地產博客 > 資深會員專欄 返回
瀏覽人次:17626    回應:8
資深會員專欄

港燦式茶餐廳 長居大陸長者要留神

 

引刀一快

2019年5月26日

最近香港好積極搞緊逃犯引渡條例,本來筆者只係比較著眼於香港資訊弱化呢一環,最近發現一個潛在隱患,不得不提醒一下大家,尤其是上年紀嘅長者。

香港有超過五十萬人長居廣東省,未計其他省份地區,若果加上福建、江浙、廣西,數字應該遠大於此數。長居大陸人士,部分為退休人士或長者,反正大部分都係唔使喺香港返工嘅人,裡面會有一定比例名下擁有香港物業,作為出租或者自用,此類人士以後要多留意。

大陸騙徒越來越精細、專業,而且高科技,唔少騙徒係科班出身,心術不正精研旁門左道。過去大陸騙徒嘅手法主要係承襲香港騙術,依家已經完全自成體系,過去筆者聽聞過騙徒只需打兩三個電話,令受害者自己綁架自己,錄音向家屬報平安,騙徒輕取贖金。

由於引渡法通過在即,必然已經受大陸騙徒所關注,過去呢啲騙徒壞人所覬覦嘅香港人資產,將會受法例效力所延伸而成為觸手可及,如何保護年邁港人資產安全,應該早日得到兩地政府相關部門嘅關注。

覬覦港人在港物業者,絕非單單只有街外嘅騙徒,親戚、朋友、鄰居,尤其親戚,只要氹你簽份嘢,咁就有機會透過一系列手段令你觸犯法例,進而凍結你香港嘅物業,唔知到時係拍賣,還是可以轉埋俾佢?BSD都慳返?呵呵。

香港人一般比較單純,一旦有人開發出符合引渡法嘅騙術,將會好似電話騙術咁,星火燎原。希望兩地會有相關部門嚴格做好把關工作,密切留意社會詐騙行為動向,保護一國兩制安全性,防范於未然,應對於今後。

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 路人xx 2019-05-27 11:09:01
我就唔擔心引導喇,大家都見到引刀在中國大陸一直生活得幾好,就係最好嘅証明。
2. 引刀一快 2019-05-27 12:24:12
有乜好擔心唧,香港跌watt之嘛。
3. 星海道人 2019-05-27 14:50:25
撐一撐刀兄場先
預期呢d事應該會如刀兄所推演
4. 引刀一快 2019-05-27 17:14:47
多謝捧場,但係唔承你貴言,一發生,啲老人好慘。
5. 浪子心聲 2019-05-27 17:16:07
我都來撐一撐刀兄場先!

有道理,我都非常認同。
6. 引刀一快 2019-05-27 17:20:52
浪子心聲兄

多謝捧場,希望無論引渡法通過與否,相關部門重點把關,唔好俾壞人機會。
7. 向泛民说不 2019-05-27 17:42:03
引刀讲到甘恐怖,点解仲日日叫香港人返大陆买楼,风险更加大哦。

仲有唔L好颠倒是非,电骗最专业的是台湾仔。他们也是依靠没有引渡法保护。原来引刀其实最支持电骗。
8. 引刀一快 2019-05-27 19:58:29
向飯爺,乜咁錯蕩呀,原來我又顛倒是非呀,大陸冇騙徒冇騙徒,哦,原來係咁,嗯,台灣電騙原來都同引渡大陸有關啊,係嘅係嘅,明白明白,向飯爺大駕光臨,寒舍蓬蓽生輝,好行夾唔送,have a nice day。