一,點解會有兩條友響鐵達尼號上面爭女?因為佢哋唔知條船撞緊山呀。嗱,正路來講,假如你知條船撞緊山,你又改變唔到航道,你會點?自助餐食飽啲,搵定逃生路線,甚至乎一早去定 deck 面搵定救生艇。爭女,傻的嗎?
二,Donald Trump 話其實自己可以唔需要同老習開拖,不過上帝叫做,冇法子啦。事實係,美國呢一轉資產泡沫周期,已經有出現調整嘅跡象。Trump 好清楚,而點解佢揀呢個時間出手?我點知喎。
三,之前我都有提過,inverted yield curve 呢個超自然現象,可以簡單理解成資金買到冇野好買,少少 yield 嘅長債都照殺。不過,點解大家都集體地認為其他嘢買唔過呢?大家眼中,世界資產市場就只有一條超級大水喉就係 The Fed;以前就話 Don’t fight the Fed,依家直頭係一早要投靠 The Fed。公開市場運作,係聯儲局透過買入國債放水出街,又或者借錢畀商業銀行去買國債;德國國債實質負利率嘅狀況,有可能會出現響美國。
四,話雖如此,強硬對華政策,唔應該理解成 Trump 嘅個人 agenda。兩黨共識係中國唔守信,亦都講咗好幾年。Trump 越話自己係老習好朋友,其實潛台詞係叫老習畀佢攞個彩好過益共和民主兩黨班人。
五,至於大陸,數據嘅嘢,信則有不信則無。首先,人民幣跌出口會唔會更有競爭力?平,點都會買多咗,但唔代表賺多咗。最簡單嘅宏觀經濟學都有教,貶值嘅結果有兩個,出口平咗,入口貴咗。中國經濟嘅不方便真相係,食品能源等唔少都要靠入口。有唔少道聽途說嘅消息話,大陸近來進口貨價錢升唔少,甚至影響到成條供應鏈都加晒價。
六,八十年代中國最大嘅經濟民生事件係乜?其中之一係闖物價關,但實情係半自由半開放嘅市場,促成黑市活動同貪腐。中共好避忌呢段歷史,但始終要面對現實:當市場效率同生產力嘅增長配合唔到貨幣信貸嘅總額,結果就係通脹。
七,歷史上,貨幣信貸急速增,通常都係因為軍費(皇室點大花筒一日都係得廿四個鐘享樂,用得幾多吖)。現代歐美各國,就多一樣叫 entitlement,不過偉大嘅人民共和國,又有乜 entitlement 吖。軍費,通常對市場效率係完全冇任何脾益。所以,每個政權最後都係出現不受控嘅通脹,古今中外都係咁。但通脹係 symptom of the disease 而唔係 disease 本身。即係一個有長期病嘅人,通常死於併發症。
八,「咁幾時支爆呀?講咁耐。」我又點知呀?正所謂 a broken clock is right twice a day,一直買圍骰,梗有一鋪中。不如真搵病因啦。目前中國面對兩個最嚴重嘅結構性問題:一,人口結構;一孩政策真係曠古爍今嘅超錯政策,中國未堀起就老化。二,市場結構;政府指令經濟仍然存在,冇推陳出新冇代謝,整體效率極低。
九,人口結構,基本上無得救。講完。
十,經濟結構,唔係無得救,但呢個手術涉及到一個核心問題:黨指揮軍政之餘,亦都係成個國家經濟結構入面有利益,由四大銀行、國級央企等,到地方經濟同企業。情況比洋務運動時成立嘅乜局乜局,問題更大。貪腐係因為制度入面大多誘因,聖人去 run 都好難唔貪。
十一,國企上市,唔代表佢哋有根本嘅改變,只不過佢哋多咗一個集資嘅渠道。另外,近年好多距離中央水喉太遠但又有地方勢力嘅企業,咪借香港融資,上市又好發債又好。賣股票同借錢,本來冇乜問題,不過當你 book 嘅收入同利潤係人民幣,但借嘅係美金,人民幣貶一成就等於即時畀人起十厘釘,都咪話唔金。所以我經常提醒讀者,人民跌香港好難唔仆直,係仆到直一直,慘過 1997。
十二,結果,中央唯一嘅救市方法,咪又係貨幣信貸量寬。大家知唔知點解大陸有外匯管制?假如畀十四億人可以上 Facebook,你估佢哋會唔會淨係上微訊?同理,有得揀,佢哋又點會只係持有人仔?外匯管制,變相就係迫大陸人持有人民幣,用人民幣買返自己嘅股票;貿易保護主義,就係迫大陸人同返微訊小米華為。
十三,「喜茶微訊小米華為,都幾好吖!」你可能會話。甚至你都有用埋一份。但重點係有冇得揀。現實係,你見到幾多大陸人想去外面?其實,由晚清到家陣,可以去外面消費同投資嘅,永遠都係幸運嘅特權階級。我成日話呢個國家個幾世紀都不思長進,真係好 sad。
十四,從文化層面上,由於經濟結構嘅需要,大陸永遠都有一股反外嘅情緒,好深層次咁 justify 封疆鎖國嘅現實。呢個現象唔一定係國家主導,有時候一般人見到自己嘅處境,好易會選擇一個簡單嘅方法去 reconcile 去 make sense of the experience。矛盾同差距,最終變成仇恨,真正嘅集體因愛成恨。上世紀,有義和拳;近年都有唔少憤青。英美澳加撐香港集會踩場班小粉紅,亦應作如是觀。
十五,林鄭響呢個時候,搞單咁杰撻撻嘅,令共和民主兩黨都有人話要檢討香港政策法,但老習都要死撐,我估啦,係因為如果佢一縮,唔知到其他仍然在生嘅精神領袖,會點樣乘機發圍。中共無錯係極權,但世上無真正嘅獨裁政府,尤其係十四億人嘅國度,一定有一個權力利益糾纏嘅共生體。對呢班人來講,內部權力平衡,來自共同利益。一旦共同利益受損,就會出現分裂排斥。
十六,中南海班人,內鬥內行,外鬥外行。林鄭今次累到大老闆,假如大老闆覺得佢只係廢,就點都要撐,但都要搵定 plan B。不過,爾虞我詐嘅宮廷政治入面,係咪真係等到你有 plan B 呢?我唔知,都係估下。
十七,理論上美國九月都會過民主人權法案,好快就會有人講美港關係法。同埋,直覺經濟真係差咗好多。正如一開始咁講,爭女呢,thanks but no thanks la,我都係食埋個自助餐,然後上 deck 面吹下海風,睇下星⋯⋯