「你試吓玩咪知囉，唔玩就表示你年齡心態都好老。」

　　左丁山冇興趣捉小精靈，只係有興趣捉因Pokémon GO而受惠多多嘅股票，當然最明顯嘅股票就係任天堂，但我地後知後覺，任天堂大升再跌番落嚟之後，先至如夢初醒，失晒先機咯。任天堂管理層算有良心，驚住股票狂升害死股民，及早公告周知，Pokémon GO不會為任天堂帶來太多收益，令股價回落。

　　呢日電訊P請財經傳媒吃午飯，左丁山當然問佢Pokémon GO有冇益到佢地，電訊P話：「有啲嘅，呢隻遊戲殺入香港之後，我地公司嘅手機數據用量即刻提升6%，所以我希望呢個熱潮維持得愈耐愈好，但證諸過往經驗，不少熱門遊戲都係三個月熱度，頂多六個月，之後就會歸於平淡，唔能夠期望太高。」

　　熱潮嚟得太快，恐怕亦會退得快。一位著名分析師就在佢間甲級商業大廈內碰到一位大班級人馬一路行一路望住手機，乜人都睇唔到，令旁人竊竊私語，「準大班」捉小精靈係唔係有失身份呀？左丁山聞言輕嘆，有地位嘅知名人物係會失去一啲行為自由㗎，呢啲係成功嘅代價。

　　電訊P話今人用手機，已經少講電話，多用數據（例如上網、WhatsApp、facebook、攝影等等），隨着串流科技進步，就快有手機電視出現，例如中午食飯時分用手機睇電視劇或盛事直播，跟住還有Apple Pay，最終手機會取代荷包功能，將信用咭、銀紙，全部放入手機內，賣名牌荷包嘅名店，生意必然受威脅，最後手機甚至會顛覆整個信用咭行業，當然電視行業亦必須大變身。任何消費產品不能與手機Apps結合使用嘅話，將來都要失去市場。

　　我地追問幾時有iPhone7？電訊P話：「我都係聽傳聞嘅咋，傳聞iPhone7會在九月面世，超薄，起碼希望帶來刺激啦！」手機呢個行業直情係割喉競爭，一隻年幾前寂寂無聞嘅Oppo已進佔世界市場份額第4位，威過一輪嘅小米就抬不起頭，跌落第五，遠遠落後第三名華為，第二名iPhone及第一名三星，台灣HTC已成明日黃花咯。