地产集团董事T请吃午饭，系一年一度，旨在交流时事及经济意见。做地产噃，一开口就系讲填海，而唔系目前地产市道。左丁山立场清晰，支持填海，地产T听得唔顺耳，声言反对，大体理由与一啲本土关注组差唔多，就系话要政府先搞棕地农地，至於高尔夫球场呢，商界几乎一面倒同声反对收回高球场嘅，唔驶讨论嘞！但点解有啲商界人士，特别系地产界人士，也反对填海呢？理由唔驶讲咁明嘅，正是人不为己，天诛地灭（左丁山读书时从金庸社论学到嘅道理），如果我做面粉厂，我边度想有人在我工厂隔篱开多一间比我大十倍嘅面粉厂呀。
中原地产老板之一施永青系要画公仔画出肠，在am730专栏直指最反对填海之派系就系环保派、民粹政客以及地产商人，其中尤以地产商在幕后反对得最落力。一啲simple and naive分析师以为搞填海系明益地产商，涉及利益输送，唔该读多两次施永青嘅大作。要记住，一声话填海啫，山顶豪宅地皮立即流标，点解咁啱嘅呢？一来系地产商恐怕他日真系填海，土地供应大增，买地自然小心好多，二来呢？碰啱有此招标时机，向林郑表明态度都系合乎常理嘅情况啩。
文辉道究竟入标价若干，目前不知，左丁山素来反对公地不拍卖而招标，林郑做发展局局长时，公开拍卖改为招标，实在与最佳管治行为嘅公平、透明度标准背道而驰，间接助长地价炒作，带动楼价上升。假使文辉道系
公平拍卖嘅话，我地可能会知道地产商出价出到四万蚊一平方尺就缩手，政府拍卖官不满意，认为不及底价而收回。如果这是真的，地价一定有负面反应。特区政府口口声声讲没有高地价政策，但同时特首又再重申，绝不贱卖土地。你认为有无矛盾呢？地产T话投标文辉道者不多，出价最高者听闻远远不及政府底价每尺6万元。讲讲吓，地产T饮咗两杯红酒之后，就话空置税令佢失眠。「平价纳米房」预售，就话可以一Q清袋啫，有啲在山上嘅独立豪宅就好难一次过卖晒，经常需时间逐间屋卖，随时卖足两年。所以空置税实际上对豪宅几有杀伤力。咪有人话安排短期租约，短到两个月都有嘅，地产T话呢啲方法冇乜大作用，管理麻烦到极，豪宅特别难以短期出租嚟避过空置税，呢招对压抑楼价无用，只系伤及地产商啫！
App下载
