纳米楼洗衣店

　　分析师F话搬屋难，主要系因为楼价高昂之外，不同区域之楼价差价实在太大，譬如话由屯门搬往太古城，唔通要由千三尺搬去几百尺咩，此外，各种交易费用，主要系印花税，亦令人望而生畏。香港的交通工具点解咁挤逼，理由之一就系跨区返工嘅人太多，现在新界已经系人口最多地区，但白领工作就集中於港岛及九龙东及尖沙嘴，故此东铁西铁及专线巴士每日一早一晚逼到爆。如分析师F想话跟随公司搬往港岛东，事实上系知易行难，新界北楼价与港岛东楼价相差万五至两万元一尺，点搬呀！住公屋嘅，更加一世划地为牢，郁都冇得郁。因有此结构性差异，市区楼宇与新界楼宇之差价，只会愈拉愈濶，并无缩窄可能。

　　电台节目主持N老早搬入鸭脷洲，现在庆幸自己选择正确，有咗地铁南港岛线之后，去中环好易啫，唔使再受香港仔隧道或薄扶林道塞车之苦。佢经常早出晚归，冇乜留意居所附近街道情况，佛诞放假之日，佢偶然得闲，到街上走走，发觉街上多咗类似外国大学宿舍内之洗衣小店，洗衣店面积不大，为数几架自助洗衣机干衣机，不少附近街坊前来洗衣干衣，店内设有游戏机畀客人在等候干衣时打机打发时间。主持N发挥记者本色，八八卦卦咁问人点解帮衬洗衣店，一位男士话：「你新嚟㗎！咁离地嘅？我哋搬入鸭脷洲纳米楼，洗衣机摆唔落吖嘛！」主持N又问另外一位女士，女士细细声讲：「住劏房吖嘛！」

　　主持N同左丁山讲：「原来纳米楼与劏房衍生咗一个新行业，就系自助洗衣店，依家纳米楼愈起愈多，劏房数字有增无减，呢行有得做喎。不如你开一间，打开知名度之后，就变成特许经营，招收加盟店，跟住搞IPO！」想得真美丽，我哋想吓之时，人哋大财团已经做咗好多嘢，譬如新世界集团不久前就收购咗一间洗衣公司，系机构性嘅，专为酒店及大机构员工洗衣，但既有营运经验，稍一变身，开多一间附属公司专做纳米楼、劏房户生意容乜易呀。香港楼市结构奇特，居民移动性低，面积细小，劏房众多，细到连Panasonic招牌货（爱妻号）都摆唔落，恐怕家电公司以后都要针对市场需要，推出自助洗衣机租（lease）或卖畀呢类洗衣店咯。