袁国强走人，郑若骅走马上任律政司司长，点知宣布之后第二日（1月6日）就被传媒笃爆住所有僭建，全
港记者空群而出跟进，令到特区政府灰头灰脸。林郑月娥听讲好属意郑若骅做律政司司长，替代袁国强，袁国强一声辞职，就由佢顶上。既然如此，点解林郑特首办唔一早在品格审查之时，查清查楚，事先清除郑若骅之「政治负债」呢？郑若骅又唔及早为自己做「政治检查」，预备传媒狙击呢？唔通整个过程是急就章，讲两句就拍板？
现在搞到咁尴尬，传媒攞足料，部署好，等一月五日宣布委任司长，一月六日就用头版招呼，一巴掌打得好应，两位郑女士唔面皮痛就假。事件说明，林郑特首欠缺筹谋，特首办主任及其他办事人护主不力，完全无料到。有冇建制派人士出嚟护驾呀？因事情太明显，民建联工联会唔见力撑，只有范徐丽泰为郑若骅讲几句说话，指郑若骅不须辞职，又指骂郑之人要检视吓自己系唔系百分百清高。
建制派除咗识听中联办吩咐之外，能够出来讲说话嘅，只得范徐丽泰、梁爱诗、谭惠珠三位长者女士，一位老友话见佢地三位轮流上阵护航，就谂起「杨门女将」，杨家男将死晒，要由老太婆佘太君出场镇住，都几悲。今时今日之香港35岁以下一代，有边个一见到建制派三太君，唔立即退避三舍㗎！
前一轮，左丁山陪一位工程师去睇楼（工厂大厦），佢一行入去转个圈，就话呢条柱唔好，嗰条横梁有些少问题，而左丁山就乜都睇唔到，唔明白佢讲乜呢！郑若骅系特许土木工程师噃，现任丈夫潘乐陶系电机专家，前工程师学会会长，潘郑夫妇在建筑工程界无人不识，精明到极，买独立屋而唔知有僭建？即系话左丁山唔识写字啫，讲吓都系对潘郑夫妇嘅专业知识侮辱。本来香港到处有僭建，买到有僭建嘅单位都唔奇，唔应该话佢地错，香港居住环境就是如此。不过呢，大锣大鼓话要拆屋宇僭建物嘅就系曾荫权特首之发展局局长林郑月娥，2012年特首竞选，大力以僭建理由，摧毁唐英年嘅就系林郑月娥，依家佢做咗特首，唔通已有精英心态，有双重标准，对属下律政司司长郑若骅之僭建屋视若无睹？唉吔，要为唐英年呼冤呀。
App下载
