地产博客 > 丝丝细语 返回
浏览人次:17312    回应:3
丝丝细语

何处宜居

 

左丁山

2018年6月16日

  上星期日早上读苹果日报蔡澜讲在外地买楼,写得好过瘾,深有同感,在外地买楼,若非移民长住,而系学吓外国概念,搞个second home嘅话,成本其实好高,净系物业管理费,屋内清洁工作,已经有排烦,租出去作「时间分享」收租或Airbnb,又惊住畀短期租客搞污糟间屋,担惊受怕,何苦来由哉。用几百万买一个单位在曼谷、新加坡、雪梨诸如此类,一年去住得几多个月呢?计起条平均数,可能每次去住不同五星酒店豪华套房,住住埋埋都唔驶几百万港纸。

  读报半小时,肚子饿了,读蔡澜,醒起蔡澜於农历年间,曾送来几包「蔡澜监制抱抱面系列之葱油拌面」,於是拿一包出嚟,用滚水煮面,但雪柜冇乜肉片喎,唔通食斋面,忽然睇到有樽日本味噌,系留学庆应嘅崇基校友船务A送嘅,佢话呢款「土佐香味」味噌由佢退休后设立嘅公司代理嘅,食咗对喉咙有好处,於是成樽倒落去,味噌蔡澜面,再加两三块北海道紫菜,哗,不得了,十分好味道,浓郁微辣不咸,出街卖四五十元一碗,包保铺头门口排长龙,抱抱面烟韧有咬头,紫菜味噌汤成为绝配。下次见到船务A,要问佢买咯,成日送就唔系几好意思啦。

  船务A精通日文,自崇基毕业后得日本文部省奖学金往庆应留学,娶埋日本太太,於是成为日本通,当年跟中大同学大队加入金山航运集团,后来成为董先生得力助手,退休后,半年居日,半年居港,在东京买楼就好啱用嘞。现在开咗一间日本食品公司,搜罗不同日本地道之食品运港做批发,我地身为中大校友,当然久唔久就有好嘢攞到。

  食完之后,小Y Y自澳洲公干回港,来短讯话:「雪梨食餐好贵,吃不消,物价亦贵,点样宜居呀?」宜居者,就系苏黎世湖边别墅,或墨尔本河边大宅,与香港纳米楼之分别,以及空气、绿色环境、文化艺术、戏剧音乐节目等等嚟决定边度最宜居嘅。叫孟买、拉哥斯嘅普通居民比较吓何谓最宜居,答案截然不同,香港是否宜居呢?计左丁山话,宜居到极,只要你有公屋或居屋或私楼嘅话!衣食行三件事,在香港最方便简单,好过全世界,唔信睇吓刘以鬯先生,在香港可以安居至99岁,了无遗憾,若非及早离开上海来港,未必有此福气。

 
 
我要回应
我的称呼
回应 / 意见
验证文字
 
会员登入
登入ID 或 网名
密码
1. 十郎 2018-06-16 10:13:15


      宜居与易居

      宜居与易居有所不同 , 不同之中又建基於同一样野 , 金钱之上。力有不逮的人话 , 宜居又点呢 ? 最紧要易居 , 呢个系最基本要求。

2. 楼市中哥 2018-06-16 13:00:08
可能方便,但小朋友学习环境呢?
3. Carson 2018-06-18 13:11:15
今日眼见不少人为楼价而叫救命,我就想起两年前有楼冇人买的奇景。过往十年咁多机会都唔做,今日怪得边个?