地產論壇
登入名稱
密碼
頁數:
港燦式茶餐廳(五) 999,電話係凶手
瀏覽人次:38483    回應:57

港燦式茶餐廳(五) 999,電話係凶手

 

引刀一快

2016年11月25日
   電影裏面經常睇到嘅綁架情節,綁匪一般會幾個人分工:內鬼、偵查、司機、落手、看守、談判、收贖金、撕票,善後等等。

而現實世界裏面,原來可以單拖做綁匪,半身不遂都得,仲可以一日做幾單?!


2014年某月某日.廣州

鈴鈴、鈴鈴(電話響)

楊玉環小姐:“喂,你好。”

B先生:“你好,請問你係咪楊玉環小姐?”

楊玉環小姐:“係呀,你邊位呀?”

B先生:“我係廣州市禁毒支隊嘅特警,今朝快遞公司上報一件大型可疑郵件,收件人名稱、所留電話、地址,都係妳嘅,裏面有三公斤4號海洛英,我地懷疑有人利用妳嘅身份運毒。”


楊玉環小姐:“下??唔係呀,我冇呀,唔係呀,我冇呀,我唔係呀,冇呀....”

B先生:“楊小姐,唔駛咁驚住,呢個情况最近發生過幾次,我地已經掌握咗毒販嘅犯罪模式,我知道妳清白。毒販對妳背景非常清楚,可能已經監聽緊妳甚至妳家人嘅電話。”

楊玉環小姐:(更加驚)“啞....啞....啞.....哦......哦.......哦.....”


B先生:“佢地未知件嘢俾我地截咗,會搵機會從妳手上攞返件嘢,爲咗保障妳嘅安全,妳依傢要完全配合我嘅指示,否則俾毒販快一步就好危險,我依傢用政府隱蔽頻道打電話俾妳,毒販係好難監聽嘅,妳必須儘快離開屋企,坐的士搵一間遠D嘅酒店,開間房匿喺裏面,我地捉到毒販之後會通知妳。”


楊玉環小姐:“哦~~~~”


B先生:“妳去之前,先錄一段口訊同家人報平安喇,唔係佢地會擔心㗎,我用隱蔽頻道打俾佢,佢都會冇事嘅,妳自己唔好隨便打,妳想我打俾邊個?”

楊玉環小姐:“哦~~~阿媽喇。”


B先生:“我講,妳就跟住講啦,阿媽,我冇事,我好好,我地照住指示做就唔會有事㗎喇,妳講啦”

楊玉環小姐:“阿媽,我冇事,我好好,我地照住指示做就唔會有事㗎喇。係咪咁呀?”

B先生:“係,冇錯,妳阿媽幾號電話?妳俾多幾個親人電話我,我怕有時打唔通。”

楊玉環小姐:“哦,阿媽係XXXXXX...,阿爸係XXXX.....阿.......,”

B先生:“依傢係最後嘅指示,聽完就照住做,關手機,因爲手機關閉情况下依然可以追踪嘅,身上唔好帶任何手機,帶身份證同現金,馬上打的去從化開間房,入房馬上反鎖大門,為保證安全唔好開門俾任何人,亦唔好接酒店電話,好嘞,唔好嘥時間,快去!”


楊玉環小姐:“哦!”(掛電話兼關機)


八個鐘頭後...........

因爲楊小姐冇手機玩,好悶,冇零食食,嘴裏淡出鳥來.......

故事講到呢度,唔駛畵出腸,大家已經估到發生咗咩事!當楊小姐玩手機欲望戰勝生命安全之際,“綁匪”早已袋袋平安,飽食遠揚。真人真事廣州發生,為避免模仿,此版本与原案稍有出入。

騙徒使用僞基站,假冒公安局來電打第一個電話,然後假冒楊玉環小姐電話號碼來電打出第二個電話,難爲“阿媽”睇到阿女來電,再聽到清晰真實嘅愛女“報平安”,仲唔發晒矛?就算阿媽幾醒目,幾個鐘頭搵唔到個女,一樣要服軟,“贖金”乖乖奉上。


對比於電影中一群亡命之徒,傷天害理、勞師動衆、以身犯險、工作量大、成本高昂、甚至各懷鬼胎、後患深遠,電騙只需一份個人資料,打兩趟電話,等你自己綁架自己,贖金就佢收,真係乾手淨腳、慳水慳力。

近年大量電騙跨境襲來,原因除咗中港往來日益頻繁之外,香港人文風氣相對單純、法制意識濃厚被視爲弱點而成上佳攻擊對象。電騙喺大陸,可謂無日無之,哪怕一個集團已經將閣下號碼篩走,另一集團又會撿拾用之,早已經係生活一部份,下篇,將會講講如何与電騙和諧共處。




港燦式茶餐廳(五) 999,電話係凶手
1. 自我陶醉
2016-11-25 10:44
謝謝引刀兄提醒! 我安裝了三個電話過濾軟件,而且設定不接沒來電顯示的電話,暫時還未接過這些電話,有機會也想試試陪他們玩玩。哈哈!
2. 孟波
2016-11-25 10:45
次次打來用廣東話回應佢就死死地氣收線
5. 引刀一快
2016-11-25 11:02
自我陶醉兄

下篇將會講人工過濾小技巧。
6. 引刀一快
2016-11-25 11:03
孟波兄

廣東話騙徒都唔少㗎。
7. Mirror
2016-11-25 11:04

引刀兄可否分享一下在廣州買樓賣樓如何避免受騙, 或有什麼古惑招數要提防? 我朋友(也是港人)在深圳試過物業買賣, 他說一買一賣一驚心, 幸好最後順利完成交易。


8. 引刀一快
2016-11-25 11:17
Mirror兄

你呢個問題,不可能三言兩語講得清,就算我喺果邊咁多年,又成日群埋唔同公司嘅地代玩,好多時交易之后,先發現地代冇俾我盡知其所知,搵食就係咁,尤其係呢行,競爭激烈,求生意欲支配一切。

要避免受騙,我個人嘅第一條戒律,就係必須相信自己會受騙,可以被騙,100%摒棄“小心D就冇人呃到我”呢種觀念。

如果要講第二條的話,就係唔好飛中介。

其他就要按具體情况討論。
9. 打工仔 Andy
2016-11-25 11:19
我都收過一次類似騙案錄音電話, 我就立即 cut 線费事聽! 
10. 向飯民說不
2016-11-25 11:22
台湾人才是电骗高手。其实查出来的幕后黑手大部分是台湾人。
11. 引刀一快
2016-11-25 11:24
Andy兄

電腦聲果隻,係用嚟做大規模篩選嘅,我得閑寫下一篇嘅時候,會提到。
12. 打工仔 Andy
2016-11-25 11:30
啊 原來如此! 
所以现在好少接聽唔認識嘅來電! 
13. Desmond
2016-11-25 11:35
文中細節非常詳細,難道引刀兄就是B先生?
14. 占士
2016-11-25 11:37

除了有登錄在我手機的電話號碼,陌生電話一般我不聽。就算接聽了,發現電話內容有問題,有懷疑的,我會把它列入黑名單。我的家人,朋友,同事都可以用有效的方法聯繫我。

15. 向飯民說不
2016-11-25 11:44
基本上陌生电话,陌生email都不要接啦。

香港有D更加吸血,有几多吸血中介,骗了钱,人也在那里,但是你却不能告他。
16. 引刀一快
2016-11-25 11:49
向飯

如果陌生電話全部唔接,亦有唔方便嘅情况。
17. 引刀一快
2016-11-25 11:53
Desmond兄

原事件比我寫嘅還要精妙,我就無謂寫咁足,怕害到人。

B先生係一個冇人會話我影射嘅化名,點知反而俾你話係我。
18. 引刀一快
2016-11-25 11:55
占士兄

你嘅防禦方式,大陸早就有人被破解喇。
19. 孟波
2016-11-25 13:04
引刀兄:
騙徒係有講廣東話之輩,但只要講多兩句就露饀。

只要記住大陸機構唔會咁好死為你做任何方便,或保障行為就唔會上當。
20. Sugar
2016-11-25 13:38

引刀兄十年磨一劍.....大哥大您終於再出文 ! 叫 sugar 望眼欲穿啊 @@ 可喜可賀 ^^

好文 , 到位 !!!


頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。