不要子女买楼

　　陈德霖警告「买楼靠父干」有风险，主要系指有父母加按物业，向银行再借多三几百万，为儿女买楼做首期，於是如果楼价下跌嘅话，父母与仔女齐受冲击，特别系父母已经退休之后，应付加按供款嘅能力，值得关注。

　　任何时候借按揭供楼都系有风险嘅嘞，问题系如何应付风险嘅啫。父母、子女如懂得量力而为，职业有保障嘅话，经验告诉我们，即使香港碰到建华七年不景气加上沙士，衰到贴地，仍然可以安然无碍，渡过难关；左丁山不少朋友便有此经历，最怕系一旦失业，便无险可守，所以供楼人士往往要考虑此点，一份稳阵嘅工作胜於今日花红多、明日会炒鱿嘅职位，供楼期内，不要轻言搵工跳槽，要谂清谂楚。

　　因陈德霖之言，几位朋友有不同意见。原来「买楼靠父干」呢个命题具备相当争议性，亦成为家庭关系紧张之源；香港嘅社会学学者，若研究香港家庭组织，家庭社会学，一定不能忽视呢个命题。有朋友A自幼家贫，全靠考上港大，毕业后（当年）系天之骄子，好快成为「打工皇帝」，於是送两个仔去英国留学，回来成为乜师物师，总之系高级专业人士，月薪相当高，但十年前两个儿子分别结婚，朋友A话：「我自己辛苦捱上嚟嘅，我唔敢要你两个回馈我嘞，但你地唔该买楼结婚靠自己！」十年前礼顿山千四尺市价约系千二至千四万，朋友A可以拿得出三成首期为大仔买楼，但大仔未有足够积蓄，父亲不肯帮助，於是租楼住，住靓楼喎，十年来一路加租，而今每月交租（不是礼顿山楼盘）已系六万几元，因两夫妇系青年「财俊」，交租还是冇问题，另一方面，礼顿山千四尺已经升到五千万以上，今天按揭只能按五百万元，朋友A已无力为大仔提供首期，朋友A妻子为儿子每月交租六万几，非常肉痛；朋友A呻笨不已，但为咗维持尊严，点都唔敢出声，仔同新抱就绝口不提此事，此乃香港家庭一景。朋友B系中大毕业，唔肯为女儿结婚时提供首期，依家女儿为避市区租金昂贵，搬咗去新界住，朋友B想见吓外孙女要预约时间入屯门，做阿婆嘅B太自然大讲哦文。朋友C呢，炒楼发达搵长咗，三位仔女长大成人，刚好俾佢借名字一用，三仔女分别买入新楼，作收租用途，首期全部由朋友C出，似乎又系「买楼靠父干」形式，实际上就系仔女「第一次买楼」，唔驶交惩罚性印花税，明益老窦买楼投资是也。