地產論壇
登入名稱
密碼
頁數:
唔炒就唔使輸
瀏覽人次:32548    回應:26

唔炒就唔使輸

 

湯文亮博士

紀惠集團行政總裁
2016年12月7日

  曾經有不少人問我,做炒家最緊要的戒條是什麼,我話,無論什麼投資,都一定有贏有輸,千祈唔好輸打贏要,即是輸就打人,贏就玩人,所以,第一戒條應該是食得鹹魚抵得渴,否則,就沒有代理會介紹好荀盤,做物業投資,如果唔靠物業代理介紹,又何來咁多荀盤。

  現在有不少投資者因為新印花稅制,轉而投資車位,代理話細細粒容易食,他們沒有講錯,不過,只講了一半,車位冇錯是細細粒容易食,不過難消化,一般車位所牽涉的金額不大,買家甚少將車位上會,所以,即使在成交前未能摸出,都唔會撻訂,不過,成交之後要搵買家或者租客就很艱難,如果沒有足夠實力,一定要在成交前或者簽正式買賣合約前摸走,就難上加難,就算要撻訂,絕對不能怪責物業代理,打人更加唔應該。

  我相信有人會認為,如果物業代理沒有把握摸售,就唔好同個客講,老實說,如果有把握,不如自己買,毋需要介紹俾其他人,有兩位師奶,一位買車位摸售不成,就要打物業代理出氣,另外一位在去年買了一個細單位,其後細價樓急跌,那位師奶亦有損失,當時她受到不少人取笑,話有專家已經提出警告,細價樓會爆煲,她並沒有怪責那位物業代理,反而叫那些專家食屎,有自用需要而又負擔得起,點解唔可以買樓,兩位師奶相比,誰較有風度,唔需要我多講,賭錢同炒賣都是一樣,輸都要輸得有風度,為了幾萬元將自己形象毀於一旦,是相當不值,如果驚輸,就好似做雞蛋仔的店員對排隊的人講,唔買就唔使等,唔炒就唔會輸。

唔炒就唔使輸
1. Tony lam
2016-12-07 12:22
唔衹C9輸打贏要、胡S0憎一樣、佢身居何職 ? 問咗意見、睇文件都唔識、就照本宣科 ? 咁都得、不如直接律政司治港揸哂莊啦!佢存在要嚟托咩!

斷估佢上完北京後、係意圖向阿爺表忠、so佢夠薑打反民、點知縮骨10幾年、一懶叻出位即時瀬嘢、佢更諗唔到CY咁Q寸、直接篤佢一嘢不留情面、但CY事前點估唔到對手咁鷄呢!


2. 自我陶醉
2016-12-07 15:43
一早話咗鬍鬚曾冇料到喇,未出閘已經大脫腳,超低B, 政績冇,連政治智慧都欠奉,就算被人跣都要跌得有型啲呀!第日做咗特首,日日都會被人跣,被人擺上枱,被人小,連少少政治智慧都冇,都唔知佢點可以捱到5年!
3. 引刀一快
2016-12-07 15:53
其實叫專家食史果位師奶私下有冇鬧鬼中介,大家都唔知,因為受訪問所講未必係全部,打人就話揚咗啫,中介俾人鬧就一定暗啃,唔會張揚。

我認為如果個師奶真係覺得“有自用需要而又負擔得起,點解唔可以買樓”的話,又何須理會專家講乜呢?駛咩咁失儀叫人食屎?

都係果句,唔想蝕錢,就係剛需剛需剛剛需。
4. 浪子心聲
2016-12-07 16:59
你話我有偏心都要講,曾財爺今次被人跣,都算處理得幾好喇!!

作為政府主要官員,僅係要跟政府決定和方向行事,他有成擔有責任責任心,亦能證明給中央看看,他係會跟從中央方向處理香港事務。

在我心目中CY就失分哪,這樣的決定都可以話唔知,就算真係唔知都係最高層負責㗎啦!咁樣點做領導呀??  

5. Desmond
2016-12-07 17:43
我比較同意浪子兄的說法,曾財爺這次是借力打力,將問題打回律政師/政務師以至CY那邊,做得非常恰當。
6. 自我陶醉
2016-12-07 17:52
浪子兄,

鬍鬚曾嘅錯有以下幾項:
1. 有些少常識嘅人都知,香港法律係未判前都假設無罪,佢唔答議員問題已經係未審先判,在香港講法治嘅地區,這是大忌,何況在立法會。就算見到有這法律意見,作為一個司長都應該要質疑。就算法院判了政府勝訴,都有生效日期,在生效期前,呢班人身份依然係議員。

2. 佢唔質疑那法律意見不獨只,仲將內部指示讀出,人人見到哂政府底牌,事情就冇彎轉,佢就算唔願答都可以帶人遊花園,洗咩開底牌咁笨,此人判斷力有很大問題

3. 幾個議員係通過了主席監誓和承認,其實司法複核已經令這位主席非常尷尬,現在連其他議員都唔反對佢哋一同開會,作為司長未審先判,即係話主席讓嗰班人繼續開會繼續履行職責是錯的,這行為就是落主席面落其他議員面。這就是政治智慧。

如果有日,你知道你老細可能被炒,在未正式公佈,未正式生效前,你又會唔會擺明車馬採取不合作態度? 世界真細小,須知山水有相逢啊! 

CY都同樣離奇,洗咩話自己唔知情? 擺明踩多鬍鬚曾一腳,全無大將之風,不過一早就知佢唔係偽君子,而係真小人。
7. Desmond
2016-12-07 18:24
陶醉兄,

我們先不要本末倒置,大家都知道香港法律係未判前都假設無罪,這樣為何律政師會發那內部文件?又是誰指使他發文件?鬍鬚曾表示積極考慮參選特首,已是CY的對頭人,鬍鬚曾底牌是明智之舉。
8. 浪子心聲
2016-12-07 18:27
自醉兄:

我唔係幾同意你嘅睇法,如果我係曾財爺,喺這個特首選舉敏感時刻,收到這樣的法律建議要實行,明知有問題都要讀㗎喇!唔通走去反對律政司嘅建議呀,這樣失好多分㗎,重會畀CY一個機會上位,話財爺唔夠忠心。現在未幾好,中央可能覺得曾進華可以做到野喎!!

9. 自我陶醉
2016-12-07 18:52
浪子兄,

“明知有問題都要讀”, 這只是follower嘅水平 , 根本冇資格做leader. 如果佢將問題帶到律政司同CY, 而大家平衡利弊後依然堅持要做,那他便可以名正言順說出來了。如果有日中央叫佢開架坦克去鏟走示威者,佢問都唔問就照做,你認為這個人有資格做特首嗎?

如果呢個人好似你講咁, 為咗要做特首,可以放棄法治呢個香港核心價值,我只會更加睇唔起佢。
10. Tony lam
2016-12-07 19:11
林鄭害咗佢、好打得個綽號咁猛、又做到政府一姐、低B憎有樣學樣、成日吹識洪拳/劍擊、呢次諗住扮下好打得、博做特區一哥、但資質所限一出位就踩屎、或者香港真係有運!

浪哥  律政司唔係佢上級、你都話係建議啦!咁多人一聽都知唔啱數時、財爺咁大個官唔識 ? 怪之得葉劉話佢十年財爺揸流攤、做関長時勤力、係在葉劉麾下冇得吞泡、到自己揸莊呢十年縮骨吞泡梗唔會錯㗎! 點知真係要博時就即瀬嘢。

醉哥  睇得咁通又寫得咁清晰、要跟你學下。
11. 引刀一快
2016-12-07 19:59
唔通學你咩,又輸幾多呀?
12. 珍惜香港
2016-12-07 20:02
珍惜香港TO:4/F 浪子心聲

浪子兄,唔止你一個偏心,我都喺一樣噃,哈哈哈!

記得我曾經封過財爺曾為,真正嘅大師,仲話過,如果佢真喺參選特首嘅話,我一定撐佢。直到今日,我呢個立場,仍然冇變過。

但其實,準確啲講,我喺話佢退休之後,應該會好有潛質,成為一個真正嘅大師。因為大師嘅首要條件,就喺一切塵世間嘅是是非非,都「唔關佢事」,就好似一個不食人間煙火嘅高人咁。

今次好明顯,喺財爺曾為咗要急於攞分,行事太魯莽。唉!一「關佢事」啫,就搞咗鑊粥出嚟。

不過,人喺冇完美嘅,至少佢清楚自己嘅弱項响邊度,唔會因為民望高,而走去打民望牌。一個特首候選人,最重要去 SELL 嘅,喺阿爺,而唔喺香港人

當年唐唐見大勢已去,為咗要扭轉局勢,就做出一系列令阿爺非常唔高興嘅蠢事。蠢嘢唔怕做,CY 成日都做蠢嘢,最緊要阿爺 LIKE。

港人利益?核心價值?唉!做到特首先至講啦!
13. 引刀一快
2016-12-07 20:08
自我陶醉兄

個個都唔得,咁下屆任志剛好唔好?
14. 向飯民說不
2016-12-07 21:27
引刀,好勤力。
15. 自我陶醉
2016-12-07 22:10
林兄,

過獎了,做咗幾十年人,辦公室政治我見唔少,大把人要靠跣你上位,或者借你手去跣人上位,連咩係啱咩係錯都搞唔清就去做,蝕底最終都係自己。


引刀兄

你冇聽+x哥講咩? 有能力嘅人就唔做,冇能力嘅人就爭住做。 這都是事實。

16. Tony lam
2016-12-07 23:56
醉哥  領導人掌控公共利益福祉、比人跣到就係錯就係不稱職、縮骨衰過真小人、政治人冇君子、卡特做總統後美國佬即時後悔揼爆、玩一屆冇得留低、香港特首冇得親和、親和就好多古惑、越多人唔妥佢、阿爺就越放心。

傻刀   成日咒人輸、心術應真不正、有冇偷偷地濕多少#5呀、贏幾多無謂曬、費事你揼心啦、早排隊到你瞓唔着、咪個海鮮又敏感呀。
17. Desmond
2016-12-08 00:00
自我陶醉兄, 你認為誰有能力做特首?先不管他/她們願不願意做。
18. 自我陶醉
2016-12-08 07:45
Desmond 兄

一個醫生,攞住份錯到離哂譜嘅化驗報告去做治療,而呢份報告係有經驗嘅醫生都會睇得出佢有問題,咁你最後醫死人,你估你有冇責任? 你可唔可以話做化驗係佢哋專業,唔關你事? 可唔可以同人講只係老細想害你?

我見過好多年青人,成日都話要篤老細背脊,經我手處理過嘅case 都唔少,實情係9成呢啲case, 公司都係只會保大唔保細,著眼點唔係邊個啱邊個錯,而係保邊個對公司運作最有利,就算當你有理,警告老闆幾句,你日後嘅日子都唔會好過。所以和老闆不和或老闆忌才,唯一做法係化解矛盾或唔撈,對抗或揭佢底牌多數都行唔通,除非公司一早想旭呢個人。

如果在一間公司佢哋會先考慮幾個問題:
1. 你知唔知法律意見有問題? 你話唔知,即係你冇sense,唔夠班,或係做嘢唔經大腦。如果你知有問題仲大鑊,咁點解唔澄清唔匯報?是否你做事苟且,得過且過。
2. 律政司出啲有問題嘅法律意見,點解你做之前唔向上級匯報? 佢係咪迫你照做? 佢同你咁高咁大,你唔做點迫到你?唔通你話知道一定係CY 想跣你? 咁CY 有冇親口叫你做?  你又又有冇證據佢要你做?冇證據當然會孭多條推卸責任罪。
3. 就算真係律政司出錯,咁係咪代表你可以明知錯都要做? 又係咪代表你啱?

以上任何一條都可以係死罪。
19. Desmond
2016-12-08 08:44
自我陶醉兄,

謝謝你的詳細回覆,其實我的觀點已經說過了,再講只會沒完沒了,我在17樓的發問只是想了解一下認為有能力做特首
20. 自我陶醉
2016-12-08 09:55
Desmond 兄

哈哈! 美國最新民意調查,大部份人希望有個如普京一樣的強人統治,其實我喺度講過幾次,如果真係任我揀,我會選擇好似以前英國佬統治一樣,中央派人落嚟做強勢領導。如果咩都係睇民意做人,做咩都會有人反對,即係咩都唔洗做。

頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。