在投资论坛碰到陆东，陆东公开讲佢个人揸得最多嘅股票，只买不卖嘅，就系港交所与金沙。港交所大家都明白吖，博呢只股得益於未来沪港通，深港通，以至债券通各方面大大增加香港市场成交额吖嘛，咁讲系长远一啲，但投资策略之一就系长期持有，唔好成日做即日鲜，月月鲜，成日挂住换马，否则猛咁蚀交易费用，甚至左一巴、右一巴，好时年，得个做字，环境逆转就得个蚀字。
金沙呢？陆东话根据拉斯维加斯几十年来数据，赌场长期表现靠博彩以外嘅收入，当然，贵宾厅收入，中场（散户）收入系好重要，但博彩银码长期嚟讲会达到天花板（ceiling），於是聪明博彩公司会尽量发展会议、酒店、家庭娱乐及演唱会等业务。呢方面，美国金沙做得最多最成功，正在将经验转移至澳门金沙，已初见成效，故此呢只股值得长期睇好咁讲！
陆东系以前瑞银嘅星级分析师，现在系中港通资产管理有限公司嘅首席投资总监，买卖股票叻过一般人，既然够胆向几百人出席嘅论坛公开讲，「港交所、金沙，我揸到一裤都系！」可见信心十足，那理得短期股价波动。问佢贸易战等事，佢话投资市场总会不时出现风风雨雨，长期投资者最紧要企定，唔好畀人震仓！
长期楼价又点睇呀，陆东指出，本港楼价与中位入息比率已经高达19.4倍（2017年年尾数字，现在更高），创历史新高；家庭负债与本地生产总值比率在2017年底升至69%，系历史新高，总不能不调整而不断上升啩？陆东言下之意，就系本港楼价越来越临近调整边缘，催化剂可能系加息。财政司司长陈茂波出席论坛致开幕辞，本以为佢讲五分钟客套话就过场，点知司长好认真咁检讨本地GDP第二季数据、今年趋势，跟着讲埋美国九月多数加息，香港要看情况跟随。我哋睇司长之讲话神情与身体语言，在现场感受到今年九月本港银
行好难唔加息咯，如果联储局加息嘅话！上星期已有几间大银行增加P按、H按利率，到咗9月，滙丰、中银、恒生嘅最优惠利率大有可能调整上升0.25厘，或会影响楼价升幅。目前香港楼价点解咁坚？除咗超低息环境之外，陆东提出了两个数字；1985至2000年，香港填海3000公顷，此段15年时期，楼价稳步上扬至1997年爆破；由2000至2015年也是15年，期内香港填海690公顷，只系前15年之23%，而楼价大幅度上升，远超九七年水平，道理一字咁浅啦，土地供应不足，预期楼价必涨！
App下载
